ลามูลา 29
29
ยาโกบ ดาปัจ ฌางัน ราเชน
1กะฆีเตอ_ ยาโกบ ญา บือฌาลัด ลาฆี_ มาแรฮ รอจ กะ นังฆรี_ นะ โกะ ลูมอฮ ซือมียา โซะ ตีมอยํ. 2โซะ อีตู_ ญา ตีญุง ลีฮัจ บือฆารี_ ตลาฆา เดะ ปาดัก. อาดา กาวัด แบะ กาวัด กาเมก_ ตีฆา กาวัด_ ดูโดะ เดะ บีดิก ตลาฆา_ ซาเบะ ซือมียา ปือบือลา โกะ แบะ_ โกะ กาเมก_ ญา ดือละ จือบุ อาเย เดะ ตลาฆา บรี โกะ แบะ_ โกะ กาเมก โอะ. ตาปี อาดา บาตู บือซัยํ_ ตูโดก มูโลจ ตลาฆา. 3กาลา โกะ กาวัด บือนาตัก ซือมูฮา_ มาแรฮ บือมุน ฆือนะ ดัฮ_ เดะ บีดิก ตลาฆา เตอ_ ลูมอฮ ซือมียา ปือบือลา กาเมก โปด_ นะ ฆรือลิก บาตู อีตู_ เดะ มูโลจ ตลาฆา_ นะ จือบุ อาเย_ บรี โกะ แบะ_ โกะ กาเมก นะ โอะ. กะฆีเตอ กูญา นะ อาเมด บาตู อีตู_ ตูโดก มูโลจ ตลาฆา ปาเระ.
4ยาโกบ ตาญา กูญา จะ “ดีบราดี เออ_ กาเญา มาแรฮ ดาตัก ปัจ ดีฮา?”
กูญา ตีกัฮ จะ_ “กามี มาแรฮ ดาตัก เดะ ตูโปะ ฮาราน.”
5ยาโกบ ตาญา กูญา จะ_ “กาเญา กราลา ลาบัน_ นานะ นะ นาโฮระ เฆอ?”
กูญา ตีกัฮ จะ_ “กราลา.”
6ยาโกบ ตาญา จะ_ “ลาบัน ซือนัง บาฌิ เฆอ?”
กูญา ตีกัฮ จะ_ “ญา ซือนัง บาฌิ. ลีฮัจ เลอ_ อาดา ราเชน_ นานะ นีบีนี นะ ญา_ ญา ตืองัฮ บาวา กาวัด แบะ_ กาวัด กาเมก นะ ญา มาแรฮ.”
7ยาโกบ มือเลา จะ_ “อีนี ฌาดี วะตู ตืองัฮ อารี เลอ. เตด รอจ กะ วะตู_ นู นะ บรี กาวัด แบะ_ กาวัด กาเมก_ นะ บือมุน บือซามา. กือนา บรี กะ โกะ กาวัด บือนาตัก โอะ อาเย ดูลู_ บารู บาวา ญา บือปี_ มากัด รูโปจ เลอ”_ ญา จะ.
8ตาปี กูญา ตีกัฮ จะ_ “บูวัจ กะฆีเตอ_ เตด บือเลฮ เลอ. กามี กือนา นาตี_ บรี กาวัด แบะ_ กาวัด กาเมก_ บือมุน บือซามา ซือมูฮา ดูลู_ กามี บารู นะ ฆรือลิก บาตู_ เดะ มูโลจ ตลาฆา_ นะ จือบุ อาเย_ บรี ญา โอะ.”
9ตานา ยาโกบ ตืองัฮ มือเลา ฌางัน กูญา_ ราเชน โปด มาแรฮ ฌางัน กาวัด แบะ_ กาวัด กาเมก_ นะ ปะ เดะ ญา_ ซาเบะ ญา ฌาดี ซือมียา ปือบือลา_ กาวัด บือนาตัก อีตู. 10ตานา ยาโกบ ลีฮัจ บือฆารี ราเชน_ นานะ นะ ลาบัน_ นู ฌาดี วา เดะ ญา เตอ_ บือฆารี กาวัด แบะ_ กาวัด กาเมก_ นะ วา เดะ ญา ดัฮ_ ญา โปด ปี ฆรือลิก บาตู_ เดะ มูโลจ ตลาฆา_ จือบุ อาเย_ บรี กะ กาวัด แบะ_ กาวัด กาเมก_ นะ วา เดะ ญา โอะ เลอ. 11ยาโกบ จีโยบ ราเชน_ ญา มือนาแงฮ ซือวารา บือซัยํ กรานา ญา ซูกา ฮาตี. 12ญา มือญาเระ ฌางัน ราเชน จะ_ “กู ฌาดี กือมอน นะ ปะ เดะ เกา_ ฌาดี นานะ นะ เรเบคา.” กะฆีเตอ_ ราเชน บลารี ปี_ มือญาเระ กะ ปะ เดะ ญา.
13กาลา ลาบัน ดืองัยํ ลาฆู นะ ยาโกบ_ นานะ นะ อาดี เดะ ญา ดัฮ_ ญา บลารี ปี_ บือดาปัจ ฌางัน ยาโกบ_ กรด จีโยบ ญา_ บาวา ญา มาแรฮ กะ รูมัฮ. ยาโกบ มือญาเระ ลาฆู นะ ญา ซือมูฮา_ กะ วา ลาบัน. 14ลาบัน มือเลา ฌางัน ญา จะ_ “ซูโงฮ เลอ_ เกา ฌาดี ดารัฮ ซา อีตู ฌางัน กู เลอ.”_ กะฆีเตอ_ ยาโกบ ดูโดะ ฌางัน วา เดะ ญา_ ซา บูลัด ดัฮ.
ยาโกบ บือนีกัฮ ฌางัน นานะ ราดารา นะ ลาบัน
15กะฆีเตอ ลาบัน มือเลา ฌางัน ยาโกบ จะ_ “มีเซ จะ เกา ฌาดี กือมอน นะ กู_ เกา ฮอย เตด บือฆูนา นะ กรือฌา ฌางัน กู เปลาๆ_ ตีเมา อาเมด รือฆา อูปัฮ. กือนา มือญาเระ กะ กู เลอ_ เกา ซูกา นะ อาเมด รือฆา ฆาฌี บราปา?”
16ลาบัน เตอ_ ญา อาดา นานะ นีบีนี_ ดูวา อูรัก. นู กากา_ ปือนามา จะ เลฮา_ นู อาดี_ ปือนามา จะ ราเชน. 17มาตา นะ เลฮา_ ญา บือฆาจะ_ ตาปี ราเชน เตอ_ ญาวา ญา บือฆาจะ ซูโงฮ. 18ยาโกบ ซายัก ราเชน_ มือเลา ฌางัน วา เดะ ญา จะ_ “กู นะ บือกรือฌา ฌางัน วา_ ตูโฌฮ ตาโฮด_ บีดา กู นะ บือเลฮ บือนีกัฮ ฌางัน ราเชน_ นานะ นู บูซู นะ วา เลอ.”
19ลาบัน ตีกัฮ จะ_ “นู นะ บรี ญา บือนีกัฮ ฌางัน เกา_ บาฌิ เดะ นะ บือนีกัฮ ฌางัน ซือมียา อาซิก. โฌฮ_ เกา มาแรฮ ดูโดะ บือกรือฌา ฌางัน กู เลอ.”
20กะฆีเตอ_ ยาโกบ บือกรือฌา ฌางัน วา เดะ ญา_ ตูโฌฮ ตาโฮด ฆือนะ ดัฮ_ บีดา นะ บือนีกัฮ ฌางัน ราเชน. ญา ซายัก ราเชน บาญะ ซูโงฮ_ ญา อีงัจ จะ_ ดีกิ ตอจ อารี เลอ. 21เดะ บลากัก_ ยาโกบ มือเลา ฌางัน วา ลาบัน จะ_ “กู บือกรือฌา ฌางัน วา_ รอจ วะตู ดัฮ. บรี กู บือนีกัฮ_ ฌางัน นานะ นีบีนี นะ วา เลอ.”
22กะฆีเตอ_ ลาบัน มือเลา ฌางัน ซือมียา เดะ ตูโปะ_ บาญะ อูรัก_ บรี กูญา มาแรฮ บือฮีโปด_ มากัด โกะ ซือบารัก มากัด. 23ตาปี มาลับ อีตู_ ญา บาวา เลฮา_ นานะ นีบีนี นะ ญา_ มาแรฮ บรี กะ ยาโกบ. ยาโกบ โปด_ มาโซะ ปี มียา ญา. 24ลาบัน อาเมด ปราโซฮ ซืออูรัก_ ปือนามา ซินปา_ บรี กะ เลฮา_ นานะ นะ ญา_ บรี ฌาดี ปราโซฮ นีบีนี นะ ญา.
25ตาปี วะตู ปาฆี_ ยาโกบ ญา บารู ลีฮัจ จะ_ ฌาดี เลฮา. กะฆีเตอ_ ญา ปี มือเลา ฌางัน ลาบัน จะ_ “บูวัจ นามา_ วา บูวัจ ลาฆู กะฆีนี ฌางัน กู? กู บือกรือฌา ฌางัน วา_ บีดา นะ บือนีกัฮ ฌางัน ราเชน_ บูกัด เฆอ?_ บูวัจ นามา วา กีจอฮ กู กะฆีนี?”
26ลาบัน ตีกัฮ กะ ญา จะ_ “เดะ นังฆรี นะ กามี_ ฮอย ฮาดัจ_ นะ บรี นู อาดี บือนีกัฮ_ ดูลู เดะ นู กากา. 27บียัยํ เลอ_ บรี ดูโดะ ฌางัน นีบีนี อีนี_ ซา มีงู ดูลู. เดะ บลากัก_ กู นะ บรี เกา บือนีกัฮ_ ฌางัน นู อาดี ปูลัก. ตาปี เกา กือนา บือกรือฌา ฌางัน กู_ ตูโฌฮ ตาโฮด ลาฆี”_ ญา จะ.
28ยาโกบ บูวัจ กะฆีเตอ_ ดูโดะ ฌางัน นู กากา_ ซา มีงู ฮาบิฮ ดัฮ. เดะ บลากัก_ ลาบัน บรี ยาโกบ บือนีกัฮ_ ฌางัน ราเชน_ นานะ นะ ญา ปูลัก.
29ลาบัน ญา อาเมด ปราโซฮ นะ ญา ซืออูรัก_ ปือนามา บินฮา_ บรี กะ ราเชน_ นานะ นะ ญา_ บรี ฌาดี ปราโซฮ นีบีนี นะ ญา. 30กะฆีเตอ_ ยาโกบ มาโซะ ปี มียา ราเชน ฌูฆา. ญา ซายัก ราเชน_ ลือเบฮ เดะ เลฮา. ญา บือกรือฌา ฌางัน วา ลาบัน_ ตูโฌฮ ตาโฮด ปูลัก.
โกะ นานะ นะ ยาโกบ
31ตานา ตูฮัด บือซัยํ เดะ อาตัซ ลีฮัจ จะ_ ยาโกบ เตด ซูกา กะ เลฮา_ ญา บูวัจ บรี กะ เลฮา บือเลฮ นานะ_ ตาปี ราเชน ฌาดี ซือมือโฆจ. 32กะฆีเตอ เลฮา บือโปรจ ดัฮ_ ดูโดะ เดะ อาปี นานะ กีลากี_ บรี ปือนามา จะ รูเบน. #29.32 ปือนามา “รูเบน” ฌาดี จะ “ลีฮัจ เลอ นานะ กีลากี.” ญา มือเลา จะ “ซูโงฮ ตูฮัด บือซัยํ เดะ อาตัซ ลีฮัจ จะ_ กู ซูซัฮ ฮาตี ดัฮ_ กะฆีเตอ ลากี นะ กู นะ ซายัก กู.” 33ญา บือโปรจ ปูลัก_ ดูโดะ เดะ อาปี นานะ กีลากี_ ญา มือเลา จะ_ “กรานา ตูฮัด บือซัยํ เดะ อาตัซ บือเลฮ ดืองัยํ จะ_ กู กือนา บือชี ดัฮ_ กะฆีเตอ ญา บรี กู อาดา นานะ กีลากี อีนี ฌูฆา.” ญา ตืองะ ปือนามา กะ นานะ อีตู จะ_ ซีเมโอน. #29.33 ปือนามา “ซีเมโอน” ฌาดี จะ “ญา ดืองัยํ.” 34ญา บือโปรจ ปูลัก_ ดูโดะ เดะ อาปี นานะ กีลากี. ญา มือเลา จะ “วะตู อีนี_ ลากี นะ กู นะ ลือกัจ ฌางัน กู_ ซาเบะ กู บรี ญา อาดา นานะ กีลากี ตีฆา อูรัก ดัฮ.” กะฆีเตอ ญา ตืองะ ปือนามา บรี กะ นานะ อีตู จะ_ เลวี. #29.34 ปือนามา “เลวี” ฌาดี จะ “ลือกัจ ดัฮ.” 35เลฮา ญา บือโปรจ ปูลัก_ ดูโดะ เดะ อาปี นานะ กีลากี. ญา มือเลา จะ_ “วะตู อีนี กู นะ มือโอจ กะ ตูฮัด บือซัยํ เดะ อาตัซ.” กะฆีเตอ_ ญา ตืองะ ปือนามา กะ นานะ อีตู จะ_ ยูดา. #29.35 ปือนามา “ยูดา”_ ฌาดี จะ_ “ปูฌี.” เดะ บลากัก ญา บราดู เดะ ลาฆู ดูโดะ เดะ อาปี.
Currently Selected:
ลามูลา 29: ULBIBLE
Highlight
Copy
Compare
Share
Want to have your highlights saved across all your devices? Sign up or sign in
