1 Korɛɛntënyüü 9

Wiili 'Pɔɔlë 'palaa' apotrëa 'pɛlɩ

1'Nyɩ 'lɩ ‑a bɩa ‑a nʋ dɛɛlɛ 'n ‑waa'? ‑Mää apotrë 'nyɩ bä? 'Nyɩ Jesu 'Kriisë#9.1 'Kriisë: ‑Taa waklöölä 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä. ana 'Pläkänyɔɔ ‑a 'jä? ‑Mää 'amɔ 'nyɩ 'Pläkänyɔɔa 'jrʋpalä 'n ‑fɛa', 'äa 'pɛɛ bä? 2‑Mölöö ma 'daa 'nyɩ apotrë ‑a bä nɩ, 'amɔlɔ nɩ, 'a jre 'iin 'sɩrɩ 'n bäa' apotrë. 'Be 'amɔ nyüü 'jä ‑bɛ 'ü jrea 'saa 'na apotrëa 'jrʋpa bä 'cɩcasa Nyɔsʋa 'lɩ.

3‑Jäsɩ 'n ‑gbalaa' nyüülü bʋblɔa' 'na 'nyrɩ: 4Anyɩ kä ‑a kä amä dɛɛji 'aiɛ amä 'mlaa? 5Anyɩ kä ‑a kä amä 'cɛcɩŋlʋʋ kä 'sɩrɩ apotrë ‑mölöö nöa' bɩa, 'sɩrɩ 'Pläkänyɔɔa ‑wlajü nyra Sefasë nöa'? 6'Aiɛ, 'mɔɔ ‑bɛ Banabasë 'nyɩ kä ‑a kä amä 'jrʋpa ‑fɛ? 7'Ba ‑gbala 'mɩ ‑a 'jä. Nyɔɔ 'plɛɛ ‑fɛɛɛ 'sʋgɩajrʋpa ‑bɛ ɔ 'pɛɛ 'ɔa nyufa le? Nyɔɔ 'plɛɛ pla tuu ‑bɛ 'ɔnyɩ ji 'ua 'bö le? ‑Ale nyɔɔlɔ 'nyɛrɛa' mlaa ‑gba 'nyɩ 'mla 'üa nyɩtɩnɩ ‑a?

8Wiili 'n 'paa' nɩ, nyüüa ‑dɔa 'doo 'uu 'paa 'imɩ, ‑ale Moisëa ‑dɔ 'nyɩ 'pa bɩa 'imɩ ‑a? 9‑Jäsɩ Moisëa ‑Dɔ ‑gbaa': «'Anyɩ kpasa breelɛ suöa' ‑bleeea 'jajua 'mä#9.9 Deteronɔɔmë 25.4..» 'Nɩnɩa nɩ, Nyɔsʋa 'paa ‑plɩɩ breea ‑gä? 10‑Mää ana ‑gʋ 'ɔnyɩ 'pa ‑plɩɩ 'imɩ? Ana ‑gʋ 'i ‑jɩjra; 'be nyɔɔlɔ plaa' nɩ, 'ɔmä ‑pɩ 'ia dɛɛ ji 'ia ‑gʋ 'ɔ pla. ‑Bɛ nyɔɔlɔ bɔtɔa' ‑bleee nɩ, 'ɔmä bɩa 'lɩ 'ɔa nɛ 'järä. 11Ama pla 'ana ‑tɔrʋpɩɔ 'Nyüna ‑Susua 'mʋfadii nɩ, ‑a 'jää wiili bʋbɔa' ama 'sa ‑taa 'plälä kʋa' ‑pɩa 'mlɩa dii le? 12Nyüü ‑mölöö ma tara 'amɩ ‑gälɩ nɩ, ‑mää amɔ ‑nëmä ɩ 'nɩmɩ 'amɩ ‑gälɩ tara? ‑Maa anyɩ ana ni ‑a 'bete. A ‑gölöa' nɩ, wiia 'fɩɔ a 'nyiereklɩ a ‑pɩ 'Kriisëa 'Mʋfagogoa 'nyʋfɔ kala. 13'Anyɩ 'saa ‑a jre ‑maa nyüülü ‑fɛɛɛrɛa' Nyɔsʋaanyüköli 'jrʋpa nɩ, Nyɔsʋaanyuku 'uu 'fini 'üün 'klɩ? Nyüülü ‑fɛɛɛrɛa' Nyɔsʋaa ‑gbɔsatöwlö ‑gba 'jrʋpa nɩ, ‑mää ‑gbɔsadiia 'mlɩ 'ünyɩ 'järä 'üa nɛ? 14'Asɩ 'Pläkänyɔɔ ‑gbala bɩa amɩ: nyüülü 'saaa' 'Mʋfagogo kä 'ümä 'äa 'mlɩ 'üa jijrɛ 'järä.

15‑Maa 'mɔɔlɔ nɩ, 'nyɩ 'ia dɛɛ 'dee ‑a nʋ, ‑bɛ 'nyɩ 'amɩ 'wʋ ‑a ‑jɩjra 'kä 'amä 'mɩ dɛɛ ‑nyɩ. 'I ‑siwʋ ‑a jä! ‑Yɛɛ, 'n bɔtɔ 'ia ‑tɔklʋ, nyɔɔ ‑nëmä 'mɩ ‑a 'cici 'ia 'pɛlɩ! 16Ama 'sa 'Mʋfagogo nɩ, ‑mää 'lɩgbagbakʋa ‑gʋ ‑a. 'I kpɛrɛ 'mä 'iin nʋ. ‑Gbʋʋ nya 'mɩ jräa ama 'nyɩ 'sa 'Mʋfagogo ‑a! 17'Na 'mlɔɔ ma 'daa ɩ ‑a ‑fɛ 'jrʋpalä nɩ, 'nyaa ɩ 'pɛrɛ ‑a. ‑Maa ‑mää 'na 'mʋgbɛ ‑a, Nyɔsʋa ‑nyɩ 'mɩ 'ään kälɩ. 18Dɛplɛɛ bä ‑plɩɩ 'na 'pɛɛ le? 'Iibä ‑a 'saralɩ nyüü 'Kriisëa 'Mʋfagogo 'flɛɛlɩ, 'kä 'nyɩ 'daa 'kpɔɔ 'ba ‑nyɩ 'mɩ dɛɛlɛ 'mʋfagogosanyɔɔ käa' 'ɔmäa' 'jä.

19‑Yɛɛ 'n 'mrɛɛ ‑a nʋ wiia 'fɩɔ, 'n nrörö 'na nyufa nyüüa 'fɩɔa ‑geei 'lɩ 'mä nyüü 'kɔkɔmlɛ 'jä. 20Ama bä juifëa ‑tɔrʋpɩɔ nɩ, juifëa 'sa 'n bä, juifënyüü 'mä 'Kriisë plɛtoro. Ama bä nyüülü 'nyɛɛa' Moisëa ‑Dɔ ‑gälɩa ‑tɔrʋpɩɔ nɩ, 'n ‑träärälɩ 'üa ‑dɔ#9.20 Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra ‑tɛklɩ: ‑bɛ 'inyɩ kpɛrɛ ‑a kpɛrɛ 'mä 'lɩ ‑dɔ ‑träärä., 'ümä 'Kriisë plɛtoro. 21Ama bä nyüülü 'nyɩa' Moisëa ‑Dɔ jrea ‑tɔrʋpɩɔ nɩ, 'nyraa 'üün kʋä ‑wälɩ ‑beere 'sɩrɩ 'nyɩa' 'uun jre, 'kä 'ümä 'Kriisë plɛtoro. 'Nyɩ 'daa 'nyɩ ‑träärälɩ Nyɔsʋaa ‑dɔ ‑a; 'be 'Kriisëa ‑dɔ 'n ‑träärälɩ ‑o. 22Nyüülü 'fʋmaa' a ‑tɔrʋpɩɔ 'n 'fʋma, 'mä 'fʋmanyüü 'jä. 'N nrörö 'na nyufa nyüüa 'fɩɔa 'sa, 'mä ‑gʋ 'lɩ 'doorodoo mlɩba. 23'Ia 'fɩɔlʋ nɩ, 'Mʋfagogoa ‑gʋ 'n nö 'imɩ, 'kä ana 'fɩɔ 'mä 'lɩmlɩ 'järä ‑pɩɔ 'doo 'wʋ.

24'Anyɩ 'saa ‑a jre nyüülü fɔlɔa' fɔlɔ ‑pɩɔ nɩ, 'üa 'fɩɔ mlörölɩ, ‑maa 'doo 'wʋ fa 'pɛpɛɛdɛɛ? 'Ii känyrɩ, 'ba fɔ 'amä 'pɛpɛɛdɛɛ fa! 25Fɔfɔnyüüa 'fɩɔ 'paa plɛ mlɩ wiia 'fɩɔ 'lɩ. 'Ü nöa' 'imɩ nɩ, 'ümä 'pɛpɛɛdɛɛlɛ 'nyɩ ‑wlɛa' 'lɩ fa, ‑maa amɔlɔ nɩ, a nö 'imɩ amä 'pɛpɛɛdɛɛlɛ ‑wɩaraa' fa. 26'Ii känyrɩ, 'nyɩ 'wlalɩkä 'nyɩ fɔfɔ ‑a; 'n 'paa ‑kɔtrë, ‑maa ‑mää 'flɛɛlɩ ‑a. 27'N 'suö 'na 'jajɛ 'wʋ, ‑bɛ 'n 'kplaa 'ɛɛn ‑beere ‑geeigbi. 'N nö 'imɩ 'sɩrɩ 'na 'mʋgbɛlɔ 'palaa' nyüü nyɔsʋaawii ‑gba, ‑pɩa' fʋfɔlʋa 'mlɩ sɔ.

Currently Selected:

1 Korɛɛntënyüü 9: Bakwé

Highlight

Copy