มาระโก 1
1
โยฮัน มาแรฮ ซียะ ฌาลัด นะ ตูฮัด
(มัดทัย 3.1-12; ลูกา 3.1-18; โยฮัน 1.19-28)
1ซูรัจ อีนี เตอ_ ฌาดี ตือปัจ ฮืนตะ นะ บรีตา นู บาฌิ_ ปาซัน นะ เยซู_ ซือมียา นู กือนา ลือมัยํ มีญะ ฌาดี ราฌา_ ฌาดี นานะ นะ ตูฮัด เลอ. 2ญา ฮืนตะ_ บือกะ ลาฆู นะ อิซายา_ ซือมียา ตูโดฮ ลาฆู นะ ตูฮัด เตอ. ญา ฆาแรฮ ดัฮ จะ
“‘ลีฮัจ เลอ_ กู ซูโรฮ ปือญูโรฮ นะ กู_ บรี ญา ปี โซะ ฮือลด เกา
ญา เลอ_ นะ ซียะ ฌาลัด นะ เกา ดูลู เลอ.’_ ตูฮัด เดะ อาตัซ ญา จะ.#มลค 3.1 ”
3“อาดา ซือวารา ซือมียา บือซูระ_ เดะ ปาดัก ตานัฮ ตูโฮยํ นู ลือฆา จะ
‘กือนา ซียา ฌาลัด บรี ซุจ_ บีดา ตูฮัด นะ มาแรฮ เลอ
กือนา บือกรือฌา ฌาลัด นะ ญา_ บรี รือมัก ปี เลอ.’_ ญา จะ#อซย 40.3 .”
4กะฆีเตอ_ โยฮัน เตอ_ ญา มาแรฮ เดะ ปาดัก ตานัฮ ตูโฮยํ นู ลือฆา_ ญา บรี โกะ ซือมียา ซาโมจ ลาฆู ซือลับ เดะ อาเย. ญา มือญาเระ จะ_ “กาเญา ซือมูฮา_ บราเลฮ ฮาตี_ ซาโมจ ลาฆู ซือลับ เดะ อาเย เลอ. กะฆีเตอ_ ตูฮัด นะ อาเกะ ดูซา นะ กาเญา.”_ ญา จะ.
5กะฆีเตอ_ ซือมียา เดะ ราตา นังฆรี ยูเดีย_ ฌางัน ซือมียา เดะ นังฆรี เยรูซาเลม เตอ_ กูญา ซือมูฮา_ ปาคัจ ตรือเบะ ปี ซารี โยฮัน. กูญา ซาโงะ ลาฆู ดูซา นะ กูญา. กะฆีเตอ โยฮัน บูวัจ บรี กูญา ซาโมจ_ ลาฆู ซือลับ เดะ อาเย_ เดะ ซูงัย จอแดน.
6โยฮัน เตอ_ ญา ปือแญะ กาเยด_ บูวัจ ฌางัน บูลู อูตัย_ อาดา กูเละ บือนาตัก ฌาดี ตาลี ปีงัก นะ ญา. ญา บียาซา มากัด โกะ บลาลัก_ ฌางัน อาเย มีซัด มาทู. 7ญา มือญาเระ จะ_ “อาดา ซือมียา ซืออูรัก นู มือฆัฮ ลือเบฮ เดะ กู_ ญา นะ มาแรฮ เดะ บลากัก กู. ตาลี ปะตาปะ นะ ญา โปด_ กู เตด บือฆูนา นะ ตือมะ อูฆัย เลอ. 8กู บรี กาเญา ซือลับ เดะ อาเย เตอ_ ตาปี ซือมียา อีตู เลอ_ ญา นะ บรี กาเญา_ ซือลับ เดะ ซือมืองัจ นะ ตูฮัด.”_ ญา จะ.
เยซู มาแรฮ ซาโมจ_ ลาฆู ซือลับ เดะ อาเย
(มัดทัย 3.13-17; ลูกา 3.21-22)
9วะตู อีตู_ เยซู มาแรฮ_ ดาตัก เดะ ตูโปะ นาซาเรด_ เดะ โซะ นังฆรี ฆาลิลี. ญา ซาโมจ ลาฆู ซือลับ เดะ อาเย_ เดะ ซูงัย จอแดน_ นู โยฮัน บูวัจ บรี. 10ตานา เยซู ญาแญะ เดะ อาเย ดัฮ_ ดัดดัด อีตู_ ญา ลีฮัจ จะ_ ลาแงะ ตือบูกา ดัฮ. อาดา ซือมืองัจ นะ ตูฮัด_ ซือรูปา บูโรก ปาตี_ ญา ตูโรด มาแรฮ เดะ อาตัซ ญา. 11อาดา ซือวารา มาแรฮ_ ดาตัก เดะ โซะ ลาแงะ_ นู จะ_ “เกา เลอ_ ฌาดี นานะ นะ กู_ นู กู ซายัก. กู ซูกา ฮาตี กะ เกา บาญะ เลอ.”
เยซู กือนา ลกลีฮัจ
(มัดทัย 4.1-11; ลูกา 4.1-13)
12ดัดดัด อีตู_ ซือมืองัจ นะ ตูฮัด บูวัจ บรี เยซู มาโซะ ปี_ กะ ปาดัก ตานัฮ ตูโฮยํ นู ลือฆา. 13เยซู อาดา ดูโดะ ตือปัจ อีตู_ ปัจ ปูโลฮ อารี. กือปาลา ฮาตู ซีตัด ญา มาแรฮ บืออาฌะ ญา_ บรี บูวัจ ซาลัฮ. ปัจ อีตู อาดา บือนาตัก ฮูตัด ฌูฆา. อาดา ฮูลู บาลัก นะ ตูฮัด_ มาแรฮ ปือบือลา ญา.
เยซู มาแรฮ มือญาเระ บรีตา นู บาฌิ
(มัดทัย 4.12-17; ลูกา 4.14-15)
14ลือปัซ เดะ โยฮัน กือนา กานัก เดะ ปือฌารา ดัฮ_ เยซู เตอ_ ญา มาแรฮ กะ นังฆรี ฆาลิลี. ญา บรี ตาฮู บรีตา นู บาฌิ นะ ตูฮัด. 15ญา มือเลา จะ_ “วะตู นู บาฌิ_ ญา มาแรฮ ปือนอฮ ดัฮ. ตูฮัด เดะ อาตัซ_ ญา มาแรฮ ฌาดี ราฌา_ นะ ปือบือลา อูมัจ ซือมียา ดัฮ. กาเญา กือนา บราเลฮ ฮาตี บารู_ ปือจายา กะ บรีตา นู บาฌิ อีนี เลอ.”_ ญา จะ.
เยซู บลาโลก ซือมียา รีฆะ อีกัด_ ปัจ อูรัก
(มัดทัย 4.18-22; ลูกา 5.1-11)
16เยซู ญา บือฌาลัด ปี_ เดะ บีดิก ลาโวจ ฆาลิลี. ญา ลีฮัจ บือฆารี ซือมียา ดูวา อูรัก_ จะ ซีโมน_ ฌางัน อันดรู_ อาดี เดะ ญา. กูญา ตืองัฮ มือญาลา เดะ ลาโวจ_ ซาเบะ กูญา ฌาดี ซือมียา รีฆะ อีกัด. 17เยซู มือเลา กะ กูญา จะ_ “มาแรฮ ตูโรจ กะ กู เลอ. กู นะ บูวัจ บรี กาเญา ฌาดี_ ซือมียา รีฆะ ซือมียา.”
18ดัดดัด อีตู_ กูญา ตีงัน ฌาลา นะ กูญา บูวัก_ ตูโรจ ปี กะ เยซู ดัฮ. 19กะฆีเตอ_ เยซู ญา บือฌาลัด ปี ดีกิ_ ญา ลีฮัจ บือฆารี ยากอบ_ นานะ นะ เซเบดี_ ฌางัน โยฮัน_ อาดี เดะ ญา. กูญา ตืองัฮ บูโบน โกะ ปูกัจ_ เดะ ปราฮู นะ กูญา. 20ดัดดัด อีตู_ เยซู เตอ_ ญา ปาเงน ดูวา อูรัก อีตู. กะฆีเตอ_ กูญา ตีงัน เซเบดี_ ปะ เดะ กูญา_ นู อาดา เดะ ปราฮู_ บือซามา ฌางัน โกะ อานะ กูลี. กูญา ดูวา บราดี_ ตูโรจ กะ เยซู ปี ดัฮ.
ปือมือเลา นะ เยซู ซีดี ซูโงฮ
(ลูกา 4.31-37)
21กะฆีเตอ_ เยซู ฌางัน โกะ มูเระ นะ ญา_ ฌาลัด ปี_ กะ ตูโปะ คาเปอนาอุม. บารู_ เดะ อารี บราดู กรือฌา_ เยซู เตอ_ ญา มาโซะ ปี เดะ รูมัฮ บือมุน_ ปี อาฌัยํ ลูมอฮ ซือมียา. 22โกะ ซือมียา นู ดืองัยํ เตอ_ กูญา ปือและ ฮาตี ซูโงฮ นู ญา อาฌัยํ กะฆีเตอ_ ซาเบะ จะ_ เยซู อาฌัยํ กูญา_ บือกะ ซือมียา นู อาดา มือฆัฮ เลอ_ ฮอย เตด ซือรูปา โกะ ซือมียา อาฌัยํ ลาฆู ปือมือซัด นะ ตูฮัด.
23ดัดดัด อีตู_ เดะ รูมัฮ บือมุน นะ กูญา_ อาดา ซือมียา ซืออูรัก_ นู กือนา ฮาตู ตะอารัฮ มาโซะ ราโซะ เดะ ญาวา นะ ญา ดัฮ. ซือมียา อีตู เตอ_ ญา บือซูระ จะ 24“เออ เยซู_ อูรัก นาซาเรด_ เกา มาแรฮ บือฆาโดฮ ลูมอฮ กามี บูวัจ นามา เลอ? เกา มาแรฮ_ นะ บูวัจ บรี ลูมอฮ กามี ฌาฮานัม เฆอ? กู ตาฮู จะ_ เกา เตอ_ ซือมียา นู บาฌิ บือซรี นะ ตูฮัด บือซัยํ เดะ อาตัซ เลอ.”_ ญา จะ.
25ตาปี เยซู เตอ_ ญา อูจะ บลารัก ฮาตู อีตู จะ_ “กือนา ซืองะ บูวัก เลอ. ตรือเบะ เดะ ญาวา ซือมียา อีตู_ ปี ญัฮ เลอ.”
26ฮาตู นู ตะอารัฮ ซีงี เตอ_ ญา บูวัจ ซือมียา อีตู ฌู มืองือตัจ. ญา บรือแกว บูริ. กะฆีเตอ_ ฮาตู ญา ตรือเบะ เดะ ญาวา นะ ญา_ ปี ดัฮ. 27โกะ ซือมียา ซือมูฮา_ กูญา ปาคัจ ปือและ ฮาตี ซูโงฮ_ บือตาญา-ตาญา ซามา กูญา จะ_ “ลาฆู อีนี ฌาดี กะฮามี เลอ? ซูโงฮ เลอ_ ซือมียา อีนี_ อาฌัยํ ลาฆู นู บารู. ญา อาฌัยํ ฌางัน ปือมือเลา นู มือฆัฮ. มีเซ จะ ฮาตู ตะอารัฮ โปด_ ซือมียา อีนี ญา ปือซัด_ ฮาตู ฆาโดฮ ตูโรจ ปือมือซัด นะ ญา.”_ กูญา จะ.
28กะฆีเตอ_ ลาฆู นะ เยซู กรือจัย ปี ราตาๆ_ เดะ โซะ นังฆรี ฆาลิลี.
เยซู ปือบือลา ซือมียา_ บาญะ อูรัก
(มัดทัย 8.14-17; ลูกา 4.38-41)
29กะฆีเตอ_ เยซู ฌางัน โกะ มูเระ นะ ญา เตอ_ กูญา ตรือเบะ ปี_ เดะ รูมัฮ บือมุน_ ปี มาโซะ เดะ รูมัฮ นะ ซีโมน#1.29 ฌาดี จะ_ เปโตร_ ฌางัน อันดรู. ยากอบ ฌางัน โยฮัน ปี ซามา.
30มะ มือตูฮา นะ ซีโมน เตอ_ ญา ตีโนะ เตด ซือนัง_ ตืองัฮ ฮูวัจ เลอ. ตานา เยซู มาโซะ กะ ดาลับ รูมัฮ_ ดัดดัด กูญา บรี ญา ตาฮู_ ปาซัน นีบีนี อีตู. 31เยซู เตอ_ ญา ปี ปือฆัก ตางัน นีบีนี อีตู_ อาปู ปือบีกัซ. กะฆีเตอ_ ฮูวัจ อีตู ฮอย ดัฮ_ ญา ซือนัง บาฌิ เลอ. ญา ตูโลก บือกรือฌา มากัด_ บรี กะ กูญา.
32วะตู ปะฮือญา_ มาตาอารี นะ ฆูโฆยํ ดัฮ_ กูญา ปาคัจ บาวา โกะ ซือมียา เตด ซือนัง ญาวา_ ฌางัน โกะ ซือมียา นู อาดา ฮาตู มาโซะ_ ราโซะ ดัฮ เตอ_ มาแรฮ ซารี เยซู ซือมูฮา. 33ซือมียา ซือตูโปะ_ กูญา ปาคัจ มาแรฮ_ ปือนอฮ เดะ ลามัน รูมัฮ อีตู. 34เยซู เตอ_ ญา ปือบือลา ซือมียา เตด ซือนัง ญาวา อาดา ปือญาเกะ แนฮฌือแนฮ_ บาญะ อูรัก. ญา โปรฮ โกะ ฮาตู บาญะ_ บรี ตรือเบะ ปี ฮาบิฮ ดัฮ. ญา บลารัก ฮาตู_ ตีเมา บรี มือเลา นามา โปด_ ซาเบะ ฮาตู อีตู เตอ_ กูญา กราลา เยซู.
เยซู ปี มือญาเระ ลาฆู นะ ตูฮัด
(ลูกา 4.42-44)
35โซะ มูกัยํ_ วะตู กือลับ ลาฆี_ เยซู บีกัซ ตรือเบะ ปี_ กะ ตือปัจ ฮอย ซือมียา. ปัจ อีตู_ ญา บือซาโวจ กะ ตูฮัด. 36กะฆีเตอ_ ซีโมน ฌางัน กาวัด นะ ญา เตอ_ กูญา ตรือเบะ ปี ตูโรจ กะ เยซู. 37ตือปัจ อีตู_ กูญา มือเลา ฌางัน ญา จะ_ “ซือมียา ซือมูฮา ปาคัจ มียา เกา.”
38ตาปี เยซู มือเลา ฌางัน กูญา จะ_ “โฌฮ_ บรี กีตา ปี กะ ตูโปะ อาซิก ปูลัก_ บีดา นะ มือญาเระ ลาฆู นะ ตูฮัด_ ปัจ อีตู ฌูฆา. กรานา กู มาแรฮ ดัฮ_ นะ บูวัจ กะฆีเตอ เลอ.”
39กะฆีเตอ_ เยซู บือฌาลัด ปี_ เดะ นังฆรี ฆาลิลี ราตาๆ_ มือญาเระ ลาฆู นะ ตูฮัด_ เดะ โกะ รูมัฮ บือมุน นะ กูญา. โกะ ฮาตู โปด_ ญา โปรฮ บรี ตรือเบะ เดะ ซือมียา.
เยซู ปือบือลา ซือมียา ปือญาเกะ ปูรู
(มัดทัย 8.1-4; ลูกา 5.12-16)
40อาดา ซือมียา ปือญาเกะ ปูรู ซืออูรัก_ ญา มาแรฮ ซารี เยซู. ญา ตูกู ลูโตจ_ มีตา เดะ เยซู จะ_ “ดัฮ เกา อาดา ฮาตี นะ ปือบือลา กู_ กะฆีเตอ นะ บูวัจ บรี กู ซือนัง บือเลฮ เลอ.”
41กะฆีเตอ_ เยซู ตือจีฮัด กะ ซือมียา อีตู_ ญา อาเงา ตางัน_ ปือเตาะ เดะ ญาวา นะ ญา_ มือเลา จะ_ “กู อาดา ฮาตี นะ ปือบือลา เกา. บรี เกา ซือนัง บาฌิ เลอ.”
42ดัดดัด อีตู_ ปือญาเกะ ปูรู ฮอย ฮาบิฮ ดัฮ_ เดะ ญาวา นะ ญา_ ซือนัง บาฌิ ดัฮ เลอ. 43กะฆีเตอ_ เยซู ซูโรฮ ซือมียา อีตู ปี ดัดดัด. ญา บลารัก กะ ญา กือมัซๆ 44มือเลา จะ_ “ฌางัน จาเระ ลาฆู อีนี_ กะ ซือมียา ดีฮา โปด. ตาปี ปี เลอ_ มียา ซามี_ บรี ญา ลีฮัจ จะ_ เกา ลือฆา ดัฮ. มือนืองะ ซือบารัก มือญือมัฮ บรี กะ ตูฮัด เลอ_ บือกะ มูซา ปือซัด ดัฮ เตอ#เลวี 14.1-32_ บีดา นะ บรี ราตา ซือมียา ตาฮู จะ_ เกา ซือนัง บาฌิ ดัฮ.”_ เยซู ญา จะ.
45ตาปี ซือมียา อีตู_ ตรือเบะ ปี มือญาเระ ลาฆู อีตู ราตาๆ_ บูวัจ บรี บรีตา นะ เยซู กรือจัย ปี ราตา เลอ. กะฆีเตอ เยซู_ นะ มาโซะ ปี โซะ ตูโปะ นู ดีฮา_ เตด บือเลฮ_ ตาปี ญา กือนา ดูโดะ_ เดะ ลูวัยํ ตูโปะ_ เดะ ตือปัจ ฮอย ซือมียา. ปัจ อีตู_ อาดา ซือมียา ดาตัก เดะ ราตา ตือปัจ_ มาแรฮ ซารี ญา.
Currently Selected:
มาระโก 1: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
