Kitaaba Seera Laakkossaa 33
33
Israa'elooti Biyya Gibxi'iitii Haga Mo'aabii Attam Akka Deemane
1Israa'elooti akka gosa gosa ifiitiin Muuse'ee fi Aaroniin sooreffamaa biyya Gibxi'iitii yennaa bayane, addeen isaan itti quqqubataa ideemane asii gad jirti. 2Akkuma ajaja Mootii Waan Maraatitti addeen isaan quqqubataa ideemane ta Muuseen barreessee asii gad jirti.
3Kolbaan Israa'elii ji'a qaraa keessa, guyyaa kudhanii shaneesso'ootitti, Jila Irra Dabaramaatiin boruyyaa, worri Gibxi'ii duudiin adoo isaan dhagganuu, gadhaa jabeennaan qachaa Raamsesiitii ka'anee deemane. 4Yennaa san worri Gibxi'ii ilmaan ifii angafoota Mootiin Waan Maraa ijjeese awwaaliisatti jiraniiyyu. Mootii Waan Maraa waaqota isaanii irralle'etti mureeraayyu.
5Israa'elooti qachaa Raamsesiitii ka'anee Suukoot qabatane. 6Suukootii ka'anee, cinaa goomole'ee Etaamii qubatane. 7Etaamii ka'anee, Phiihahiirot ta Baa'el-zefon irraa gara aduun baatu jirtutti gara duubaa deebi'anee, Miigdol fuula dura qubatane. 8Phiihahiirotii ka'anee, abbaayaa diintuu keessa dabaranee, gara goomolee taranee, karaa guyyaa sadii goomolee Etaamii keessaa deemanee Maaraa qubatane. 9Maaraa ka'anee, addee maddi bisaanii kudhanii lamaa fi meexxiin torbaatam jirtu Eliim qubatane.
10Eliimii ka'anee, abbaayaa diintuu#33:10 Abbaayaa diintuu: Afaan Ibrootaatiin abbaayaa allaadu'uu jedha. bira qubatane. 11Abbaayaa diintuu biraa ka'anee, goomolee Siinii keessa qubatane. 12Goomolee Siiniitii ka'anee Dofqaa qubatane. 13Dofqa'aa ka'anee Aluushi qubatane. 14Aluushii ka'anee, addee bisaan kolbaan untu hin jirre Refiidiim qubatane.
15Refiidiimii ka'anee, goomolee Siina'aa keessa qubatane. 16Goomolee Siina'aatii ka'anee, Kibrot-hataawaa qubatane. 17Kibrot-hataawa'aa ka'anee Haseroot qubatane. 18Haserootii ka'ane Riitmaa qubatane. 19Riitma'aa ka'anee Rimoon-Faares qubatane. 20Rimoon-Faaresii ka'anee Liibnaa qubatane. 21Liibna'aa ka'anee Riisaa qubatane. 22Risa'aa ka'anee Qehelaataa qubatane. 23Qehelaata'aa ka'anee gaara Shaaferii qubatane. 24Gaara Shaaferiitii ka'anee Haraadaa qubatane. 25Haraada'aa ka'anee Maqhelot qubatane. 26Maqhelotii ka'anee Taahaati qubatane. 27Taahaatii ka'anee Taaraa qubatane. 28Taara'aa ka'anee Miitqaa qubatane. 29Miitqa'aa ka'anee Haashmoonaa qubatane. 30Haashmoona'aa ka'anee Moserooti qubatane. 31Moserootii ka'anee Beneyaa'aakaan qubatane. 32Beneyaa'aakaanii ka'anee Hoor-Haagidgaadi qubatane. 33Hoor-Haagidgaadii ka'anee Yoxbaataa qubatane. 34Yoxbaata'aa ka'anee Abronaa qubatane. 35Abrona'aa ka'ane Eziyon-Geberi qubatane. 36Eziyon-Geberii ka'anee goomolee Ziinii keessa Qaadeshi qubatane. 37Qaadeshii ka'anee meessaa lafa Edoomii gaara Hoorii irra qubatane.
38Aaroniin hayyichi ajaja Mootii Waan Maraatiin gara gaara Hoorii ol baye; Israa'elooti biyya Gibxi'iitii bayaneen duuba woggaa afurtameesso'oo keessa, ji'a shaneesso'oo guyyaa qaraa achitti du'e. 39Aaron gaara Hoorii irratti yennaa du'e san woggaan isaa dhibba tokkoo fi diddamii sad.
40Mootichi Araadii Kana'aanichi, ka goomolee kibba kana'aanii keessa#33:40 Kibba Kana'aanii: Afaan Ibrootaatiin Negeb jedha. le'u, dhufiisa Israa'elootaa dhage'e.
41Isaan gaara Hooriitii ka'anee Xalmonaa qubatane. 42Xalmona'aa ka'anee Fuunon qubatane. 43Fuunonii ka'anee Obooti qubatane. 44Obootii ka'anee meessaa Mo'aabii irra Iyye-Abaariim qubatane. 45Iyye-Abaariimii ka'anee Diibon-gaad qubatane. 46Diibon-gaadii ka'anee Almoon-diiblaataayimi qubatane. 47Almoon-diiblaataayimii ka'anee gaara Neboo fuula dura, gaarota Abaariimii irra qubatane. 48Gaarota Abaarimiitii ka'anee fuullee Yeriko'oo cinaa laga Yordaanosii dirree Mo'aabii keessa qubatane. 49Achi laga Yordaanosii bira dirree Mo'aabii keessa Bet-yeshiimoot irraa haga Abeel-shiixiimiititti qubatane.
Israa'elooti Yordaanos Gamatti Adoo Hin Bu'in Qajeelfama Kenname
50Yerikoo fuula dura, laga Yordaanosii bira, dirree Mo'aabii keessa adoo jiranuu, Mootiin Waan Maraa Muuse'etti dubbatee, 51«Ati kolbaa Israa'eliitiin, ‹Laga Yordaanosii gamatti buutanee, gara lafa Kana'aanii yennaa seentanu, 52nama lafa san irra jiru mara ifi duraa baasa'a; waaqota dharaa fakkii bocantee hujantee fi fakkii baqisiifantee hujante mara balleessa'a; addee waaqonfannaa isaaniille mara diiga'a. 53Lafa san akka qabattanuuf, ani waan isinii kenneeruuf, lafa san fudhadha'aatii keessa le'a'a. 54Akkuma fira fira keessaniititti lafa san hixa'aan qoodama'a; fira gudda'aaf, lafa guddoo, fira diqqa'aaf, lafa diqqoo kenna'a; nama tokko tokkoofuu akkuma hixaan isaaf bu'etti latti isaaf hin teeti; akkuma fira abbootii teessan ta duriititti lafa fudhadha'a. 55Worra lafa san keessa le'u ariitanee yoo hin baasin ammoo, worri isin hamburtane sun, ila teessaniif akka fadhaanaa, cinaacha keessaniif akka qore'ee hin te'an. Lafa isin keessa leetanu mara keessatti isin hin rakkisan. 56Anille waan isaan irratti godhiisaaf yaadadhe, isin irratti hin godha› jedhiin» jedhe.
Currently Selected:
Kitaaba Seera Laakkossaa 33: guj
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and Bible Society of Ethiopia
