โรม 3
3
1ดัฮ กะฆีเตอ_ ซือมียา บักซา ยิว อาดา ลาฆู นามา_ นู บาฌิ เดะ กาวัด เฆอ? นู กูญา ซาโมจ ลาฆู กรัจ เตอ_ นะ อาดา อูโตก นามา เฆอ? 2อาดา ซูโงฮ_ บาญะ ฌือแนฮ เลอ. ลามูลา เตอ_ ตูฮัด เดะ อาตัซ บือเลฮ กีเรบ โกะ ปือมือเลา นะ ญา_ บรี กะ ลูมอฮ ยิว. 3นู กูญา ซือตืองัฮ ฮาตี เตด รือมัก_ ฌาดี กะฮามี เลอ? นู กูญา ฮาตี เตด รือมัก กะฆีเตอ_ นะ บูวัจ บรี ลาฆู นู ตูฮัด ญา ฮาตี รือมัก เตอ_ เตด ฌาดี นามา เฆอ? 4เตด โบะ. ฮอย เตด ฌาดี กะฆีเตอ เลอ. ตูฮัด ญา มือเลา ซูโงฮ เลอ_ มีเซ จะ โกะ อูมัจ ซือมียา นะ ฌาดี ซือมียา มืออูปัย_ ราตา ซือมียา_ บือกะ อาดา ฆาแรฮ ดัฮ_ เดะ ซูรัจ ปือมือเลา นะ ตูฮัด จะ
“กะฆีเตอ_ วะตู เกา มือเลา เตอ_
นะ บือเลฮ ลีฮัจ จะ_ เกา มือเลา ซูโงฮ ดัฮ
วะตู ซือมียา อาดู เกา เตอ_
เกา นะ บือเลฮ ฌือนัฮ เดะ ลาฆู บือดะวา อีตู เลอ #
มปต 51.4 .”
5ตาปี จะ_ ดัฮ ลาฆู นู กีตา บูวัจ เตด บาฌิ_ นะ ปลีฮัจ บรี ซัฮ จะ_ ตูฮัด เดะ อาตัซ ญา บาฌิ ตือปัจ เตอ_ กะฆีเตอ กีตา นะ มือเลา กะฮามี เลอ? นู ตูฮัด มูซัยํ กรัจ ฮูโกบ กีตา_ ญา บูวัจ เตด บาฌิ เฆอ? (กู มือเลา ตูโรจ กะ ฮาดัจ นะ โกะ อูมัจ ซือมียา เลอ.) 6ฮอย เตด ฌาดี กะฆีเตอ เลอ. ดัฮ ตูฮัด บูวัจ เตด กือนา ลาฆู เตอ_ ญา นะ กรัจ ฮูโกบ ลูมอฮ ซือมียา เดะ ดือนียา บือเลฮ กะฮามี เลอ? 7ตาปี อาดา ซือมียา มือเลา จะ_ “มีเซ กู นะ มืออูปัย เตอ_ ลาฆู มืออูปัย อีตู นะ ปลีฮัจ จะ_ นู ตูฮัด ญา รือมัก ซูโงฮ เลอ_ กะฆีเตอ นะ บูวัจ บรี ลีฮัจ ลาฆู บือซายา บือซรี นะ ญา บรี ซัฮ. กะ ลาฆู มืออูปัย นะ กู นะ บูวัจ กะฆีเตอ_ บูวัจ นามา เลอ_ กู นะ กือนา กรัจ ฮูโกบ บือกะ ฌาดี ซือมียา บือดูซา?” ญา จะ. 8ดัฮ กะฆีเตอ_ บูวัจ นามา เตด มือเลา ปูลัก จะ_ “โฌฮ_ บรี กีตา บูวัจ ฌาฮัจ เลอ_ บีดา ลาฆู บาฌิ นะ บือฌาดี มาแรฮ.” ซูโงฮ_ อาดา ซือมียา ซือตืองัฮ นู มือเลา มือฌัฮ กะ กู_ อาดู จะ_ กู อาดา มือเลา กะฆีเตอ เลอ. ตูฮัด นะ กรัจ ฮูโกบ กูญา บรี กือนา ลาฆู.
ฮอย ซือมียา ซืออูรัก นู บาฌิ ตือปัจ
9กะฆีเตอ_ นะ ฌาดี กะฮามี เลอ? กามี นู บักซา ยิว_ อาดา ลาฆู บาฌิ เดะ ลูมอฮ อาซิก เฆอ? บูกัด เลอ. กู ซูดัฮ บรี ลีฮัจ จะ_ นู ลูมอฮ บักซา ยิว ลูมอฮ บักซา อาซิก เตอ_ กูญา ซือมูฮา_ ดูโดะ เดะ บาวัฮ ฮูโกบ นะ ลาฆู ดูซา เลอ. 10เดะ ซูรัจ ปือมือเลา นะ ตูฮัด มือเลา จะ
“ฮอย ซือมียา ดีฮา นู บาฌิ ซือมาตา เลอ.
ซา อูรัก โปด_ ฮอย.
11 ฮอย ซาปา_ นู บือเลฮ มาโซะ เดะ ฮาตี.
ฮอย ซาปา โปด_ นู ซารี ตูฮัด เดะ อาตัซ.
12 กูญา ซือมูฮา ปี ซือซัจ
เดะ ฌาลัด นะ ตูฮัด ดัฮ.
กูญา ปาคัจ บูวัจ ลาฆู ฮอย เตด ตือปากัย.
ฮอย ซาปา เลอ_ นู บูวัจ บาฌิ.
ซา อูรัก โปด_ ฮอย #
มปต 14.1-3; 53.1-3 .”
13 “มูโลจ นะ กูญา_ ฌาดี ซือรูปา ลูบัก ตานัม บาดัด นู บูกา ดัฮ.
กูญา บียาซา ซูโรฮ ลีดัฮ นะ กูญา_ มือเลา มืออูปัย #
มปต 5.9
.”
“ปือมือเลา นะ กูญา_ ซือรูปา อาเย บีซา นะ อูลัยํ #
มปต 140.3 .”
14 “มูโลจ นะ กูญา ปือนอฮ
ฌางัน ปือมือเลา ซูปัฮ อาโบยํ_ นู ฮาวุซ ฮางัจ #
มปต 10.7
.”
15 “ตาปะ กากี นะ กูญา บลารี จือปัจ_
เดะ ลาฆู นะ บูนอฮ ซือมียา.
16 กูญา นะ ปี กะ ดีฮา_ นะ บรี ซือมียา ฌาฮานัม_ ซูซัฮ ปายัฮ ดัฮ.
17 ฌาลัด นู บรี ซือนัง ฮาตี อีตู
กูญา เตด กราลา เลอ #
อซย 59.7-8; ฮปอ 1.16 .”
18 “กูญา เตด ดือละ อีงัจ_
นะ ตาโกจ เดะ ตูฮัด เดะ อาตัซ #
มปต 36.1
.”
19กีตา ตาฮู จะ_ ลาฆู ซือมูฮา_ นู ปือมือเลา ฮูโกบ นะ ตูฮัด มือเลา เตอ_ ญา มือเลา กะ ลูมอฮ ซือมียา_ นู ดูโดะ เดะ บาวัฮ ปือมือเลา ฮูโกบ อีตู_ บีดา นะ ตูโดก มูโลจ ราตา ซือมียา_ บรี กือแมน เลอ_ บีดา อูมัจ ซือมียา ซือมูฮา เดะ ดือนียา_ นะ ดูโดะ เดะ บาวัฮ ลาฆู กรัจ ฮูโกบ นะ ตูฮัด. 20กะฆีเตอ_ ฮอย ซือมียา ดีฮา_ นู นะ บาฌิ ตือปัจ โซะ ฮือลด มูคา นะ ตูฮัด_ กรานา ญา บูวัจ ตูโรจ กะ ปือมือเลา ฮูโกบ เลอ. ซาเบะ ปือมือเลา ฮูโกบ อีตู_ บูวัจ บรี ซือมียา ซือดัยํ ญาวา จะ_ ญา ฌาดี อูรัก บือดูซา ดัฮ.
ลาฆู นู ตูฮัด นะ บรี ซือมียา ฌาดี บาฌิ ตือปัจ
21ตาปี วะตู อีนี เลอ_ ตูฮัด เดะ อาตัซ บือเลฮ ปลีฮัจ จะ_ นู ญา นะ บูวัจ บรี ซือมียา_ นะ บาฌิ ตือปัจ ฌางัน ญา กะฮามี_ ฮอย เตด ปือดูลี เดะ ลาฆู ตูโรจ กะ ปือมือเลา ฮูโกบ_ นู ดีฮา เลอ. ตาปี ซูรัจ ปือมือเลา ฮูโกบ นะ ตูฮัด_ ฌางัน ซูรัจ นะ ลูมอฮ ซือมียา ตูโดฮ ลาฆู นะ ตูฮัด_ กูญา ฌาดี ซะซรี ปาซัน ลาฆู อีตู เลอ. 22ฌาดี จะ_ ตูฮัด เดะ อาตัซ_ ญา บูวัจ บรี โกะ ซือมียา นะ บาฌิ ตือปัจ ฌางัน ญา_ กรานา ซือมียา อีตู_ ปือจายา กะ เยซู คริด ดัฮ. ตูฮัด ญา บูวัจ กะฆีเตอ_ ฌางัน ราตา ซือมียา นู ปือจายา. กรานา ลูมอฮ ซือมียา เตด อาซิกๆ เลอ_ 23กูญา บูวัจ ดูซา ดัฮ_ ราตา ซือมียา. กูญา ปูตุซ เดะ ลาฆู บือซรี นะ ตูฮัด เดะ อาตัซ. 24กะฆีเตอ ตูฮัด ญา ฮาลัย บรี ซือลามัจ กะ กูญา_ บรี ฌาดี ซือมียา บาฌิ ตือปัจ_ เตด กีรา รือฆา นามา โปด_ ซาเบะ จะ_ เยซู คริด เตอ_ ญา ตือบุซ กูญา_ บรี ลือปัซ เดะ ดูซา ดัฮ. 25ตูฮัด เดะ อาตัซ ตืองะ เยซู ดัฮ_ บรี ฌาดี ซือบารัก มือญือมัฮ. นู เยซู มาตี_ ดารัฮ มือนีแลฮ ดัฮ_ กะฆีเตอ ตูฮัด นะ อาเกะ ดูซา นะ โกะ ซือมียา_ นู ปือจายา กะ ญา. ญา บูวัจ กะฆีเตอ_ บีดา นะ บรี ลีฮัจ จะ_ นู ญา บาฌิ ตือปัจ เตอ_ กรานา จะ เดะ กาลา ดูลู อีตู_ ญา ตาฮัด ฮาตี ดัฮ_ เตด กีรา ดูซา นะ โกะ ซือมียา. 26ตาปี รอจ วะตู อีนี_ ตูฮัด บรี ลีฮัจ จะ_ ญา บาฌิ ตือปัจ เลอ_ ฌาดี จะ_ ญา นู บาฌิ ตือปัจ_ ญา เลอ_ นู บูวัจ บรี ซือมียา นู ปือจายา กะ เยซู_ ฌาดี ซือมียา บาฌิ ตือปัจ ฌางัน ญา ฌูฆา.
27ดัฮ ฌาดี กะฆีเตอ_ กีตา นะ งันตืองัน บือเลฮ กะฮามี? ฮอย เตด บือเลฮ เลอ. ซาเบะ ลาฆู นามา? ซาเบะ ลาฆู บูวัจ ตูโรจ ปือมือเลา ฮูโกบ เฆอ? บูกัด กะฆีเตอ_ ตาปี ซาเบะ ลาฆู ปือจายา เลอ. 28กะฆีเตอ กีตา กีรา จะ_ นู ซือมียา ซืออูรัก นะ บาฌิ ตือปัจ ฌางัน ตูฮัด_ บูกัด ซาเบะ บูวัจ ตูโรจ กะ ปือมือเลา ฮูโกบ ดัฮ_ ตาปี ซาเบะ ซา ลาฆู อีนี จะ_ นู ญา ปือจายา กะ เยซู คริด เลอ. 29ตูฮัด เดะ อาตัซ_ ญา ฌาดี ตูฮัด นะ ลูมอฮ บักซา ยิว ซา ลูมอฮ เฆอ? ญา ฌาดี ตูฮัด นะ ลูมอฮ บักซา อาซิก ฌูฆา เฆอ? ซูโงฮ เลอ_ ญา ฌาดี ตูฮัด นะ ลูมอฮ บักซา อาซิก ซามา เลอ. 30กรานา อาดา ตูฮัด เดะ อาตัซ_ แนฮ ซา ตูฮัด เลอ. ญา เตอ_ นะ บูวัจ บรี ซือมียา บักซา ยิว_ นู ซาโมจ ลาฆู กรัจ ดัฮ_ นะ บาฌิ ตือปัจ ซาเบะ ญา ปือจายา ดัฮ. ญา นะ บรี ซือมียา บักซา อาซิก_ นู เตด บือเลฮ ซาโมจ ลาฆู กรัจ_ นะ บาฌิ ตือปัจ ซาเบะ ญา ปือจายา ฌูฆา. 31นู กีตา จะ_ ซือมียา นะ บาฌิ ตือปัจ ฌางัน ตูฮัด_ ซาเบะ ลาฆู นู ญา ปือจายา ดัฮ_ กะฆีเตอ_ กีตา นะ บูวัจ บรี ปือมือเลา ฮูโกบ นะ ตูฮัด_ ฮาบิฮ ดัฮ เฆอ? บูกัด เลอ. ตาปี กีตา บูวัจ บรี ปือมือเลา ฮูโกบ อีตู_ ตืองะ กือฌะ กือมัซ ดัฮ เลอ.
Currently Selected:
โรม 3: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
