Mathāi 27
27
Isuo Pilat a Kōma Anbetōk
1 #
Mk 15:1; Lk 22:66 Zīng khuovār le chāizūng ulian ngāi lē mipui kāra pātar ngāi dōrā'n, Isuo thatna ranga anril u na. 2#Mk 15:1; Lk 13:1; Kui 3:13; 1Ti 6:13Ama chu a khit u na, ramoppū Pontia Pilat kōma a ruoi u na, a va betōk u na.
Iskariot Zuda a ninga Ōkrī Kāi
Kui 1:18-19
3Zuda, ama ānsūrpū'n, Isuo chu āsia a manlō u zei tī ariata ansīr sabak a, sumrū 30 chu chāizūng ulian ngāi lē pātar ngāi kōma a va makhīr rēt a, 4“Masialabui thisen kei na betōk u hi āsia a thō kēng kā ni zei,” a va tī na. Tenchu amānī'n, “Hava chu koini ranga hong mo a ni zei? Hava chu nang kēng āriat,” a ti u na. 5#Lk 1:9, 21; Kui 1:18Amā'n sumrū chu tempula a dēng rak a, a suok a, hatuka a sē na, ōkrī anthōi a, a thī na. 6Tenchu chāizūng ulian ngāiin hava sumrū chu a lāk u na, “Hiva sum hi nuompēk koka āsiak hi anthiang mak, asik chu hiva hi thisen man kēng,” a ti u na. 7Hatuka amāni chu anril antāi u na, hava sum le han khuol phūmna rang, bēlbuokpū ram chu a rachōk u na. 8#Kui 1:19Hasikhan, hava mun chu avian tenpei, Thisen Mun, ei ānti. 9Hantin han deari Zeremia'n, “Amānī'n sumrū 30 chu a lāk u na, ama a man ranga āntet, Israel nāi ngāiin ei tet u man chu, 10Zehova'n chong ei na pēk anga, bēlbuokpū rama man ranga a pēk u na,” (Zer 32:6-9; Zek 11:12-13) tīna a lei ril chong chu ei hong kip a ni.
Pilat a Matona Isuo
Mk 15:2-5; Lk 23:2-7; 17-32; Zn 18:28-19:1
11Isuo chu ramoppū matona ānding a. Ramoppū'n a kōma, “Zehudi mi ngāi rēng mo nā ni?” tīna a rakel a. Isuo'n a masang a, “Nangin nei tī anga a ni,” a tī na. 12#Mk 14:61Chāizūng ulian ngāi lē Zehudi pātar ngāiin āsia a mantung u nā'm, amā'n ītē masang mak a. 13Hasikhan Pilat-in a kōma, “Na chunga āsiat ei ril u ngāi so riat mak che mo?” a tī na. 14#Mk 14:61Tenchu amā'n bāikhattē ngal masang mak a, hasikhan ramoppū chu a boi a dong sabak a.
Mipuiin Barabba ā Thang
Mk 15:6-15; Lk 23:13-25; Zn 18:39-19:16
15 #
Zn 18:39
Ramoppū'n namdān anga pānta nikhuona, ānkhum khat hi mipuiin ei zōt tak ei mazōk chachak a ni. 16Hava lāi han Barabba tīna misalui raming anthang khat ānkhum a dōn u na. 17Hasikhan, amāni chu anbūm kiar suo u le, Pilat-in, “Tū mo kei na mazōkpē u rang nei zōt u? Barabba mo ole Isuo, Khristā ei ti u chu?” a tī na. 18Khāmaret sika ama chu ei betōk u kēng tī hi a riat a. 19#Aph 20:6; Atl 12:6; Zōb 33:14-16; Zn 19:13Pilat chu ruirilna sutmuna ansut lāi han, a thāinū'n, “Hiva midik chunga ītē thō nō ro. Avian hin ama sika ka ramanga antakna tampā ka tiar a,” tīna chong a bē na. 20#Kui 3:14Tenchu chāizūng ulian ngāi lē Zuda pātar ngāiin Barabba a zong a, Isuo āthat ranga mipui chu a manthor u na. 21Ramoppū'n a kōm u na, “Hiva anni ngāi bila hova pū mo kei na mazōkpē u ranga nei zōt u?” tīna a rakel a. Amānī'n, “Barabba!” a ti u na. 22Tenchu Pilat-in amāni kōma, “Hanle Isuo, Khristā ei ti u hile, hong mo kei lōt rang?” a tī na. Alom u na, “Ama chu khrōsa tār ro,” a ti u na. 23Ramoppū'n, “Ichanga mo? Hong masial mo ei thō?” a tī na. Tenchu amānī'n, “Ama chu khrōsa tār ro,” tīna ankhēk riam u na.
24 #
Dān 21:6-8; Sām 26:6 Pilat-in ītē thō thei lāi mak a, anbuoina lian kēng ei suok tir tī a riat le chu, tī a lāk a, mipui matona a kut a rasūk a, “Koi chu hiva midik thisena kā'n thiang. Nangni kēng ariat nā ni u,” a tī na. 25#Zos 2:19; Kui 5:28Mipui dōrā'n, “Ama thisen chu koini na chunga lē koini na nāi ngāi chunga om rase,” tīna a masang u na. 26#Isa 53:5; Zn 19:1Hatuka amā'n Barabba chu a mazōkpē na. Isuo chu a razīk a, khrōsa āntār ranga a betōk a.
Rōm Sipai ngāiin Isuo Maniērō a Thō u
Mk 15:16-20; Lk 22:63-65; Zn 19:2-3
27 #
Zn 18:28
Hankēng ramoppū a sipai ngāiin Isuo chu ramoppū ruirilna ina a ruoi u na, ama anhuola sipaiphom pumpui chu a būm u na. 28#Zn 19:2A puon chu a khekpē u na, puon senduk a mansil u na. 29#Isa 53:3; Zn 19:2-3Raling lukhū a phan u na, a lūna a mankhum u na, a chang kut tiang luongsār kuong khat a manlek u na. A matona mankhūk a bil u na, “Chubai, Zehudi mi ngāi Rēng!” tīna, maniērō a thō u na. 30Hatuka a chunga a machil u na, luongsār kuong a lāk a, a lūna a razīk u na. 31#Isa 53:7Hatuka manitāngzār a thō suo u na, kultāi anchuol chu a khekpē u na, ama a puon ngāi dēn chu a mansil u na, khrōsa a tār ranga a suokpui u na.
Isuo Khrōsa Āntār
Mk 15:21-32; Lk 23:26-43; Zn 19:17-27
32 #
Mk 15:21; Lk 23:26; Kui 2:10; Heb 13:12 Asuoka a sē u lāi han Kurini khuo mi, a raming Simon chu a mū u na. Ama chu a khrōs ānput ranga a sūr u na. 33#Zn 19:17Golgotha ei ti u mun chu a hong ātung u na, hiva hi, “Luru Mun” tīna a ni. 34#Sām 69:21Zūthūr sabak mitkhā ānpol chu ābuong ranga a pēk u na. Tenchu a tem a, buong zōt lāi mak a. 35#Sām 22:18Hankēng khrōsa a tār u na, a raliang ngāi chu ravānenna a thō u na, ansem u na. Hava ha deari a chongril chu ei hong kipna a ni, “Amānī'n ka raliang chu ansem u na, ka puon chu ravānenna a thō u na,” (Sām 22:18) ti ha. 36Hava han ansuta, a rung u na. 37A lu chunga āsia ei manlō una chong anziak, “HIVA ISUO HI ZEHUDI NGĀI RĒNG,” tīna a tār u na. 38#Isa 53:12Hatuka ama bila han mīsuom anni a tār u na. A chang tiang angkhat lē a voi tiang angkhat. 39#Sām 22:7; Cha 2:15Hava lampui tianga ānlōi ngāiin maniērō thōna, a lū āhir u na, 40#Zn 2:19“Nang, tempul ansiama nīnthum sūnga āndingpū, na ninga ansan ta ro ba! Pathian Nāipasal nā ni ten khrōs ātā hong chum ta ro,” a ti u na. 41Hantin dēn han chāizūng ulian ngāi, dānmīnchūpū ngāi lē pātar ngāiin um maniērō a thō u na, 42#Zn 1:49“Mītei chu a mazōk a, a ninga chu anzōk thei mak hile! Ama chu Israel ngāi Rēng kēng hale, atun khrōs ātā hong chum ta rase, hatuka koinī'n iam in ti. 43#Sām 22:8Ama chu Pathian a iam kēng do, atun amā'n hong mazōk ta rase, asik chu amā'n, ‘Pathian Nāipasal kā ni,’ antī hale,” a ti u na. 44Ama bila khrōsa āntār mīsuom ngāiin um havan tin dēn han maniērō a thō u na.
Isuo a Thi
Mk 15:33-41; Lk 23:44-49; Zn 19:25-37
45 #
Am 8:9
Sūnchim#27:45 Sūnchim: Grika “dārkār arukna” tīna anziak a. ātā dār anthum#27:45 dār anthum: Grika “dārkār akuona” tīna anziak a. tenpei ram pumpui chu azīng khap a. 46Dār anthum tānga Isuo chu anring sabak a, “Eli, Eli, lama sabakthani?” (Sām 22:1) tīna, ankhēk a. Hava ha, “Ka Pathian, ka Pathian, ichang mo nei na māk?” tīna a ni. 47Havana ānding senkhatin hava ha a riat u na, “Hiva miringin Eliza kēng ei pāi!” a ti u na. 48#Sām 69:21Hatuka a bil una mī khat a tān len a, isponz a lāk a, hava le han zūthūra a phūm a, sunrola a tār a, ānēk ranga a pēk a. 49Tenchu mītei ngāiin, “Om rak rase. Ama ānzōk ranga Eliza mo hong en di rei,” a ti u na. 50#Zn 19:30Hatuka Isuo chu rōl anring sabaka ankhēk rēt a, a rathā chu a mathān a.
51 #
Ant 26:31-33; Heb 9:3, 8 Hatuka entā, tempul puonzar chu achung len ātā athuoi tenpei anthēta bong anni a chang a. Nīnū a hong a, lungpui ngāi anphel a. 52Thānkhur ngāi dōra anlong a. A lei in suo mīnthiang tamtak ngāi taksā a hong ānthuirēt a. 53Hava ngāi ha ama anthuirētna suona thānkhur ātā a hong āsuok u na, khopui anthianga a lūt u na, mi tamtak kōma a hong anlang u na. 54Hatuka sipai razaruoipū lē a bila Isuo ārung ngāiin nīnū hong lē ii omdān ngāi chu a mū u na, ā chi sabak u na, “Ama hi Pathian Nāipasal tatak kēng hile,” a ti u na.
55 #
Lk 8:2-3
Hava han nupang atampā, ama dorbōndom tira Galili ram ātā Isuo nūk a zī ngāi chu a om u na, amānī'n rālkhat ātā a lei thīr u na. 56#Mk 15:47; Lk 24:10; Zn 19:25Hava ngāi bila han Mari Magdalene, Zakob lē Zosef ngāi a nū Mari lē Zebedai a nāipasal ngāi a nū chu a om u na.
Isuo Thāna Anphūm
Mk 15:42-47; Lk 23:50-56; Zn 19:38-42
57Hatuka khului a hong ānī le han, Arimathāi khuona mi ānchong khat, a raming Zosef chu a hong a. Ama len um Isuo zolāi a hong āchang a. 58Ama chu Pilat kōma a sē na, Isuo ruok chu a va zong a. Hatuka Pilat-in ruok chu āpēk ranga chong a pēk a. 59Hatuka Zosef-in ruok chu a lāk a, linen puon anthiang le han ā thuom a. 60#Mk 16:4; Kui 13:29Ama thānkhur athar, lunga ei khuor a han a va siak a. Thānkhur makota han lung alianpā a maluoi a, a sē na. 61Tenchu Mari Magdalene lē Mari atei chu hava han a om u na. Thān māi asona ansut u na.
Thānkhur Ārungpū ngāi
62Hanūka nikhuo chu, Ansinna nikhuo anzui thap len a ni. Chāizūng ulian ngāi lē Farisāi ngāi chu Pilat a kōma a hong ānchun u na, 63“Ka pū, hava mī huongpū'n a damlāi han, ‘Nīnthum suole anthuirēt ka ti,’ ei ti ha na la riattit a. 64Hasikhan, thānkhur chu nīnthum ten ārung ranga chongpēk ro. Hanōkten a zolāi ngāi chu ei hong u na, ama chu zāna ei va maruk viak u na, vāntāng kōma, ‘Ama chu āthi ngāi bil ātā anthuirēt zei,’ ti u'n ti. Hatuka nūka anhuongna chu māna nēka siat sā in ti,” a ti u na. 65Pilat-in amāni kōma, “Nangnī'n mī rungpū ngāi nā dōn u hale. Sē u tānla, nei thei u anga manrung u ro,” a tī na. 66#Dān 6:17Hatuka a sē u na, thānkhur chu asadima, lung chu a mandang rap u na, mī rungpū ngāi a manrung u na.
Bible in Ranglong, © Bibles International, the Bible society of Baptist Mid-Missions, 2024.