Kitaaba Fakkeennaa 25
25
Jecha Qarummaa Solomoonii Ka Dhibii
1Isaan kunille fakkeenna Solomoonii ka dhibii,
ka qondaaltoti Hisqiyaasii mootii
Yihuda'aa barreeffama irraa garagalchane.
2Gofa woyii dhossuun ulfinna Waaqaa ti;
gofa woyii qoratanee baasuun
ulfinna moototaa ti.
3Akkuma ol-gubbaan ol fagaattu
akkuma lattille gaddi fagaattu,
yaadi moototaalle qorqoramuu hin dande'u.
4Ka meetii irraa meya huju meetii qulluu akka qabaatu,
ati meetii san irraa xurii kaasi.
5Barcumaan mootumma'aa
balchumma'aan akka dhaabbatu,
nama hamaa addee mootiin jiruu kaasi.
6Mootii duratti ol ifi hin qabin;
nama guddaa ifi hin fakkeessin.
7Mootichi nama guddaa duratti
addee gad aantuu sii kenniisaa mannaa,
addee ol aantuu sii kennu woyya.
8Waan tokko ilumaan dhaggite'eef
ariifattee gara mura'aa hin dhikeessin;
nami dhibiin dokonkora keeti yoo mirkaneesse,
ati dhuma irratti maan teeta ree?
9Haajaa keetiif nama woliin yennaa falmattu,
gofa nama dhibi'ii hin mudhisin.
10Yoo akkas hin te'in nami waan kana dhage'u si qaanessa;
maqaan keeti ka bade sun ijjumaa si'iif hin deebi'u.
11Dubbiin yennaa isi'iititti dubbatantu,
akka quumhaa worqi'ii ka qorii meeti'ii keessaa ti.
12Xixxaan nama qaro'oo nama isa dhage'uuf,
akka worqii gurraa yookiin meya seesaa
ka worqii qulluu irraa hujamee ti.
13Bisaan dhakaa roobaatiin qabbanowe,
yennaa midhaan galcha'aa
akkuma gadhaa namaa qabbaneessu,
ergantooti addatamootille
nama isaan ergatuuf akkasuma;
isaan yaada goottolee ifii hin foorfachiisan.
14Nami kennansa namaaf hin kennineen ifi jaju,
akka duumensaa fi qilleensa bokkeya hin qannee ti.
15Nami ossa qabu
bulchaa biyyaa tokko gadhaa hin laaffifata;
arrabi dansaan nama mataa jabaatu laaffisa.
16Damma yoo dhaggatte,
haga si'iif barbaachisu qofa nyaadhu;
akka malee nyaattu si diddissa.
17Si bagee waan si jibbuuf,
miilli keeti mana ollaa keetiititti hin daandin.
18Nami dharaan dhugaa nama irratti bayu,
akka ulee jirmaa yookiin
akka shallaaga'aa yookiin
akka daaya qara qabuu ti.
19Rakkinna keessa nama hin addatannetti addatiis,
akka nama ilkaan tacho'etti
yookiin miila laashowetti addatuu ti.
20Nama gaddeef faaruu faarsuun,
akka nama guyyaa boojji'ii
woyaa isaa isa irraa fuudhanee ti
yookiin akka soodda mada'atti naqanee ti.
21Diinni keeti yoo beelote sagalee nyaatu kenniif;
yoo dheebotelle bisaan unu kenniif.
22Tana godhiisaan gaabbee akka inni qaanowu hin goota;
Mootiin Waan Maraalle gatii si'iif hin kaffala.
23Akkuma qilleensi kaabaa bokkeya fidu,
arrabi hamatu ila aari'iin nama ilaaltu hin fida.
24Niitii dubbatittii woliin le'iisaa mannaa,
roga heellichoo manaa irra le'uu woyya.
25Oduun dansaan biyya fago'oo,
akkuma bisaan qabbanowaa
lubbuu dheebotte dheebuu baasuu ti.
26Nami balchaan nama hama'aaf karaa kennu,
akka madda boorayee,
yookiin akka bisaan boollaa
ka xurayee ti.
27Damma akka malee nyaatiis dansa'aa moti
yookiin ulfinna mataa ifii barbaadatiisi ulfinnaa moti.
28Nami ifi qabatiisa hin dandeenne,
akka qachaa guddicha dalleenni dhaka'aa irraa jigee ti.
Currently Selected:
Kitaaba Fakkeennaa 25: guj
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and Bible Society of Ethiopia
