โรม 11
11
ตูฮัด ตือจีฮัด กะ ลูมอฮ บักซา อิซราเอน
1กะฆีเตอ กู นะ ตาญา จะ_ ตูฮัด เดะ อาตัซ_ ญา กีปัซ ลูมอฮ บักซา นะ ญา_ บูวัก ดัฮ เฆอ? เตด โบะ. ฮอย เตด ฌาดี กะฆีเตอ. ซาเบะ อีซี กู ตะอาซิก โปด_ ฌาดี ซือมียา บักซา อิซราเอน ฌาดี บือแนฮ นะ อับราฮัม_ ฌาดี ซืออูรัก เดะ ปาลัฮ นะ เบนยามิน. 2ตูฮัด ญา ฮอย เตด บือเลฮ กีปัซ ลูมอฮ นะ ญา_ นู ญา ปีเลฮ ตะเดะ ดูลู นูตู ดัฮ. กาเญา เตด ตาฮู เฆอ_ ซูรัจ ปือมือเลา นะ ตูฮัด นู มือเลา ปาซัน เอลียา_ นู ญา บือเลฮ บือซาโวจ กะ ตูฮัด_ อาดู ลาฆู นะ บักซา อิซราเอน จะ 3“ตูฮัด เออ_ โกะ ซือมียา นู ตูโดฮ ลาฆู นะ เกา เตอ_ กูญา บือเลฮ บูนอฮ บูวัก ดัฮ_ โกะ ตือปัจ ตูนู ซือบารัก มือนืองะ กะ เกา โปด_ กูญา บือเลฮ ปรูโตฮ บูวัก ฮาบิฮ ดัฮ เลอ. ลือเบฮ อาดา ซืออูรัก กู ลาฆี เตอ_ ตาปี กูญา มียา ฌาลัด นะ บูนอฮ กู ฌูฆา เลอ#1รฌ 19.10,14 .” 4ตาปี ตูฮัด บือเลฮ ตีกัฮ กะ เอลียา กะฮามี? ญา ตีกัฮ กะฆีนี จะ “กู อาดา ลือเบฮ_ ซือมียา ตูโฌฮ รีบู อูรัก_ นู กู บือเลฮ ตาโรฮ บีดา กู ตะอาซิก เตอ_ นู เตด ดือละ ตูกู ลูโตจ มือญือมัฮ กะ บราลา บาอัน#1รฌ 19.18. #11.4 บาอัน ฌาดี บราลา นะ ลูมอฮ คานาอัน. วะตู ลูมอฮ บักซา อิซราเอน มาโซะ ปี ดูโดะ เดะ นังฆรี คานาอัน_ กูญา ซัจๆ ปี ซือซัจ ฌาลัด_ มือญือมัฮ กะ บราลา อีตู.” 5กะฆีเตอ ฌูฆา เดะ วะตู อีนี_ อาดา ลือเบฮ ซือมียา กิดีกิ_ นู ตูฮัด ปีเลฮ ดัฮ_ กรานา ญา ฮาลัย บรี ซือลามัจ กะ กูญา. 6ตาปี ดัฮ ตูฮัด ปีเลฮ กูญา_ กรานา ญา ฮาลัย บรี ซือลามัจ เตอ_ กะฆีเตอ ญา ฮอย เตด ปีเลฮ กูญา_ กรานา ลาฆู ปือบูวัจ นะ กูญา. ดัฮ เตด กะฆีเตอ_ ลาฆู นู ญา ฮาลัย บรี ซือลามัจ เตอ_ ฮอย เตด ฌาดี ลาฆู ซูโงฮ ลาฆี เลอ.
7ดัฮ กะฆีเตอ_ นะ ฌาดี กะฮามี เลอ? ลาฆู อีตู_ นู ลูมอฮ บักซา อิซราเอน มียา ดัฮ_ ลาฆู อีตู กูญา ฮอย เตด บือเลฮ ดาปัจ เลอ. ตาปี โกะ ซือมียา กิดีกิ_ นู ตูฮัด ปีเลฮ ดัฮ_ กูญา เลอ_ บือเลฮ ดาปัจ ลาฆู อีตู ดัฮ. โซะ ซือมียา นู ฆีลาฆี_ กูญา ตือฆัยํ ฮาตี ดัฮ_ 8บือกะ อาดา เดะ ซูรัจ ปือมือเลา นะ ตูฮัด นู จะ
“ตูฮัด เดะ อาตัซ บรี กะ กูญา อาดา ฮาตี กือบัซ_
บรี อาดา มาตา นู ลีฮัจ เตด บือฆารี_
อาดา ตือลีงา นู ดืองัยํ เตด บือเลฮ_
ตือดะ รอจ กะ อารี อีนี เลอ #
ปฮก 29.4; อซย 29.10 .”
ญา จะ. 9ราฌา ดาวิด ญา บือเลฮ มือเลา กะฆีนี ฌูฆา จะ
“มีตา บรี ลาฆู มากัด บรามัย นะ กูญา_
นะ ฌาดี ปือมีเตฮ นู รีฆะ กูญา_
ฌาดี ตือปัจ นู บรี กูญา ตือซีปะ รือบัฮ_
บรี กูญา กือนา ฮูโกบ ปาเระ.
10 มีตา บรี มาตา นะ กูญา นะ บือดาบู_
บีดา กูญา นะ ลีฮัจ เตด บือฆารี_
มีตา บรี บลากัก นะ กูญา บูโกะ ซือลาลู_
กรานา ลาฆู ซูซัฮ เลอ #
มปต 69.22-23; 35.8 .”
ญา จะ.
ลูมอฮ บักซา อาซิก นะ ฮีโดะ ลือปัซ บาฌิ
11กู นะ ตาญา กะฆีนี จะ_ “นู ลูมอฮ บักซา อิซราเอน ตือซีปะ ดัฮ_ กะฆีเตอ กูญา รือบัฮ ฮาบิฮ ดัฮ เฆอ?” เตด โบะ. ฮอย เตด ฌาดี กะฆีเตอ. ตาปี นู กูญา บูวัจ ซาลัฮ ดัฮ_ บือเลฮ บูกา จือลัฮ บรี ลูมอฮ บักซา อาซิก_ นะ ฮีโดะ ลือปัซ บาฌิ ฌูฆา_ บีดา ลูมอฮ อิซราเอน นะ ดือกี กะ กูญา. 12ตาปี ดัฮ_ นู ลูมอฮ อิซราเอน บูวัจ ซาลัฮ ดัฮ เตอ_ บือเลฮ บูวัจ บรี โกะ ซือมียา เดะ ดือนียา_ ซาโมจ ลาฆู บาฌิ บาญะ ซูโงฮ ดัฮ. นู ฮาตี นะ กูญา อาลัฮ ดัฮ โปด_ บือเลฮ บูวัจ บรี ลูมอฮ บักซา อาซิก_ ซาโมจ ลาฆู บาฌิ บาญะ ซูโงฮ ดัฮ เลอ. กะฆีเตอ_ วะตู ลูมอฮ อิซราเอน ซือมูฮา นะ บาฌิ ปาเระ ฌางัน ตูฮัด เตอ_ ลาฆู บาฌิ บาญะ ลือเบฮ เดะ อีตู ปูลัก_ นะ มาแรฮ.
13นี เลอ_ กู นะ มือเลา ฌางัน กาเญา_ นู ฌาดี บักซา อาซิก_ กรานา กู ฌาดี ปือญูโรฮ_ นู ตูฮัด ซูโรฮ ปี อาฌัยํ โกะ ลูมอฮ บักซา อาซิก เตอ_ กู นะ งันตืองัน เดะ ลาฆู นู กู บือกรือฌา กะฆีเตอ เลอ. 14นากือนา เตอ_ กู นะ บือเลฮ บูวัจ บรี โกะ ซือมียา บักซา นะ กู นะ ดือกี_ บีดา กูญา ซือตืองัฮ นะ บือเลฮ ฮีโดะ ลือปัซ บาฌิ ฌูฆา. 15กรานา จะ_ นู ตูฮัด กีปัซ กูญา บูวัก เตอ_ บูวัจ บรี โกะ ซือมียา เดะ ดือนียา บาฌิ ปาเระ ฌางัน ตูฮัด ดัฮ. กะฆีเตอ_ วะตู ตูฮัด ซาโมจ กูญา ปาเระ_ นะ ฌาดี กะฮามี? นะ ฌาดี บือกะ ลาฆู ฮีโดะ ปาเระ เดะ มาตี เลอ. 16กะฆีเตอ_ ดัฮ กรัจ ตือโปก กือโตน ลามูลา_ ซรัฮ บรี กะ ตูฮัด_ ตือโปก อีตู ฌาดี นะ ตูฮัด_ ฮาบิฮ ซือกือโตน.#กีรา 15.19-20 ดัฮ โกะ ฌากัยํ ปูโฮด กายู_ กือนา ซรัฮ บรี กะ ตูฮัด_ โกะ ดาฮัด โปด_ ฌาดี นะ ญา ฌูฆา เลอ.
17ลูมอฮ บักซา อิซราเอน_ ญา ซือรูปา ปูโฮด กือดูโนด#11.17 ปูโฮด กือดูโนด นังฆรี อิซราเอน_ ญา อาซิก เดะ ปูโฮด กือดูโนด นังฆรี ซียับ. ลูมอฮ อิซราเอน ตานัม ปูโฮด กือดูโนด บาญะ ซูโงฮ. บูวัฮ กูญา มากัด_ มีญะ กูญา อาเมด บอฮ เดะ ปลีตา. เดะ กือโบด_ นู โกะ ดาฮัด ซือตืองัฮ กือนา ลือกับ บูวัก ดัฮ. เกา นู ซือมียา บักซา อาซิก เตอ_ เกา ซือรูปา ดาฮัด ปูโฮด กือดูโนด ฮูตัด_ นู กือนา อาเมด มาแรฮ บือฮูโบก_ ฌางัน ปูโฮด นู บาฌิ อีตู_ บีดา เกา นะ ซาโมจ ลาฆู บาฌิ ซือลามัจ นะ ฌากัยํ อีตู_ ฌาดี จะ_ นะ ลูมอฮ บักซา อิซราเอน. 18กะฆีเตอ_ ฌางัน บรี เกา งันตืองัน_ เดะ โกะ ดาฮัด นู กือนา ลือกับ บูวัก ซีงี เตอ. โบะ เกา ฮอย ตือปัจ นะ งันตืองัน ดัฮ เลอ. เกา นู ฌาดี ดาฮัด_ บูกัด เกา บูวัจ บรี ฌากัยํ บือตูโมฮ_ ตาปี ฌากัยํ เลอ_ นู บูวัจ บรี เกา บือตูโมฮ.
19ตาปี เกา นะ มือเลา จะ_ “ตูฮัด บือเลฮ ลือกับ โกะ ดาฮัด อีตู บูวัก ดัฮ เตอ_ บีดา นะ บือเลฮ บือฮูโบก กู เลอ.” 20ซูโงฮ_ ตาปี กูญา กือนา ลือกับ บูวัก_ กรานา กูญา เตด ปือจายา. เกา โปด_ ดูโดะ กือฌะ_ กรานา เกา ปือจายา ดัฮ. กะฆีเตอ_ ฌางัน บรีงัจ มือนูโญะ กะ ญาวา ตะอาซิก_ ตาปี กือนา บรีงัจ ตาโกจ เดะ ตูฮัด เลอ. 21ดัฮ ตูฮัด เตด บือเลฮ ตาโรฮ โกะ ดาฮัด ลามูลา_ ฌาดี จะ_ ลูมอฮ อิซราเอน เตอ_ ญา นะ ฮอย เตด ตาโรฮ เกา ฌูฆา ดัฮ เลอ. 22กะฆีเตอ ลีฮัจ เลอ_ ตูฮัด เดะ อาตัซ ญา อาดา ฮาตี ตือจีฮัด_ ฌางัน ฮาตี กรัซ ซามา. ญา ฮาตี กรัซ ฌางัน โกะ ซือมียา_ นู รือบัฮ ซือซัจ ฌาลัด ดัฮ_ ตาปี ญา ฮาตี ตือจีฮัด กะ เกา เลอ_ ดัฮ เกา บูวัจ ตูโรจ บรี บือฆูนา_ ฌางัน ลาฆู นู ญา ฮาตี ตือจีฮัด อีตู. เตด กะฆีเตอ_ เกา โปด_ นะ กือนา กรัจ ตีงัน บูวัก ฌูฆา ดัฮ เลอ. 23ตาปี โซะ โกะ ลูมอฮ อิซราเอน เตอ_ ดัฮ กูญา บราเลฮ ฮาตี มาแรฮ ปือจายา ปูลัก เตอ_ กูญา นะ กือนา บือฮูโบก ปาเระ ฌูฆา เลอ. ตูฮัด ญา มือฆัฮ_ นะ บูวัจ กะฆีเตอ โปด_ บือเลฮ. 24กะฆีเตอ เลอ_ เกา ซือมียา บักซา อาซิก_ ซือรูปา ดาฮัด นู กือนา กรัจ เดะ ปูโฮด กือดูโนด ฮูตัด_ ตาปี กือนา บือฮูโบก ปูลัก ดัฮ_ เดะ ปูโฮด กือดูโนด เดะ กือโบด. บาญะ ลือเบฮ เดะ อีตู เลอ_ ตูฮัด นะ บือเลฮ อาเมด โกะ ดาฮัด นู กือนา ลือกับ เดะ ปูโฮด กือโบด อีตู_ ฌาดี จะ ลูมอฮ อิซราเอน เตอ_ มาแรฮ บือฮูโบก เดะ ปูโฮด นะ ญา ปูลัก เลอ.
ตูฮัด ญา ตือจีฮัด กะ อูมัจ ซือมียา ซือมูฮา
25โกะ ดีบราดี เออ_ อาดา ลาฆู ดาลับ ซูโงฮ ซา ลาฆู_ นู กู นะ บรี กะ กาเญา ตาฮู_ ตีเมา บรี กาเญา นะ อีงัจ จะ_ อีซี กาเญา ปานัย อากัน. ลาฆู ดาลับ ซูโงฮ อีนี_ ฌาดี จะ ลูมอฮ บักซา อิซราเอน ซือตืองัฮ ตือฆัยํ ฮาตี ดัฮ_ ตือดะ โกะ ลูมอฮ บักซา อาซิก_ นะ มาโซะ กะ ตูฮัด_ บรี ฆือนะ บาฌิ ดัฮ. 26กาลา ฌาดี กะฆีเตอ ดัฮ_ ลูมอฮ บักซา อิซราเอน ซือมูฮา_ นะ ฮีโดะ ลือปัซ บาฌิ เลอ_ บือกะ อาดา เดะ ซูรัจ ปือมือเลา นะ ตูฮัด นู จะ
“ซือมียา นู ตูโลก บรี ลือปัซ_ ญา นะ ตรือเบะ มาแรฮ เดะ นังฆรี ซีโอน
ญา นะ อาเมด ลาฆู ซาลัฮ เดะ บือแนฮ นะ ยาโกบ_ บูวัก บรี ฮาบิฮ #
อซย 59.20-21 .
27 กะฆีเตอ_ กู นี เลอ_ นะ บูวัจ ปือมือเลา บือปาคัจ บือตือตู อีนี ฌางัน กูญา
กาลา กู อาเกะ ดูซา นะ กูญา ดัฮ เลอ #
ยรม 31.33-34
.” ตูฮัด ญา จะ.
28ซาเบะ ลูมอฮ อิซราเอน ตีเมา ซาโมจ บรีตา นู บาฌิ เตอ_ กะฆีเตอ กูญา ฌาดี ซือตรู นะ ตูฮัด ดัฮ_ บีดา ลูมอฮ กาเญา นู ฌาดี บักซา อาซิก_ นะ บือเลฮ อูโตก. ตาปี ซาเบะ ลาฆู นู ตูฮัด ญา ปีเลฮ กูญา ดัฮ_ กูญา โปด_ ฌาดี ซือมียา นู ตูฮัด ซายัก_ กรานา ลีฮัจ กะ โกะ บีลาแก นะ กูญา เลอ. 29ซาเบะ จะ_ ตูฮัด เดะ อาตัซ ญา เตด บราเลฮ ฮาตี ลาลู_ ปาซัน นู ญา นะ บรี ซือลามัจ กะ ซือมียา ดีฮา_ นู ญา นะ ปีเลฮ ซือมียา ดีฮา โปด. 30บือกะ กาเญา_ ลูมอฮ บักซา อาซิก_ ดูลู กาเญา เตด บือเลฮ มือนีงัย กะ ตูฮัด เตอ. ตาปี วะตู อีนี_ ตูฮัด ตือจีฮัด กะ กาเญา ดัฮ_ ซาเบะ โกะ ลูมอฮ อิซราเอน ตีเมา มือนีงัย ดัฮ เลอ. 31กะฆีเตอ ฌูฆา_ ซาเบะ ตูฮัด บือเลฮ ตือจีฮัด กะ กาเญา ดัฮ เตอ_ วะตู อีนี_ ลูมอฮ อิซราเอน เตด มือนีงัย กะ ตูฮัด เลอ_ บีดา จะ ตูฮัด นะ ตือจีฮัด กะ กูญา ฌูฆา. 32ซาเบะ จะ_ ตูฮัด บือเลฮ กานัก ซือมียา ซือมูฮา_ บรี ฌาดี ซือมียา นู ตีเมา มือนีงัย_ บีดา ญา นะ บือเลฮ ตือจีฮัด กะ กูญา ซือมูฮา เลอ.
กือนา ปูฌี กะ ตูฮัด บือซัยํ เดะ อาตัซ
33ซูโงฮ เลอ_ ตูฮัด ญา ตือจีฮัด บาญะ โตระ. ญา เตอ_ ปานัย อากัน ซูโงฮ_ ญา เตอ เลอ_ นู ตาฮู ลาฆู ดาลับ ซือมูฮา. โกะ ปือมือเลา ฮูโกบ นะ ญา เตอ_ ฮอย ซาปา นะ บือเลฮ มือญาซัจ บรี ตาฮู. โกะ ปือบูวัจ นะ ญา โปด_ ฮอย ซาปา นะ บือเลฮ มาโซะ เดะ ฮาตี เลอ. 34บือกะ ซูรัจ ปือมือเลา นะ ตูฮัด นู จะ
“ซาปา เลอ_ นู ตาฮู ฮาตี นะ ตูฮัด เดะ อาตัซ?
ซาปา เลอ_ นู นะ ฌาดี ซาบัจ บือกีรา ฌางัน ญา #
อซย 40.13
?”
35 “ซาปา เลอ_ ดือละ บรี โกะ ซือบารัก มานามา กะ ตูฮัด_
บีดา ตูฮัด นะ บาลัซ ปาเระ กะ ญา #
โยบ 41.11
?”
36กรานา จะ_ โกะ ซือบารัก ราตา ซือมูฮา เตอ_ ดาตัก มาแรฮ เดะ ตางัน นะ ตูฮัด_ อาดา กือฌะ กรานา ญา_ อาดา ดูโดะ บีดา ปูฌี กะ ญา. ซือลามัจ เลอ กะ ตูฮัด_ ซือลาลู ซือมาญัก รอจ. อาเมน.
Currently Selected:
โรม 11: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
