Antelna 26
26
Israel ngāi Antelna Voi Annina
1Ripui suona hintin hin a nī na, Zehova'n Mōsi lē Eliazar, chāizūng Aron a nāipasal chu a chongpui a. 2#Ant 30:11-16Amā'n, “Israel nāi mipui ngāi dōra kum 20 nātā achunglam, a pā insūngkuo ang chipa, Israel a rālkāpa a sē thei ngāi dōra chu tel ro,” a tī na. 3#Zos 13:32Hankēng Mōsi lē chāizūng Eliazar-in amāni chu Zeriko varāla, Zordan tidung matapa, Moab phāizōla a chongpui u na, 4#Atl 1:1“Zehova'n Mōsi lē Āigupta ram ātā a hong āsuok Israel nāi ngāi chong ei pēk anga, kum 20 nātā achunglam mipui ngāi dōra chu tel u ro,” a ti u na.
Ruben Pānchi Ngāi
5 #
Aph 46:9; Ant 6:14 Ruben, Israel a nāirapā a ni. Ruben a nāi ngāi chu: Hanōk ātā Hanōk mi ngāi; Palu nātā Palu mi ngāi; 6#1Kh 5:3Hezron ātā Hezron mi ngāi; Karmi nātā Karmi pānchi ngāi a ni. 7Hiva ngāi hi Ruben mi ngāi insūngkuo a ni. Amāni kāra antel dōra chu 43,730 a ni.
8Palu a nāipasal chu Eliab a ni. 9Eliab a nāipasal ngāi chu: Nemuel, Dathan lē Abiram a ni. Hiva Dathan lē Abiram ngāi hi Zehova a dui u lāia, Kora mi ngāi le han Mōsi lē Aron ngāi āduipū mipui palāi ngāi ha a ni u na. 10#Ant 3:12; 15:12; Atl 16:31-35; 1Ko 10:6Hiva mi ngāi a thi u lāi han, philin a bāi a malong a, amāni chu Kora le han ā vol a. Moiin mī 250 a hāl a, amāni ngāi ha sinsiana a hong āchang u na. 11#Ant 6:24; 2Rē 14:6; 1Kh 6:22-23; Izk 18:20Tenchu Kora a nāi ngāi chu thi u mak a.
Simeon Pānchi Ngāi
12 #
Aph 46:10; Ant 6:15; 1Kh 4:24 Simeon a nāipasal ngāi chu, a insūngkuo u ang chipa: Nemuel ātā Nemuel mi ngāi insūngkuo; Zamin ātā Zamin mi ngāi insūngkuo; Zakin ātā Zakin mi ngāi insūngkuo; 13#Aph 46:10Zera nātā Zera mi ngāi insūngkuo; Shaul ātā Shaul mi ngāi insūngkuo a ni. 14Hiva ngāi hi Simeon mi ngāi insūngkuo ngāi a ni: 22,200 a ni.
Gad Pānchi Ngāi
15 #
Aph 46:16
Gad a nāipasal ngāi chu, a insūngkuo u ang chipa: Zefon ātā Zefon mi ngāi insūngkuo; Hagi nātā Hagi mi ngāi insūngkuo; Suni nātā Suni mi ngāi insūngkuo; 16Ozni nātā Ozni mi ngāi insūngkuo; Eri nātā Eri mi ngāi insūngkuo; 17Arod ātā Arod mi ngāi insūngkuo; Areli nātā Areli mi ngāi insūngkuo a ni. 18#Aph 30:11; Zos 13:24-28A insūngkuo u ang chipa Gad a nāipasal ngāi antel suo ngāi chu 40,500 a ni.
Zuda Pānchi Ngāi
19 #
Aph 38:2-10; 46:12; 1Kh 2:3-5 Zuda a nāipasal ngāi chu Er lē Onan a ni. Er lē Onan chu Kanān rama a thi u na. 20#Aph 38:5, 29; Zos 7:17Zuda a nāipasal ngāi chu, a insūngkuo u ang chipa: Shela nātā Shela mi ngāi insūngkuo; Perez ātā Perez mi ngāi insūngkuo; Zera nātā Zera mi ngāi insūngkuo a ni. 21#Aph 38:29; Rūt 4:19Perez a nāipasal ngāi chu: Hezron ātā Hezron mi ngāi insūngkuo; Hamul ātā Hamul mi ngāi insūngkuo. 22Hiva ngāi hi Zuda insūngkuo ngāi a ni. Amāni kāra antel dōra chu 76,500 a ni.
Isakhar Pānchi Ngāi
23 #
Aph 46:13
Isakhar a nāipasal ngāi chu, a insūngkuo u ang chipa: Tola nātā Tola mi ngāi insūngkuo; Pua nātā Pua mi ngāi insūngkuo; 24Zasub ātā Zasub mi ngāi insūngkuo; Simron ātā Simron mi ngāi insūngkuo a ni. 25#Aph 30:18Hiva ngāi hi Isakhar mi ngāi insūngkuo a ni. Amāni kāra antel dōra chu 64,300 a ni.
Zebulun Pānchi Ngāi
26 #
Aph 46:14
Zebulun a nāipasal ngāi chu, a insūngkuo u ang chipa: Sered ātā Sered mi ngāi insūngkuo; Elon ātā Elon mi ngāi insūngkuo; Zalel ātā Zalel mi ngāi insūngkuo a ni. 27#Aph 30:20Hiva ngāi hi Zebulun mi ngāi insūngkuo a ni. Amāni kāra antel dōra chu 60,500 a ni.
Menase Pānchi Ngāi
28 #
Aph 41:52; 46:20; Dān 33:16 Zosef a nāipasal ngāi chu, a insūngkuo u ang chipa: Menase lē Efraim.
29 #
Aph 50:23; Rui 11:1 Menase a nāipasal ngāi chu: Makir ātā Makir mi ngāi insūngkuo; Makir-in Giliad a nei a. Giliad ātā Giliad mi ngāi insūngkuo a ni. 30#Zos 17:2; Rui 6:11; 1Kh 7:14, 17Hiva hi Giliad a nāipasal ngāi a ni: Iezer ātā Iezer mi ngāi insūngkuo; Helek ātā Helek mi ngāi insūngkuo; 31Asriel ātā Asriel mi ngāi insūngkuo; Sekem ātā Sekem mi ngāi insūngkuo; 32Semida nātā Semida mi ngāi insūngkuo; Hefer ātā Hefer mi ngāi insūngkuo a ni. 33#Zos 17:3; 1Kh 7:15Hefer a nāipasal Zelofehad-in nāipasal nei mak a, tenchu nāinupang a nei a. Zelofehad a nāinupang ngāi raming chu: Makla, Noa, Hogla, Milka lē Tirza a ni. 34Hiva hi Menase insūngkuo ngāi a ni. A kār una āntel ngāi dōra chu 52,700 a ni.
Efraim Pānchi Ngāi
35 #
1Kh 7:20
Efraim a nāipasal ngāi chu, a insūngkuo u ang chipa: Suthela nātā Suthela mi ngāi insūngkuo; Beker ātā Beker mi ngāi insūngkuo; Tahan ātā Tahan mi ngāi insūngkuo a ni. 36Hiva hi Suthela a nāipasal ngāi a ni: Eran ātā Eran mi ngāi insūngkuo. 37Hiva ngāi hi Efraim mi ngāi insūngkuo a ni. Amāni kāra antel dōra chu 32,500 a ni.
A insūngkuo u ang chipa, hiva ngāi hi Zosef a nāipasal ngāi chu a ni.
Benzamin Pānchi Ngāi
38 #
Aph 46:21; 1Kh 8:40 Benzamin a nāipasal ngāi chu, insūngkuo u ang chipa: Bela nātā Bela mi ngāi insūngkuo; Asbel ātā Asbel mi ngāi insūngkuo; Ahiram ātā Ahiram mi ngāi insūngkuo; 39#1Kh 7:12; 8:5Sufam ātā Sufam mi ngāi insūngkuo; Hufam ātā Hufam mi ngāi insūngkuo a ni. 40#Aph 46:21Bela a nāipasal ngāi chu: Ard lē Naāman. Ard ātā Ard mi ngāi insūngkuo; Naāman ātā Naāman mi ngāi insūngkuo a ni. 41Hiva hi Benzamin insūngkuo ngāi a ni. A kār una āntel ngāi dōra chu 45,600 a ni.
Dan Pānchi Ngāi
42 #
Aph 46:23; Rui 18:19 Dan a nāipasal ngāi chu, a insūngkuo u ang chipa: Suham ātā Suham mi ngāi insūngkuo a ni. A insūngkuo u ang chipa hiva hi Dan a insūngkuo ngāi chu a ni. 43Suham mi ngāi insūngkuo dōra, amāni kāra antel dōra chu 64,400 a ni.
Aser Pānchi Ngāi
44 #
Aph 46:17; 1Kh 7:30-31 Aser a nāipasal ngāi chu, a insūngkuo u ang chipa: Imna nātā Imna mi ngāi insūngkuo; Isvi nātā Isvi mi ngāi insūngkuo; Beria nātā Beria mi ngāi insūngkuo a ni. 45Beria a nāipasal ngāi ātā: Heber ātā Heber mi ngāi insūngkuo; Malkiel ātā Malkiel mi ngāi insūngkuo a ni. 46Aser a nāinupang raming chu Sera a ni. 47Hiva ngāi hi Aser mi ngāi insūngkuo a ni. Amāni kāra antel dōra chu 53,400 a ni.
Naftali Pānchi Ngāi
48 #
Aph 46:24; 1Kh 7:13 Naftali a nāipasal ngāi chu, insūngkuo u ang chipa: Zazil ātā Zazil mi ngāi insūngkuo; Guni nātā Guni mi ngāi insūngkuo; 49Zezer ātā Zezer mi ngāi insūngkuo; Silem ātā Silem mi ngāi insūngkuo a ni. 50Hiva hi Naftali insūngkuo ngāi a ni. A kār una āntel ngāi dōra chu 45,400 a ni.
51 #
Ant 12:37
Israel nāi ngāi kāra antela om ngāi dōra chu 6,01,730 a ni.
52Hatuka Zehova'n Mōsi a chongpui a, 53#Zos 11:23; 14:1; Sām 105:44“A raming u ei āntel ang chipa, hiva ram hi ei luo u rang sem tānla. 54Nam alian ngāi chu ram alian pēk tānla, nam asin ngāi chu ram asīn pēk ro. A kār una antela ei om u anga a miluvoma ram chu anpēka om rase. 55#Lev 16:8; Zos 11:23; 14:2Tenchu ram chu rāvān ena ansem rase. A pā u ngāi nam raming anput chipa ram chu luo u'n tia. 56A ram chu ātam lē ātōm, ravānenna le han ansema om rase,” a tī na.
Levi Pānchi Ngāi
57 #
Aph 46:11; Ant 6:16-19; 1Kh 6:1, 16 Levi mi ngāi kāra a insūngkuo u ang chipa antela om ngāi chu: Gerson ātā Gerson mi ngāi insūngkuo; Kohat ātā Kohat mi ngāi insūngkuo; Merari nātā Merari mi ngāi insūngkuo a ni.
58 #
Ant 6:20
Hiva hi Levi mi ngāi insūngkuo a ni: Libni mi ngāi insūngkuo; Hebron mi ngāi insūngkuo; Mahali mi ngāi insūngkuo; Musi mi ngāi insūngkuo; Kora mi ngāi insūngkuo. Kohat-in Amram a nei a. 59#Ant 2:1-2; 6:20Amram a thāinū raming chu Zokebed, Levi a nāinupang a ni. Ama chu Levi ranga Āigupta rama anzir a ni. Amā'n Amram ranga Mōsi, Aron lē a sarnū u Miriam a nei a. 60#Ant 6:23Aron a ranga Nadab, Abihu, Eliazar lē Ithamar anzir a. 61#Lev 10:1-2; 1Kh 24:2Nadab lē Abihu chu moi anthianglui Zehova matona a dar u lāi han a thi u na.
62Pasal tha khat ātā achunglam, a kār una antela om ngāi dōra chu 23,000 a ni. Israel nāi ngāi kāra dōngluo amāni kōma ei ānpēk nōk sika, Israel mi ngāi kāra chu antela om u mak a.
63Mōsi lē chāizūng Eliazar-in ei tel ngāi chu hiva ngāi hi a ni u. Amānī'n Israel nāi ngāi chu Moab phāizōla, Zordan tidung kōla, Zeriko varāla ei tel u ngāi chu a ni. 64#Dān 2:14-15Tenchu Mōsi lē chāizūng Aron-in Sinai mibuirama Israel nāi ngāi ei tel u ngāi bila mī tūtē hiva ngāi bila hin om u mak a. 65#1Ko 10:5Asik chu Zehova'n a kōm u na, “Amāni chu mibuirama ei thi ngēt u rang,” a lei tī a ni. Hasikhan Zefune a nāipasal Kaleb lē, Nun a nāipasal Zosua rong nōk chu angkhat ngal ānniang om mak a.
Bible in Ranglong, © Bibles International, the Bible society of Baptist Mid-Missions, 2024.