Oroome 3

Ayihuditay ammano ixo

1Yeezin, Ayihudetithii ab maadee yenee? Woy dookalintto ab maadee yenee? 2Tuma Ayihude maaqqithay gaame oger maaddiza. Ubbapp tiin Xoossay fa qaala hadara Ayihuditayis inggeeza.

3Yeezin, unttapp pettay pettay qaala ammanaam ixxiko, u ixay Xooss geeshshetitha kayinenee? 4Kayooya! As ubbay worddo maaqqikokka Xoossay tuma maaqqo. Geeshsha Maxaafayid,

«Neqaalayir ne xilloda;

nena mootizana pirddar laththoda»

ginttinttii xaafintteeza.#Maz. 51:4

5Yeezin, nu worzhay Xoossay geeshsha maaqqizana beeziza baz maaqqiko, nu waagodee? Xoossay nu nagara gishos nuul afa pirddiko, luulo baasanee? Yhaya taanii as qofa garkk giza. 6Yeya baaya. Yey garkk haniko, Xoossii yha alamayil afa wayizii pirddode?

7Zin ta worddotithay Xooss tuma qoncisii, e bonchcha dammisii beeziza baz maaqqiko, yeezin, abis taal afa nagaranchcho garkk pirddinee? 8Pettii pettii asay, «Lo77o baz ye ye7od garkk iita oothiza» yeegii tamaarssizay garkk udii tana mootiza. Yey garkk asal yi7iza Xooss pirdday beezizaya.

Xillo pettakka Baaya

9Yeezin, nuunii waagodee? Nu aathonee? Yeya baaya! Ayihude maaqqin, Grike maaqqin ubbitay nagara oommo yezana taanii tiinatii yinttis odeeza.

10Geeshsha Maxaafayid,

«Xillo as pettakka baaya.#Maz. 14:1-3; 53:1-3

11Akakiza as baaya,

Xooss koyiz oonkka baaya.

12Ubbitay balintteeza pettippe adoozita maaqqeeza haayotith oothizay baaya.

Pettii askka baaya.

13U doonay dooyintteez duufo,

fa iranthayir dooshshiza.

U doonaypp,

shooshii marze keziza.#Maz. 5:9; 140:3

14U doonayid camo odannee baadithii kumeeza.#Maz. 10:7

15U tokay suuth laalodayis ellisiza.#Isa. 59:7-8

16U ogayid dhabonnee daburssii yeza.

17Unttii sarotith oge erooya.

18Fa yessayid Xoossis yashittooya»

ginttinttii xaafintteeza.#Maz. 36:1

19As ubba doona aythodayisnnee alama muumer Xooss pirddepp oommor shiishodayis, higge inggintteezay higgepp oommo aqizitayis maaqqeezana nu eriza. 20Yey gishos, oonkka higges kiitinttii Xooss tiina xillodayis danda7ooya. Higge as ubbitay nagaranchcho maaqqeezana beeziza.#Maz. 143:2; Gal. 2:16

Xillotithi ammanora

21Zin yhatti higgennee nabitay markatteez Xooss xillotithay higge baazin qoncceeza. 22Yha xillotitha, Xooss Yesuus Kiristtoosa ammano baggar as ubbas shaako baazin inggiza.

23Asii ubbay nagara ootheeza; Xoossii unttis inggeez bonchchaypp facceza. 24Zin unttii Xooss aadho keehatithar, woziza Kiristtoos Yesuusa baggar cer xilleeza. 25Xoossa Yesuus Kiristtoosa yarshsho udii inggeezay, eza ammaniza ubbitay e suuthayir nagara maarotith demmad garkke. Xoossay yeya ootheezay fa danda7ayir tiina nagara taybekka ashshii, fa xillotithi beezodayis. 26Yha wodayid Yesuusa ammaniza ubba xillisor, Xoossay fa ubbas xillo maaqqeezana beeziza.

27Yeezin, nu ceeqinttay aba yenee? Yeykka atteeza. Nuunii ceeqinttizay higges kiitinttiza gishonnee? Wa77a! Ammano higgerapp attin. 28Xoossii as xillisizay ammanorapp attin higge naagor baazana nu eriza.

29Woy Xoossay Ayihuditayis aadda Xoossonee? Ayihude baazitayis Xooss baasannee? Tuma, Ayihude baazitayiskka E Xoosse. 30Xooss petto; Ayihuditannee Ayihude baazitayissikka ammanor xillisizay eza.#Nam7i. 6:4; Gal. 3:20 31Yeezin, nuunii higge ammano gishos shaaroda guussonnee? Yeya baaya! Higge minthodaypp attin.

Currently Selected:

Oroome 3: MeloNTL

Highlight

Copy

Compare