Ibraawe 10

1Muse higgay ye7odayis yez lo77o bazitayis eeshopp attin gamma baaya. Yeyi gishos, laytha laytha pace bayth yarshshinttiz yarshshay goynnodayis shiiqiza asay folo oothoayis danda7ooya. 2Higge unttan folo oothoayis danda7eezako unttii yarshsho yarshshiza ashshodazin. Ma goynnodayis shiiqiza asay fa nagaraypp geezhoda; u kahaykka unttan bala gi mootaamii. 3Zini ye yarshshitay laytha laytha nagara qofisiza. 4Abis giiko, wofaano suuthinnee deesh suuthii nagara kayodayis danda7ooya.

5Yeyi gishos, Kiristtoosa yha alame ye7eez wode yhay garkk yeegeeza:

«Neenii yarshshonnee imo koyekkaya;

zin taas asho giigiseeza.#Maz. 40:6-8

6Neenii xuuginttiz yarshshayidannee

nagara yarshshayid ufayttekkaya.

7Ye wode ‹Ta gishos maxaafayid xaafintteezay garkk,

Godayyo, taanii ne shene oothodayis ye7eeza› yeegeeza.»

8Yarshsho yarshshinttoday garkk higge kiittizabaz maaqqikokka, Kiristtoosa tiina, «Neenii yarshshonnee muxaata, xuuginttiz yarshshonnee nagara yarshsho koyekkaya; unttal ufayttekkaya» yeegeeza. 9Kaallikka E, «Godayyo, yeezako taanii ne shene oothodayis ye7eeza» yeegeeza. Yeyi gishos, Kiristtoosa nam7antho essodayis tiinaasa shaareeza. 10Yesuus Kiristtoosa Xooss shene udii, lamamayis pettii toke fa asho yarshsheez gishos nuunii geezheeza.

11Qeese ubbay, nagara dhabisodayis danda7oday ye yarshshita gallas gallas yarshshittar eqqii fa oosa oothiza.#Kes. 29:38 12Zini Kiristtoosa medhinas maaqqeez pettii nagara yarshsho yarshsheez, Xoossaypp ushachch bagga betteeza.#Maz. 110:1 13Ye wodaypp ayikkii e morkkitay e tokayis yedhdhizibaz udod hellodayis naagiza. 14E pettii toke fana yarshsheez yarshshayid geeshshita medhinas folo udeeza.

15Ma Geeshsha Ayyanay nuus yhay markkattiza. Tiina yhaygarkk yeegeeza:

16«Ye gallasitaypp guye,

taanii unttar caaqqiza caaqay yhaya:

Taanii ta higga u kahayid gaddoda;

u wozinayid xaafoda»

yeegiza.#Erim. 31:33 17Kaallikka,

«Taanii u nagarannee

u iita oosa mahii qoppaamii»

yeegiza.#Erim. 31:34 18Yikkee, nagara atto ginttintteezaypp guye nagaras yarshshinttiza yarshshay koshshooya.

Xoossiko shiiqoda

19Yikkee, ta ishuntho, nuunii Yesuusa suuth baggar Ubbapp Geeshsha aqo gelodayis nuus ammanthizabaz denggeeza. 20Nu gelodana Kiristtoosa fa magarazha, yeykka fa asho baggar nuus dooyeez orothinnee de7o maaqqeez ogayra. 21Nuus Xooss Karal afa shuumintteez gita qeese yeza. 22Nuunii iita kahaypp geezhodayis nu wozina wurxinttii, nu asetitha xillo haathar meecinttii, luule wozinarannee folo ammanor Xoossiko shiiqoda.#Lewii. 8:30; Iziqe. 36:25

23Nuus ufayis qaala inggeez Xoossay ammanintteezay gishos nu markkattiz ufayssa ushachch haddirss geekka miinthii aykkoda. 24Pettay petta siiqorannee lo77o oosor nu wayizii barkk yezodayis beezizako qoppiso. 25Pettay pettay kasee shiiqiza shiiqa ashshekazay garkk nuunii pettipp shiiq zorinttizana ashshaamii. Maaqqikka Goda gallasay ukkeezaya yi bi7iza gishos yeya kaseesaypp aathii oothoytta.

26Nuunii tuma eratith ekkeezaypp guye erittar nagara oothiko, yikkepp nu nagara gishos yarshshinttod yarshshay baaya. 27Yikkee atteezay yashshiz pirddannee Xooss morkkita xuuggodayis maaqqeez wolqqama tama.#Isa. 26:11 28Muse higga kiitinttaam ixxeez oonkka nam77ii woy hayidzii as ezal afa markkatiko maarotith bayth yhayqqiza.#Nam7i. 17:6; 19:15 29Yeezin, Xooss Na7a kadheez athay, fana geeshsheez Xooss qaala caaqo suutha tuna baz garkk qoppeez athay, ma aadho keehatith Ayyana cazheez athay, ab garkk iita pirdda ekkodayis beezizako ane qoppoytta.#Kes. 24:6-8

30Yikkee, «Kushe keso tabaz, ta kushe kessoda» geeza nu eriza. Maakka, «Goday fa asay pirddoda» yeegeeza.#Nam7i. 32:35, 36 31De7o Xooss kushe pokkithii iita yashshiza.

32Yinttis Xooss poo7o poo7eezaypp guye yi gaame waayer, gita buter garzheez binii wode qoppoytta. 33Pettii pettii toke yi as tiina cazhintteeza; bayi7intteeza; pettii pettii toke yeya garkk waaye helleez asayir pettipp waayeeza. 34Aadhoowannee ubba wode yeziz miishe yinttis salo yezana ereezaygishos achcha yez asayis ta qadhdheeza, yi shalay ekinttodarakka danda7ar yeya yi ufayisar ekkeeza. 35Gita woytto yeza gishos yi goobetitha olippate. 36Xooss shene oothii yinttis inggintteez ufayis qaala yi demmad garkk yibbatii naagodayis koshshiza. 37Haga xiqqa wode yeza, «ye7odayis yezay ye7oda gam7enna. 38Geeshsha asii ammanor yeziza, guye soli7iko ta shemppata ezal ufayttooya.»#Inba. 2:3-4 39Nuna maaqqiko fa shemppo ashshodayis ammaniza asayir yezapp attin dhabos guye soli7iz asayir baaya.

Currently Selected:

Ibraawe 10: MeloNTL

Highlight

Copy

Compare