ROMANUN 10
10
1Nejekewaëdoog, ninkeche‐nundahwandum emuh nindaïng kuhya nindezheähnuhmeätuhwah Kesha‐Muhnedoo guhnooduhmoowug owh Israel, cheöonje‐bemahjeïndwah.
2Nindebahjemaug anewak aunwahjewug nundahwanemahwaud enewh Kesha‐Muhnedoon, kahween dush debishkoo puhgukkanjegawining.
3Kekanduhsigwah muh Kesha‐Muhnedoo ooquuhyuk‐ezhewabezewin, pahbahahnookeewug cheühyeenjesetoowaud tebenuhwa ooquuhyuk‐ezhewabezewinewaun kahween kepuggedenedezoosewug emuh ooquuhyuk‐ezhewabezewining owh Kesha‐Muhnedoo.
4Christ muh wuhyaquahahyahnig ewh tebahkoonegawin cheoönje quuhyuk‐ezhewabezeïndwah kuhkenuh duhyabwayandungig,
5Moses muh oodebahdoodaun ewh quuhyuk‐ezhewabezewin emuh tebahkoonegawining anduhgoog, Owh enene andoodung oonoo uhyeëen tahoonje‐bemahdeze suh emuh.
6Ewh dush quuhyuk‐ezhewabezewin emuh oonje dabwayanduhmoowining anduhgoog oo‐oo ekedoomahgud, Kagoo ekedookan emuh kedaïng, Ahwanan kaëzheöombishkaud ewede keche‐kezhegoong? (ewh suh chepenese-wenahpun enewh Christun;)
7Gamuh, Ahwanan ahnahmuhkummig kaëzhaud? (ewh suh, neboowining cheöonje‐nahnaud enewh Christun.)
8Ahneen dush akedoomahguk? Pashoowud ewh ekedoowin emuh anduhzhe‐ahyahyun, emuh kedooning, kuhya emuh kedaïng: me suh, ewh dabwayanduhmoowine‐ekedoowin, pabahdebahdooduhmaung:
9Ewh kishpin wahweenud emuh kedooning owh Tabanemenung Jesus Christ, kuhya dabwayanduhmun emuh kedaïng ewh Kesha‐Muhnedoo keähbejebahaud oonje neboong, kegahbemahjeëgoo.
10Mesuh ewh oodaëmah owh enene wanje‐dabwayandung cheöonjequuhyuk‐ezhewabezeïnd; oodoonemah wahweendahmahgamahgud cheöonje‐bemahjeëwang.
11Ekedoomahgud ewh kechetwah‐oozhebeëgawin, Ahwagwan duhyabwayanemahgwan enewh kahween tahahgujjeähse.
12Kah muh pekinnoong enanemahsewug owh Jew kuhya owh Greek: owh muh nahsaub Mahyahmahwe Tabaningad wahnuhdeze cheshahwanemaud kuhkenuh enewh nanaundoomegoojin.
13Ahwagwan muh kanuhnaundoomahgwan Jehovahun tahbemahjeäh.
14Ahneen dush kaëzhenuhnaundoomahwaud enewh kahdabwayanemahsewahjin? Ahneen dush kaëzhedabwayanemahwaud kishpin kenoonduhsigwah azhewabezenid? Ahneen dush kaëzhenoonduhmoowahpun, kishpin ahweyah debahjemoosig.
15Ahneen dush kaöonje‐debahjemoowaud kishpin ahnoonahsewindwah? Debishkoo azhebeëgahdag, Kagate quuhnaujewunene oosittahwaun egewh pabahdebahdoodungig ewh pezaunewawine‐minwahjemoowin, egewh pahtoojig wanesheshing debahjemoowin!
16Kah suh kuhkenuh oogebezinduhsenahwah ewh minwahjemoowin. Ekedoo muh Ezaias, Tabaningayun, ahwanan kahdabwayandung nindebahjemoowinenaun?
17Me dush ewh dabwayanduhmoowin wanjeemahguk emuh noonduhmoowining, kuhya ewh noonduhmoowin wanjeemahguk emuh Kesha‐Muhnedoo oodekedoowining.
18Nindekid suh dush, Kah nuh ween kenoondahgasewug? Aahe, kagate, oodinwawinewah mezewa uhkeeng ketabishkahne, kuhya oodekedoowinewah nahnauzh egoo ewede wuhyaquahkummegaug oo‐oo uhkee.
19Nindekid suh goo, Kah nuh ween owh Israel kekekanduhse? Netum Moses ekedoo, Kegahnuhnishkahje-enenim chekeshahwanjegashkeyag oonje egewh ahyahnishenahbawesigoog, kuhya oonje egewh kakebahdezejig ahnishenahbag, kegahoonjenishkeënim.
20Keche‐nejeweze owh Esaias, oo‐oo dush ekedood, Ningemekahgoog egewh kahnundahwahbuhmesigoog; kuhya ningepuhgukkanemegoog egewh kahnunduhwanemesigoog.
21Oo‐oo dush oodenaun enewh Israëlun, Kuhpa kezhik ningeshebenekatahwaug egewh kagaunzetungig kuhya ahyahgoonwatungig ahnishenahbag.
Currently Selected:
ROMANUN 10: OTW
Highlight
Copy
Compare
Share
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
