1 Korɛɛntënyüü ‑Pɔɔkʋa 'mlɩa wii
‑Pɔɔkʋa 'mlɩa wii
Korɛɛntë bä Akaiia ‑tʋtʋ ‑gälɩa bätë kpaküa ‑tɔrʋpɩɔa bätä kpakö, 'ää bä 'saarɩ Grɛɛsëa 'blɩ. 'Äa 'mlɩa nyüü 'kɔkɔmlɛ ma ‑pʋpʋa ‑wäsɩa ‑bɛ 'ü ma nö ‑sagbili Nyɔsʋa 'nyɩ 'bataa'. 'Pɔɔlë ‑fɛɛɛrɛ 'lɩ 'jrʋpa ‑sʋ 'doo ‑bɛ ‑söplü ‑uundoo, 'ɔnya nrörö 'lɩ 'cɛcɩ (Akëtë 18). Asiia ‑tʋtʋ ‑gälɩa bätälä 'ü 'daraa' Ɛfɛsë, 'ii 'Pɔɔlë bä kä 'ɔnya ‑jɩjra ‑pɔɔkʋlʋ kʋa' ‑pɩ. 'Ia 'taɩn 'lɩ bätälä ma 'na: 'mɩʋ ma sɔ ‑pɩɔa 'fɩɔ 'kä 'ii trara 'lɩ, 'perupanyüü ma ‑sümlö 'lɩ. Üma nöa' 'tutugbi 'ima ‑sümlö bɩa 'lɩ ‑beere bätä kpakü ‑mülüa 'mlɩ. Korɛɛntënyüülü ma toroa' Nyɔsʋa plɛ nya dɔrɔ 'ia ‑gbili 'wʋ. 'I 'pa 'Pɔɔlë bobokʋ ‑gba, 'ɔnya fa 'üün ‑pɔɔkʋ ‑moloo (1 Korɛɛntënyüü 5.9), 'ɔnya ‑gbala 'üün 'üü ‑bɛ 'ia nyüülü 'nyɩ 'cakla.
A jre bɩa 'saa Korɛɛntënyüüa nü ‑jɩjra 'ɔɔn 'wʋ. ‑Maa 'ü 'cɛrɛ wiili 'ɔ 'kpɩa käa' 'üün, 'ia 'pɛ kpaki ‑wälɩ. Nyüü ‑mölöö mi Korɛɛntënyüüa nʋnʋgbi 'Pɔɔlë 'klɩsrara, 'inyɩ 'nyakli 'lɩ ‑a 'nara. ‑Pɔɔkʋlʋ 'ü faa' 'ɔɔn nɩ, 'ɔnya 'sa 'üün ‑gälɩ, 'ɔnya 'pa 'üün ‑tɔɔ 'lɩ bɩa.
'Pɔɔlë 'pa 'üün ‑tɔɔ 'lɩ wii 'kɔkɔmlɛ ‑gälɩ; ibäa': 'cɛcɩa ‑tɩabölökʋ, 'tutudɛɛa nʋnʋkʋ, 'titiö, ‑gbɔsamlaa jijikʋ, Nyɔsʋaa jijrɛ, diili 'Nyüna ‑Susu ‑nyɛɛa', nyra 'kuaabrea sɔsɔkʋ.
'Pɔɔlë 'cie 'ɔa nyufa 'wʋ 'ɔnya ‑gbala 'üün wiili 'ɔ kä ɩa' 'ɔmäa' 'üün ‑gbala. 'Ɔnya ‑gbala 'sɩrɩ 'Kriisëa 'dari 'sɔɔa 'kplarakʋ 'ii 'mrɛɛ i ‑nyɩgla 'üa 'klä 'kä. 'Ɔnya ‑gbala bɩa 'üün ‑maa nyɔɔa ‑wawakʋ ‑si diia 'fɩɔ 'wʋ.
‑Pɔɔkʋa bɩarafa 'wʋ (16.1-24), 'Pɔɔlë nya ‑gbala 'üün 'sɩrɩ 'ɔmäa' 'üa ‑nyɛɛ ‑srörö ‑bɛ 'ɔmäa' diili 'ü 'babaa' 'klɩ Jerusalɛɛmëa 'pʋablanyüüa ‑gʋ 'wʋdɔrɔ; 'ɔnya cɛrɛ 'üün.
‑Jäsɩ ‑pɔɔkʋlʋ 'totroa' 'klɩ:
'Trɔrʋ 1.1-9
'Cɛcɩnyüü 'nyɩ ɩ kä ‑a kä 'ümä ɩ 'blara, 'ü ‑nëmä ɩ ‑tɩa ‑a 'bölö 1.10–4.21
‑Sagbili nyra 'blarʋlʋ Nyɔsʋa 'nyɩ 'bataa' 'i bäa' 'cɛcɩnyüüa ‑tɔrʋpɩɔ 5.1–6.20
'Titiöa wii 7.1-40
Nyɔsʋa nyɔɔ kä 'ɔmä ɩ ‑pʋpʋa, ‑maa ‑mää ‑wäsɩa ‑a 8.1–11.1
'Sɩrɩ 'cɛcɩnyüü kä ɩa' 'ümäa' nʋ 'cɛcʋ 'lɩ 11.2–14.40
Nyüüa 'kuaabrea sɔsɔkʋ 15.1-58
Dii 'kɔkɔmlɛa wii 16.1-24
Currently Selected:
1 Korɛɛntënyüü ‑Pɔɔkʋa 'mlɩa wii: Bakwé
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.