Oroome 9

Isreelitay doorintto

1Taanii Kiristtoosar maaqqii turo odiza, worddotooya. Geeshsha Ayyanay kaalithiza ta kahay taanii worddotoozana taas markkattiza. 2Ta wozinar Isra7eelitayis gaame qofarannee duuxoowa un7ara qamma gallas ta qoppiza. 3Taanii, taas ashor dabo maaqqeez ta ishitay gishos Kiristtoosapp shaakinttii Xooss baadith gancce yezeezako dosizazin. 4Unttii Isra7eelita, Xoossay unttan fa na7ita udeeza, fa bonchcha unttis qoncce odeeza. Unttar caaqqeeza; higge unttis inggeeza. U Xoossa goynnod tuma oga beezeeza; Xoossay ufayis qaala unttis inggeeza.#Kes. 4:22 5U yeletithayid mayzitay kochch; ma Kiristtoosa ashor kochche maaqqii ye7eeza. Ubbaypp aadho maaqqeez Xoossay medhinas galatintto. Amin7e!

6Maaqqozin, Xoossa qaalay polinttekka atteeza guus baaya. Isra7eelepp yelintteez as ubbitay Isra7eele baaya. 7Ma Afraame zare ubbitay Afraame na7ita baaya. Xoossay Afraames, «Ne sheeshay Isaaqa baggar xeeginttoda» yeegeeza.#Medhe. 21:12 8Yeya guussay ashor yelintteez na7itay ubbitay Xooss na7ita baaya. Zin tuma Isra7eele na7itay Xoossay geleez qaalay garkk yelintteez na7ita.#Medhe. 21:12 9Inggoda gi geleez qaalay, «Taanii layth wode yhannode ye7oda; Saarakka dhiirathi na7a yeloda»#Medhe. 18:10 yeegintteezanno.

10Yey aadda baazin Irbiqa ma pettii nu ada Isaaqar aqi wodexeez wode. 11Mentte na7itay yelinttodaypp woy iita woy lo77o udekkazin xeegizaypp attin oosopp baazin dooro Xooss qofay miinggoday garkke 12«Bayray geedayis haarinttoda» yeegii Goday iis odeeza.#Medhe. 25:23 13Yeykka Geeshsha Maxaafayid, «Yayqqooba dosii, Eesawe ta ixxeeza»#Mil. 1:2 ginttinttii xaafintteeza.

14Yeezin, nuunii waagodee? Xoossay ase asapp qurinee? Xoossii quriza godayiss nu danda7ooya! 15Goday Museko,

«Ta maarodayis koyeezitana maaroda;

ta qadhinttodayis koyizayis qadhinttoda»#Kes. 33:19 yeegeeza. 16Yikkee, Xooss dooro as shener woy as oosor baazin e maarotithayira.

17Geesha Maxaafayid, Gibxxe kaatayiko, «Taanii, ta wolqqa neell beezodaysinnee ta sunthay alame ubbayil erinttod garkk yeyis nena kawutiseeza»#Kes. 9:16 ginttinttii xaafintteeza. 18Yikkee, Xoossay maarodayis koyizana maariza; wozina muumisodayis koyizay wozina muumisiza.

Xooss kachchinnee maarotith

19Yinttipp pettay, «Yeezin, Xoossay as abis boree? Xooss ixxizay oonoo?» yeegii oycodayis danda7iza.

20Zin neno aso, Xoossar palamodayis ne oonoo? Ooso fana ootheezayiko, «Tana yhay garkk udii abis ootheenee?»#Isa. 29:16; 45:9 gi oycodayis danda7inee? 21Woy urqqa medhdheezay pettii urqqapp petta bonchcho miishe, yhankka ma tooshe miishe udii medhdhodayis mawute baasannee?

22Xoossay fa seera beezodayisinnee fa wolqqa ersodayis koy dhabos giigsseez seera miishshita gaame garzhor danda7eezako ab eree? 23E yeya ootheezay damma bonchos giigiseez, fa dooreez na7itayis fa bonchcha ersodayisii. 24Ayihude maaqqin, woy Ayihude baa as ubbita Xoossii dooreeza.

25Nabe Hosa7e maxaafay gancce,

«Ta woya baazitakka, ‹Ta woya› gi xeegoda.

Dosinttekka woyitakka, ‹dosintteezita› gi xeegoda.#Hosa. 2:23

26Unttii ‹Ta woya baaya› ginttinttii xeegintteez aqayid,

‹De7o Xooss na7ita› ginttinttii xeeginttoda»#Hosa. 1:10 yeegeeza.

27Nabe Isiyaasa Isreele as baz,

«Isreele as abba shafe garkk gaanggikokka,

unttapp xiqqa as aadda attoda.#Isa. 10:22-23

28Goday biitta ubbayil afa ellis murttii ukker yhaya udoda.» 29Maakka Isiyaasa,

«Ubbapp Wolqqama Goday nuus xiqqa zerith ashshekkazako,

nuunii Soodomannee Gamoora katama garkk dhabodazin»#Isa. 1:9

yeegii tiinattii odeeza.

30Yeezin, nu waagodee? Xillotith koyibe7ekka Ayihude baa asay ammanor xillotithi denggeeza. 31Zin xillotithayiko helthiz higge yeza Isreele asay xillotithi denggekkaya. 32Abis denggekkasa? Unttii xillotith ammanor baazin oosor ekkodayis kozheez gishos. Yey gishos, unttii, «Dhubbiza shuchchar» dhubintteeza. 33Maxaafayid,

«Bo7oytta taanii Xiyone dhube shuchchinnee fokkisiz zaalla gaddoda.

Eza ammaniza oonkka yeellatenna»#Isa. 28:16

ginttinttii xaafintteeza.

Currently Selected:

Oroome 9: MeloNTL

Highlight

Copy

Compare