Etandiha 46

Yakobbo atiina e Misiri

1Nga Yisirayiri aŋamba olugendo atiina nʼebiitu bibye byosibyosi ebi gaali ni nabyo era ni goola e Bberuseebba, gaŋayo eŋongo eyiri Hatonda wa Yisaka semwana.

2Nga Hatonda aloma ni Yisirayiri mu hirooto owiire ati, “Yakobbo, Yakobbo.”

Nga Yakobbo amugobolamo ati, “Wanji Musengwa.”

3Nga Hatonda amuloma ati, “Ndiise Hatonda, Hatonda wa lataawo, otatya hutiina e Misiri, olwohuba ndihufuulira eyo egwanga ebbala. 4Nja hwehirira ni neewe ohutiina mu gwanga lyʼe Misiri era mu butuufu oweene ndihugobosa ŋano. Era nʼolifa, Yosefu alihugolola.”

5Ngʼaŋo Yakobbo aŋwa e Bberuseebba, ngʼabaana ba Yisirayiri bagega Yakobbo laata yaawe, nʼabaana nʼabahasi baawe, mu bigaali ebi Falaawo gabaŋindihira ohugenderamo. 6Nga baŋira ebisolo byawe ko nʼebiitu byawe ebi baasuna mu gwanga lyʼe Kanani, nga Yakobbo nʼolulyo lulwe lwosirwosi batiina e Misiri. 7Gatiina e Misiri nʼabasaani nʼabahaana ko nʼabejuhulu babe, olulyo lulwe lwosirwosi.

8Amasiina gʼabasaani ba Yisirayiri (Yakobbo nʼabasaani babe) abaatiina e Misiri ngagano:

Lubbeeni omusaani wa Yakobbo omudaayi.

9Abasaani ba Lubbeeni baali nje

Kanoki ni Paalu ni Kezirooni ni Karumi.

10Abasaani ba Simyoni baali nje

Yemweli ni Yamini nʼOkadi ni Yakini ni Zokali ni Sawulo omwana wuwe mu muhasi Omukanani.

11Abasaani ba Leevi baali nje

Girisoni ni Kohasi ni Merari.

12Abasaani ba Yuda baali nje

Eri nʼOnani ni Seera ni Pereezi ni Zeera. Aye Eri nʼOnani baafiira mu hyalo hyʼe Kanani.

Abasaani ba Pereezi baali nje

Kezirooni ni Hamuli.

13Abasaani ba Yisikaali baali nje

Toola ni Puuva ni Yobbu ni Simurooni.

14Abasaani ba Zebbulooni baali nje

Seredi nʼEloni ni Yaleeri.

15Abo njʼabasaani ba Leeya aba gasaalira Yakobbo mu Padani Alaamu ohwongera hu ba Dina omuhaana wuwe gasaala. Abaana babe bosibosi, abaseere nʼabahaana baali adatu nabadatu.

16Abasaani ba Gaadi baali nje

Zifooni ni Hagi ni Suuni nʼEzibboni nʼEri nʼArodi nʼAleeri.

17Abasaani bʼAseri baali nje

Yimuna ni Yisuva ni Yisuvi ni Bberiya.

Mboojo yaawe gaali nje Seera.

Abasaani ba Bberiya baali nje

Hebberi ni Malukiyeeli.

18Abo njʼabaana aba Zilupa gasaalira Yakobbo. Zilupa njʼoyu Labbaani gaaŋa Leeya omuhaana wuwe ohuba omwidu wuwe. Bosibosi ŋalala, Yakobbo gamusunamo abaatu ehumi namukaaga.

19Abasaani ba Lakeeli muha ya Yakobbo baali nje

Yosefu ni Bbenjamini. 20Yosefu gasaala Manase nʼEfulayimu nʼali e Misiri. Asenaasi omuhaana wa Potifeera omusengi wa Oni njʼowaali nyinaawe.

21Abasaani ba Bbenjamini baali nje

Bbeera ni Bbekeri nʼAsubbeeli ni Geera ni Naamani nʼEki ni Roosi, Mupiimu ni Hupimu nʼArudi.

22Abo njʼabasaani ba Lakeeli aba gasaalira Yakobbo, ŋalala baali ehumi nabane.

23Omusaani wa Daani gaali nje

Husimu.

24Abasaani ba Nafutaali baali nje

Yahizeeri ni Guuni ni Yezeri ni Silemu.

25Abo njʼabasaani ba Yakobbo aba Bbiluha gamusaalira. Bbiluha oyo njʼoyu Labbaani gaaŋa Lakeeli omuhaana wuwe, abe mwidu wuwe. Era njʼowamusaalira abaana musanvu ŋosiŋosi.

26Abo bosibosi abaatiina e Misiri ni Yakobbo, abomu lulyo lulwe nʼotuhiiseho abahasi bʼabaana babe, baali abaatu kaaga namukaaga. 27Nʼogataho abasaani ba Yosefu ababiri aba gasaalira e Misiri, ohuŋirira ŋalala, abaatu abomu mago ga Yakobbo abaatiina e Misiri bosibosi baali sanvu.

28Nga Yakobbo atuma Yuda eyiri Yosefu ohumuŋa endagiriro eyitiina e Goseni. Ni boola mu twale lyʼe Goseni, 29nga Yosefu aŋamba ehigaali hihye, atiina mu Goseni ohwagaanana Yisirayiri semwana. Yosefu ni gahubba emoni hu semwana ati bbepa, gatiina gamugwa mu hifuba, ngʼalira ohuhena ehiseera ehyene ehireeŋi olwʼesangaalo.

30Oluvanyuma, nga Yisirayiri aloma Yosefu ati, “Ŋaahani nʼolu fa nefiira olwohuba kuweene nʼemoni jange nabona ti ohiiri mulamu.”

31Ngʼaŋo Yosefu aloma abaganda babe nʼabaatu abandi abaatiina e Misiri ni semwana ati, “Nahatiine eyiri Falaawo mulome ti, ‘Abaganda bange nʼabaatu abandi abaajire ni Bbaabba ababaaye ni bamenya mu hyalo hyʼe Kanani, bajire ohumenya eno ni neese. 32Abaatu abo baayi bʼebyayo era bajire nʼebyayo ko nʼebiitu byawe byosibyosi.’ 33Falaawo nʼabalanga gababuusa ati, ‘Muhola mirimo hi?’ 34Mumugobolangamo muuti, ‘Efe abeedu babo huli baayi byʼebyayo ohuŋwa mu buŋere weefe hyʼabasehulu beefe ngʼolu baali.’ Ehyo hiija humuleetera ohubaleha mumenye mu twale lyʼe Goseni olwohuba Abamisiri benyinyalya abaayi.”

Currently Selected:

Etandiha 46: NUJ

Highlight

Copy

Compare