ปือบูวัจ 22
22
1“ลูมอฮ ดีบราดี ฌางัน โกะ อาโปก เออ_ วะตู อีนี บรี กาเญา มือนีงัย เลอ_ นู กู นะ มือเลา บือปูลัซ ญาวา_ เดะ ปาซัน นู กาเญา อาดู ดัฮ.”
2ตานา กูญา ดืองัยํ ดัฮ_ นู ญา มือเลา ฌาดี บาซา ฮีบรู_ โตระ กูญา ซืองะ ดัฮ. เปาโล มือเลา ลาฆี จะ_ 3“กู นี_ ฌาดี ซือมียา บักซา ยิว_ นู ดูโดะ เดะ อาปี เดะ นังฆรี ทาซัด_ โซะ นังฆรี ซิลีเซีย ดัฮ. ตาปี กู มาแรฮ บือซัยํ ญาวา เดะ นังฆรี อีนี เลอ. กู บลาฌัยํ ซูรัจ ฌางัน ฆามาลีเอน#22.3 ฆามาลีเอน ฌาดี ซือมียา ซัยํบือซัยํ เดะ ลูมอฮ ฟาริซี. ญา ฌาดี ซือมียา อาฌัยํ ปือมือเลา นะ ตูฮัด_ นู ราตา ซือมียา มือโอจ ฌาดี ซือมียา ปานัย อากัน. ลีฮัจ ปบ. 5.33-40 บรี บูวัจ ตูโรจ กะ ปือมือเลา ฮูโกบ_ นะ ลูมอฮ บีลาแก นะ กีตา_ กือมัซๆ. กู ราเฌด นะ ตูเฮะ กะ ตูฮัด เดะ อาตัซ_ บือกะ กาเญา ราเฌด เดะ อารี อีนี เลอ. 4ดูลู กู ปรือกัด ลูมอฮ ซือมียา นู ตูโรจ ลาฆู อีนี_ ฌู มาตี ดัฮ ซือตืองัฮ. กู อีกัจ ฌางัน ราตัย โกะ กีลากี_ โกะ นีบีนี_ อาตัจ กูญา ปี กะ ปือฌารา. 5กือปาลา ซามี ฌางัน ลูมอฮ บือมุน บือกีรา ซือมูฮา_ กูญา นะ มือเลา ฌาดี ซะซรี บือเลฮ จะ_ ลาฆู อีนี ซูโงฮ. กูญา อีตู กีเรบ ซูรัจ เดะ กู_ บรี กู บาวา ปี อาตัจ กะ ลูมอฮ ดีบราดี_ เดะ นังฆรี ดามัดกัด. กะฆีเตอ กู ปี ดัฮ_ บีดา นะ อีกัจ ฌางัน ราตัย ลูมอฮ ซือมียา อีตู_ บาวา กูญา มาแรฮ_ บรี กือนา ฮูโกบ เดะ นังฆรี เยรูซาเลม.
เปาโล จรือตา นู ญา ดาปัจ เยซู กะฮามี
(ปือบูวัจ 9.1-19; 26.12-18)
6“กาลา กู ตืองัฮ ฌาลัด ปี_ ซรือปะ นะ รอจ กะ นังฆรี ดามัดกัด_ โซะ ตืองัฮ อารี_ ดัดดัด อาดา บือซายา จรัฮ ดาตัก เดะ ลาแงะ_ บรือเงา โซะ กือลีลิก กู. 7กู รือบัฮ กะ ตานัฮ ดัฮ_ ดืองัยํ บูงี ซือวารา นู มือเลา ฌางัน กู จะ_ ‘เซาโล_ เซาโล เออ_ บูวัจ นามา ปะ เกา ตืองัฮ ปรือกัด กู?’
8“กู ตีกัฮ จะ_ ‘ตูฮัด เออ_ เกา ฌาดี ซาปา?’
“ญา มือเลา ฌางัน กู จะ_ ‘กู นี เลอ_ ฌาดี เยซู_ ซือมียา ตูโปะ นาซาเรด_ นู เกา ตืองัฮ ปรือกัด.’
9“ลูมอฮ ซือมียา นู อาดา บือซามา ฌางัน กู_ กูญา ลีฮัจ บือฆารี จรัฮ อีตู_ ตาปี กูญา เตด บือเลฮ ดืองัยํ ซือวารา_ นู มือเลา ฌางัน กู. 10กะฆีเตอ_ กู มือเลา จะ_ ‘ตูฮัด เออ_ กู นะ บูวัจ กะฮามี เลอ?’
“ตูฮัด ญา มือเลา ฌางัน กู จะ_ ‘บีกัซ เลอ_ มาโซะ ปี กะ นังฆรี ดามัดกัด. โซะ อีตู_ อาดา ซือมียา นะ บรี กะ เกา ตาฮู_ ลาฆู ซือมูฮา นู ตูฮัด ตืองะ ดัฮ_ บรี เกา นะ บือเลฮ บูวัจ.’
11“ตานา กู ลีฮัจ เตด บือฆารี_ กรานา จรัฮ นู บือซายา อีตู ดัฮ_ โกะ ซือมียา นู อาดา บือซามา_ กูญา ปือฆัก ตางัน นะ กู_ ตูโตด บาวา บือปี มาโซะ กะ นังฆรี ดามัดกัด.
12“อาดา ซือมียา ซืออูรัก_ ปือนามา อานานียา. ญา ฌาดี ซือมียา นู ตูเฮะ กะ ตูฮัด_ ตูโรจ ปือมือเลา ฮูโกบ นะ กีตา. ลูมอฮ บักซา ยิว นู ดูโดะ โซะ นังฆรี อีตู_ กูญา มือโอจ กะ ญา_ ซือมูฮา. 13ญา เตอ_ มาแรฮ ซารี กู ดัฮ_ ญา บือดีรี ดาปิก กู_ มือเลา จะ_ ‘มิ เซาโล เออ_ บรี เกา ลีฮัจ บือฆารี ปูลัก เลอ.’
“ดัดดัด กู ลีฮัจ บือฆารี ญา. 14ญา มือเลา ฌางัน กู จะ_ ‘ตูฮัด นะ ลูมอฮ บีลาแก นะ กีตา_ ญา ปีเลฮ เกา ดัฮ_ บรี เกา นะ ตาฮู ลาฆู เดะ ฮาตี นะ ญา_ บรี เกา นะ ลีฮัจ ซือมียา อีตู นู บาฌิ ตือปัจ_ บรี เกา นะ ดืองัยํ ปือมือเลา_ นู ญา มือเลา ฌางัน เกา ดัฮ. 15กะฆีเตอ_ เกา นะ ฌาดี ซะซรี ปาซัน ญา_ กะ ลูมอฮ ซือมียา ซือมูฮา_ ฌาดี ลาฆู นู เกา ลีฮัจ บือฆารี ดัฮ_ ดืองัยํ ดัฮ. 16ตาปี วะตู อีนี_ บูวัจ นามา เกา นะ นาตี ลาฆี. บีกัซ เลอ_ ซาโมจ ลาฆู ซือลับ เดะ อาเย. บลาโลก เลอ_ ซือโบจ ปือนามา นะ เยซู_ บีดา บรี ตูฮัด นะ บาโซฮ ดูซา นะ เกา.’ ญา จะ.”
ตูฮัด บือเลฮ ซูโรฮ เปาโล ปี กะ ลูมอฮ ซือมียา บักซา อาซิก
17กะฆีเตอ_ เปาโล มือเลา ลาฆี จะ_ “กาลา กู บาลิ กะ นังฆรี เยรูซาเลม ดัฮ_ ตืองัฮ กู อาดา บือซาโวจ เดะ รูมัฮ มือญือมัฮ ตูฮัด อาดา ลาฆู ปลีฮัจ กะ กู กะฆีนี. 18กู ลีฮัจ ตูฮัด มาแรฮ มือเลา ฌางัน กู จะ_ ‘ตรือเบะ ตีงัน นังฆรี เยรูซาเลม ปี งัจบางัจ เลอ_ กรานา ลูมอฮ ซือมียา ปัจ อีนี_ นะ เตด ซาโมจ ลาฆู นู เกา มือเลา ฌาดี ซะซรี_ ปาซัน กู ดัฮ.’
19“โซะ กู_ ตีกัฮ จะ_ ‘ตูฮัด เออ_ กูญา อีนี ตาฮู ซูโงฮ จะ_ นู กู บือเลฮ ปี กะ โกะ รูมัฮ บือมุน รีฆะ ซือมียา ปือจายา กะ เกา_ รือเปะ กูญา. 20กาลา ซือตีเฟน_ ซือมียา นู บือเลฮ มือเลา ฌาดี ซะซรี_ ปาซัน ลาฆู นะ เกา_ ญา กือนา บูนอฮ ดัฮ เตอ_ กู นี_ อาดา บือดีรี ดาปิก_ ลีฮัจ จะ_ ปือบูวัจ นะ กูญา บาฌิ ดัฮ. ลูมอฮ ซือมียา นู บูนอฮ ญา_ กูญา กีเรบ โกะ บาฌู นะ กูญา เดะ กู ฌูฆา.#ปบ. 7.51—8.1’ กู จะ.
21“ตาปี ตูฮัด มือเลา ฌางัน กู จะ_ ‘เกา ปี เลอ. กู นะ ซูโรฮ เกา ปี ฌาโวฮ_ บรี ซารี ลูมอฮ บักซา อาซิก.’ ” เปาโล ญา จะ.
เปาโล ฌางัน กือปาลา ตาฮัน นะ ลูมอฮ โรม
22ลูมอฮ ซือมียา ดืองัยํ เปาโล_ ตือดะ รอจ กะ ปือมือเลา จะ_ ลูมอฮ บักซา อาซิก ซีงี. บารู กูญา มูซัยํ_ ฮึนตะ นะ บือซูระ_ บูงี ซือวารา บือซัยํ จะ_ “ซือมียา อีนี ฮอย เตด บือฆูนา นะ ฮีโดะ ลาฆี. อาเมด ปี บูนอฮ บูวัก เลอ.”
23กูญา ซือมูฮา บือซูระ บูริ_ ซือวารา บือซัยํ. กูญา อูฆัย บาฌู นะ กูญา_ ลามัย ปี มาแรฮ_ อาเมด ฮาบู ตานัฮ_ ปรัก กะ อาตัซ ลาแงะ. 24กือปาลา ตาฮัน นู บือซัยํ อีตู_ ญา ปือซัด บรี บาวา เปาโล_ มาโซะ กะ ดาลับ รูมัฮ ตาฮัน_ บรี รือเปะ ญา_ ซาซัจ มือโซะ บรี ตาฮู จะ_ บูวัจ นามา กูญา บือซูระ บือลาวัด ญา กะฆีเตอ. 25ตานา กูญา ตืองัฮ อีกัจ เปาโล ฌางัน ตาลี_ ญา มือเลา ฌางัน กือปาลา ตาฮัน ซืออูรัก_ นู บือดีรี ดาปิก_ ตาญา จะ_ “นู กาเญา นะ รือเปะ ซือมียา บักซา โรม ซือมียา นู เตด กือนา กรัจ ฮูโกบ ดัฮ เตอ_ กะฆีเตอ รือมัก ฌางัน ปือมือเลา ฮูโกบ นะ นังฆรี โรม เฆอ?”
26ตานา กือปาลา ตาฮัน อีตู ดืองัยํ กะฆีเตอ_ ญา มาโซะ ปี มือญาเระ กะ กือปาลา บือซัยํ_ จะ_ “เกา นะ บูวัจ กะฮามี เลอ? ซือมียา อีตู ฌาดี ซือมียา บักซา โรม.”
27กือปาลา บือซัยํ ญา ปี ตาญา เปาโล จะ_ “กือนา มือญาเระ กะ กู เลอ. เกา ฌาดี ซือมียา บักซา โรม เฆอ?”
เปาโล ตีกัฮ จะ_ “เออ_ กู ฌาดี กะฆีเตอ เลอ.”
28กือปาลา บือซัยํ อีตู มือเลา จะ_ “กู โปด_ บือเลฮ บายัยํ ดูเวะ บาญะ_ บีดา นะ ฌาดี ซือมียา บักซา โรม.”
ตาปี เปาโล ตีกัฮ จะ_ “ตาปี โซะ กู นี_ ฌาดี ซือมียา บักซา โรม_ ตะเดะ บือฌาดี มาแรฮ เลอ.”
29ลูมอฮ ตาฮัน นู ฆามะ นะ ซาซัจ เปาโล_ กูญา อูโนยํ ปี ดัดดัด. ตานา กือปาลา ตาฮัน นู บือซัยํ อีตู_ ตาฮู จะ_ ซือมียา นู ญา อีกัจ เดะ ราตัย ดัฮ_ ฌาดี ซือมียา บักซา โรม_ ญา โปด_ ตาโกจ โตระ ฌูฆา.
เปาโล โซะ ฮือลด ลูมอฮ บือมุน บือกีรา
30โซะ ปาฆี_ กือปาลา ตาฮัน นู บือซัยํ อีตู_ ญา ซูกา นะ ตาฮู ซูโงฮ จะ_ ฌาดี ลาฆู นามา_ นู โกะ บักซา ยิว อาดู เปาโล. กะฆีเตอ_ ญา ปลือปัซ เปาโล_ ญา ปือซัด บรี ลูมอฮ ซามี ซัยํบือซัยํ_ ฌางัน ลูมอฮ บือมุน บือกีรา ซือมูฮา_ นะ บือมุน บือซามา. ญา บาวา เปาโล บือปี_ บรี บือดีรี โซะ ฮือลด นู บือมุน บือกีรา อีตู.
Currently Selected:
ปือบูวัจ 22: ULBIBLE
Highlight
Share
Compare
Copy
Want to have your highlights saved across all your devices? Sign up or sign in
