Kitaaba Fakkeennaa 28
28
1Nami hamaan adoo nami hin ari'in baqata;
nami balchaan ammoo akka neenqaa ifi addata.
2Kolbaan yennaa finqila kaatu,
bulchitooti isi'ii hin heddatti;
nama hubata'aa fi beekaa yoo qabaatte ammoo
mootummaan isi'ii jabaattee hin dhaabbatti.
3Bulchaan hiyyeessa cunqursu
akka bokkeya midhaan balleessuu ti.
4Worri seera lakkisu nama hamaa leellisa;
worri seera eegatanu ammoo isaaniin morma.
5Nami hamaan haqa hin beeku;
worri Mootii Waan Maraa barbaadatu ammoo
guutumaa guutu'utti haqa beekan.
6Dureessa ideensi isaa micciirama'aatii mannaa,
hiyyeessa komii hin qanne woyya.
7Ka seera eegu ilma qalbeeffata'a;
ka gadhitoo woliin jaalomu ammoo
abbaa ifii salphisa.
8Nami liqaa dhala gudda'aatiin qabeenna ede'atu,
nama hiyyeessaa nawuuf hin kuusa.
9Nama seeraaf hin ajajanne,
daadimati isaatuu akka malee hin jibbisiisa.
10Nami nama qajeelaa karaa hama'atti geessu,
boolla ifumaa qote keessa hin bu'a;
nami komii hin qanne ammoo
waan dansaa hin dhaala.
11Nami dureessi qaroo ifi seya;
hiyyeessi hubantii qabu ammoo
qorqoree keessa isaa hin beeka.
12Nami balchaan yennaa injifatu,
martinuu hin gammadan;
nami hamaan yennaa baallii qabatu ammoo
namooti hin dhokatan.
13Nami cubbuu ifii dhoffatu,
hin milkowu;
nami cubbuu ifii faaci'atuu fi ka isii lakkisu ammoo
marartii hin dhaggata.
14Nami yennaa mara Mootii Waan Maraa sodaatu
ka gammade;
nami mataa jabaatu ammoo rakkinna keessa gala.
15Bulchaan hamaan worra qarqaarsa hin qanne irratti
akka neenqa dhangaa dhowuu
yookiin akka doobbaa hiixatee woy qabuu ti.
16Bulchaan hubantii hin qanne
akka malee nama cunqursa.
Ka bu'aa haqa hin te'in jibbu ammoo
bara dheeraa hin le'a.
17Nami nama ijjeese,
haga du'utti baqataa hin le'a;
nami tokkolle isa hin qarqaarin.
18Nami komii hin qanne waan hantuu irra hin bu'u;
nami micciiramaan ammoo dedhuma jiga.
19Nami lafa qotatu sagalee bacaa hin qabaata;
nami waan bu'aa hin qanne hordofu ammoo hin deega.
20Nami addatamaan guddoo hin eebbifama;
nami durumma'aaf ariifatu ammoo
adoo hin adabamin hin hafu.
21Nama wol caalchisuun dansa'aa moti;
garuu nami bixee daabbo'oo takkatti'iif jedhee
dokonkora huja.
22Nami donni duroomiisaaf ariifata;
hiyyuun akka isa eegattu hin beeku.
23Nama afaaniin nama kookkisu caalaa,
ka balleessaa namatti himee nama xixutti
dhuma irratti saadama.
24Nami abbaa ifii yookiin haadha ifii saamee,
«Kun dokonkoraa moti» jedhu,
inni jaala nama woy balleessuu ti.
25Nami joljolaan lola kakkaasa;
nami Mootii Waan Maraatitti addatu ammoo
hin milkowa.
26Nami ifitti addatu gowwa'a;
nami qarumma'aan deddeebi'u
ammoo waan hantuu irra hin bu'u.
27Nami hiyyeessaaf kennu womaa hin dhabu;
nami hiyyeessa ilaalee lakkisu ammoo
abaarsa hedduu fudhata.
28Yennaa namooti hamooleen baallii fudhatanu,
kolbaan hin dhokatti;
yennaa isaan badanu ammoo
balchooti hin bacatti.
Currently Selected:
Kitaaba Fakkeennaa 28: guj
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and Bible Society of Ethiopia
