ኦሮመ 10
10
1ታ እሹን፥ ታ ኩን ዎዝናር ታ አሞትዛይኔ ጾሳ ዎስዛይ እስሬልታይ አቶድ ጋርከ። 2ኡንቲ ጾስስ ምጭንትዛዝን፥ ቱማ ኤረት ቦር ምጭንቶዛና ታ ማርካትዛ። 3ኡንቲ ጾስ ጽሎት ኦገ ኤራም እጺ፥ ፋ ኣዳ ጽሎት ካሌዛፕ አትን ጾስ ጽሎት ኮየካያ። 4አስ ኡባይ አማኖር ጽሎድ ጋርክ ክርስቶሳ ህገስ ፎሎ ማቄዛ።
አቶት ኡቢታይሲ
5ሙሰ አስ ህገ ናጊ ኤክዝ ጽሎትባዝ፥ «ህገ ናግዝ ኦንካ የ ህጋ ናጌዛይ ጋርክ ደኦ የዞዳ»#ለዊ. 18:5 ዬጌዛ። 6ዝን አማኖር ኤክዝ ጽሎት ባጋ ጊንትንቴዛይ Ꮊያ፦ «ነ ዎዝናር፥ ‹ኦኒ ሳሎ ከዞዴ?» ዬግፐ፤ የይ ክርስቶሳ ዎዳይስ።#ናምእ. 30:12-14 7ዎይ፥ «ሱለ ሳአ ኦሞ ዎዳይ ኦኖ?» ጊፐ፤ የይ ክርስቶሳ ዱፎፕ ከሶዳይስ። 8ዝን ዬጊ ጻፍንቴዝ፦ «ቃላይ ነ ካለ የዛ፤ ነ ዶና ጋንጨኔ ነ ዎዝና ጋንጨ የዛ» ኑኒ ይንትስ ኦድዝ አማኖ ቃላይ Ꮊያ።
9«የሱሳ ጎዳ» ግ ነ ዶናር ማርካትኮኔ ጾሳይ ኤዛ Ꮊይቆፕ ደንዛና ነ ዎዝናር አማንኮ፥ ነ አቶዳ። 10አሲ ፋ ዎዝናር አማኒ ጽልዛ፤ ፋ ዶናር ማርካቲ አትዛ። 11ማጻፋይ፥ «ኤዛ አማንዛ ኦንካ ዬላተና»#ኢሳ. 28:16 ዬጌዛ። 12ፐቲ ጾሳይ ኡቢታይ ጎዳ ማቄዝ ግሾስ አይሁድታይ ጋንጨኔ አይሁደ ባ አስ ጋንጨ ዱማት ባያ። ኤ ፋና ጼግዝ ኡባይስ ጋመ ኬሃ። 13ጎዳ ሱን ጼግዝ ኦንካ አቶዳ።
14የዝን፥ ኡንቲ አማነካ የዝታር ዋይዚ ኤዛ ጼጎዳይስ ዳንዳኤ? ኡ ኤባዝ ስኤካ የዝታር ዋይዚ ኤዛ አማኖዳይስ ዳንዳእኔ? ማ ኡንትስ ቃላ ኦድዝ አስ ባዝን፥ ዋይዚ ስኦዳይስ ዳንዳእኔ? 15ኪትንቴዝ አሲ ባዝን ቃላይ ዋይዚ ኦድንቶዳይስ ዳንዳኤ? ማጻፋይድ፥ «ኡፋይስ ዎንግለ ኦድዝ አስስ ቶክታይ ዋፋ ሎእነሻ»#ኢሳ. 52:7 ዬጊ ጻፍንቴዛ።
16ዝን ኢስያሳ፥ «ጎዳዮ፥ ኑ ማርካት ኦኒ አማኔኔ?»#ኢሳ. 53:1 ዬጌዛይ ጋርክ፥ ኡቢታይ ዎንግለ አማነካያ። 17የይ ግሾስ፥ አማናይ ስሳፕ ይእዛ፤ ስስ ክርስቶሳ ቃላፕ ይእዛ።
18ማቆዝን፥ ኡ ቃላ ስኤካ ጉሶኔ? ዋኣ ስኤዛ። ማጻፋይድ፥
«ኡ ኦዳይ ቢታ ኡባይል ስንቴዛ፥
ኡ ቃላይ ሳአ ጋጻ ሄሌዛ»#ማዝ. 19:4 ዬግንቴዛ። 19ዝን እስሬለ አሳይ ኤረካያ ጉሶኔ? ሙሰ ቲና፥
«ታኒ ይንታን ለቂንቴዝ አሳይ ጋንጨ ቂርሶዳ፤
ማ አካኮዋ አሳይ ጋንጨ ይንታን ይሎሶዳ»#ናምእ. 32:21
ዬጌዛ።
20ማ ኢስያሳ፥
«ታና ኮየካ አሳይስ ታ በንቴዛ፤
ታና ኦይጨካ አሳይስ ታ ታና ቤዜዛ»#ኢሳ. 65:1
ዬጊ ያሽተካዛር ኦዴዛ።
21ዝን ኢሳያሳ እስሬልታይ ባጋ ኦድታር፥
«ጋላስ ሙዳ ኪትንቶዋ አሳይስኔ
ታና እጽዛ አሳይስ ታ ኩሸ ሚጬዛ»#ኢሳ. 65:2
ዬጌዛ።
Currently Selected:
ኦሮመ 10: MeloNTEth
Highlight
Copy
Compare
Share
Want to have your highlights saved across all your devices? Sign up or sign in
The Word for the World Ethiopia
