2 Korɛɛntënyüü 6
6
1‑Bɛ a nyra Nyɔsʋa 'sɔ ‑fɛɛɛa' 'jrʋpa nɩ, a bibie 'amɩ: ‑gbinanakʋlʋ Nyɔsʋa ‑nyɩa' 'amɩ nɩ, 'anyɩ 'pa 'uun sawʋ. 2'Be 'ɔ nɩnɩa:
‑Weea' 'mɩ nɩ, 'n 'sa ‑mɩ ‑gälɩ 'ia 'taɩn 'lɩ.
'Lɩmlɩwʋwʋkʋa ‑srɩ jräa' 'lɩ, 'nyaa ji ‑mɩ 'lɩmlɩba # 6.2
Esaii 49.8
..
‑Jää, 'a 'mʋfa ‑srɩ ‑ka jrä ɩa' 'lɩ; 'a 'köklesa ‑plɩɩ bä 'lɩmlɩwʋ ‑srɩ.
Nyɔsʋaa 'jrʋpafɛnyüü
3'Sɩmɩ wii 'nyɩ bä, anyɩ ka nyɔɔ Nyɔsʋaa 'nyʋfɔ 'klɩ 'ü ‑pɩ ana 'jrʋpa ‑srɛ. 4‑Maa a srara wiili kä 'fɩɔ a nöa' a 'mlɩ 'sɩrɩ a bäa' Nyɔsʋaa 'jrʋpafɛnyüü: plɛblöblökʋ 'lɩ a ‑gbötö ‑sʋɩlɩ kä 'fɩɔ a 'jääa'; bʋbɔwii, ŋalɛ, 5bɔtɔdii, ‑jielɩpapakʋ, nyüüa blara amɩ 'crɛ, 'lɩklajrʋpa, anyɩ 'mʋmɔ 'mʋmɔ ‑a, ‑gbëka. 6'Sɩrɩ a bäa' Nyɔsʋaa 'jrʋpafɛnyüülü 'nyɩa' ‑fre pa, 'ii a srara 'üün, ana wiijejrekʋ 'lɩ, plɛblöblökʋ 'lɩ, ‑gbinanakʋ 'lɩ, 'Nyüna ‑Susua 'mlɩ, ‑wawlakʋlʋ 'nyɩa' ‑gla 'klɩ bäa 'mlɩ, 7'cɩcasaa 'papawiia 'mlɩ, Nyɔsʋaa 'klüa 'mlɩ. A srara bɩa 'iin 'klɩgägäkʋa 'mlɩ i ‑beere tafudɛɛ amä tou ‑fu ‑bɛ ana 'mʋgbɛ 'mä ana 'wli 'lɩa ‑gbi 'ba; 8‑kä 'ü 'bʋala amɩ 'aiɛ 'ünyɩ 'bʋala amɩ, ‑kä ‑mülü 'paa ana bʋbɔwii 'aiɛ ana 'cɩcasaa, ü 'dara amɩ ‑gbagblɛnyüü, amɔlɔ nɩ, 'cɩcasa a 'saalɩ. 9'Ü 'kplaa amɩ ‑beere 'ünyɩ amɩ ‑a jre, ‑bɛ 'ü jre amɩ 'mʋfasa. 'Ü 'jää amɩ ‑beere jäjänyüü ‑bɛ a bälɩ 'mʋfasa! 'Ü 'jää amɩ ‑beere 'pɔnɩnyüü, ‑maa a ‑nëmä amɩ ‑a 'bla. 10'Ü pala amɩ sɩɔ, ‑maa dɔrʋ 'blaa amɩa 'doo. 'Ü 'dara amɩ 'pʋablanyüü, ‑bɛ a nrörö nyüü 'kɔkɔmlɛ 'bɩɔjinyüü 'lɩ. 'Ü nɩnɩa anyɩ dɛɛ ‑a kä, ‑bɛ a kä diia 'fɩɔ. 11Korɛɛntënyüü 'amɩ, a ‑jie ana polu 'klɩ anya ‑gbala 'amɩ 'mʋfasa. 12Ana polu 'nyɩ blörö ‑a blörö 'ana 'pɛlɩ, ‑maa 'ana polu 'uu blörö ana 'pɛlɩ. 13'Ii känyrɩ, 'sɩrɩ a nöa' 'ba nʋ 'saa ana 'pɛlɩ bɩa. 'Sɩrɩ tʋ ‑gbalaa' 'ɔa 'jü 'asɩ 'n ‑gbala 'amɩ, 'ana 'mʋgbɛ 'ba ‑jie 'ana polu 'klɩ ana 'pɛlɩ!
'Lɩbä Nyɔsʋaa nyuku
14'A nyra nyüülü 'nyɩa' nyɔsʋaanyüü bä 'nyɩ kʋ ‑pɩɔ 'doo 'wʋ#6.14 kʋ ‑pɩɔ 'doo 'wʋ: Grɛɛkëwii 'lɩ 'ü nö: «'A nyra nyüülü 'nyɩa' 'Kriisënyüü bä 'nyɩ kʋ juugë 'doo ‑wälɩ.» Juugëlu nɩ, 'a tuulu 'ü kpasraa' bruu 'sɔɔa ‑plɩ ‑gälɩ ‑bɛ 'u mlöröa' 'lɩ ‑bɛ 'u 'kʋɛɛa' detelɛ ‑gogloa' ‑tʋtʋ 'lɩ papladiia ‑gʋ. 'Ü ma kpasra mlaa 'sɔɔa ‑gälɩ juugë ‑bɛ üma 'nyɩ mlaatu 'doo ‑a bä nɩ, 'i ‑nëmä 'na ‑a 'na: 'ü ‑nëmä 'wʋ ‑a 'kʋɛɛrɛ. Tɛ Levitiikë 19.19 nyra Deteronɔɔmë 22.10.. Dɛɛlɛ ‑gäa' 'klɩ nyra ‑mɛlɛ 'nyɩa' Nyɔsʋaa ‑dɔ ‑wa 'mrɛɛ ü bä ‑pɩɔ 'doo 'wʋ? 'Napɛ nyra 'jöjrüükpü 'mrɛɛ ü bä ‑pɩɔ 'doo 'wʋ? 15'Kriisë nyra Sataan#6.15 Sataan: Grɛɛkëwii 'lɩ 'ü nö «Belialë», 'asɩ 'ü 'dara Sataan. Ebrööwii 'lɩ sɔrɔ; 'ia ‑gbaa bä «‑gbʋgblʋʋ» 'aiɛ «‑fɛfɛkʋ». nya 'wlinönröa? Dɛplɛɛ nyɔɔlɔ jrea' Nyɔsʋa nyra ɔnyɩ toroa' Nyɔsʋa plɛ kälä ‑pɩɔ 'doo 'wʋ le? 16Dɛplɛɛ Nyɔsʋaa nyuku nyra ‑wäsɩa kälä ‑pɩɔ 'doo 'wʋ le? 'Be 'amɔ#6.16 'amɔ: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: amɔ. bä 'Lɩbä Nyɔsʋaa nyuku ‑o. Nyɔsʋa nɩnɩa:
'Üa ‑tɔrʋpɩɔ 'nëmä kʋ, 'kä 'nyraa 'üün nya 'nyɛ;
'mɔɔ nëmä 'üa Nyɔsʋa bä, kä 'ünya 'na ‑glügbö bä # 6.16
Levitiikë 26.11-12
..
17'A 'ia ‑gʋ 'Pläkänyɔɔ 'daa:
'Ba sɔ 'üa ‑tɔrʋpɩɔ, 'ba nyra 'üün sɔsrɔgba.
'Anyɩ ‑fɛ dɛɛlɛ paa' ‑fre ‑gba, ‑bɛ 'mä 'amɩ 'lɩ 'kʋɛɛ.
18 'Nyaa 'ana Tʋ bäa, 'kä 'anya 'na nyɩbɛjü nyra 'na 'ŋlëkayörü bä.
'Nɩmrɛɛ 'Pläkänyɔɔ, 'ɔɔ ‑gba 'imɩ # 6.17-18
Esaii 52.11; Esekiɛɛlë 20.41; 2 Samiɛɛlë 7.14; Esaii 43.6..
Currently Selected:
2 Korɛɛntënyüü 6: Bakwé
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
