Iba 18
18
Esɛ ogboogbo mgbi iBabyilon
1Ngwi ungwɔnɛ wa nyɛ nɛ ani di ongyesɔ oka kyɛ esho le ba esɛ. O dzɛ yi mfye okwulewo, man okwɔkwɔ mgban nu ɛsɛ gbosa. 2O feela mi ela okwukwo gbɛɛ:
<<Oblu-blu! Oblu-blu li Angbodzi iBabyilon!
O yɛɛ udɛ emɛsɛ bɛyi imbe mgbi ali onodzi ibwubwe
bɛyi imbe mgbi ingwunɔ ama ntsiidza di kyilitukwu.
3Ikyesinɛ ɛsɛ ama okwukwo
tsatsadu wa fyɛbyɛ amah mgban.
Utɔ emi ɛsɛ nɛ kyɔ amah biyan,
man ama okyummya mi ɛsɛ nɛ yɛɛ emi
aludu mi ikye imina mgban obube nani.>>
4Nɛta ani fwo ela oka kyɛ esho gbɛɛ:
<<Tasɛ mbon na, emidani,
ikye ni ema ka waabɔ mi ali ibwubwe mgban na ba,
adzi ni ema ka wo isɔ nka ba
mbon ntona ba mani;
5lubana ali ibwubwe mgban
kwutokɛ shigbo to esho,
Imgbasho di wɛ ungwɔ ibwubwe mgban.
6Nun dafi o teyi nu abu mani;
kpan mkpa dudɔ mi ungwɔ ngwi
o teyi kyɔ mani.
Yawon ungwɔ owaawa mi ibwɛ
no dzɛ mgban ma wo.
7Nun isɔ yi owulewo kpakpa
dafi o nu ewon okwɔkwɔ
bɛyi oshishe omyɛɛ-myɛɛ mani.
Ikyesinɛ mi itukwu mgban o tsaabɔ igɛgɛ gbɛɛ,
<Mmɛnɛ ani sɔdzɛ dafi Apodza mani;
ani li owakwadɛ ba,
ani dika kye abɔ tiko kpaa ba.>
8Ikyenghanɛ, isɔ ka gban sɔ:
ikwongye yi abɔ otiko yi ootse yi owulewo
bɛyi onenbwa omba enbwa ka ba mbon mi egbe onyi.
Ola ka kyon gye,
lubana Otsɛ Imgbasho ogbɔn ikwɔ ma datu.
9Onɔ ngwi utɔ emi ɛsɛ nɛ ama nkyɔ amah biyan di kyɔ oyabɔ mi omyɛɛ-myɛɛ mgban di iwu mgbi ola ogyeegye mgban yɔ, a ka tsukwu di kye abɔ tiko ikyon. 10Isɔ mgban ka wo ma imio, man a ka kwudzɛ fyata le gbɛɛ:
<< <Aho! Aho, ogalu ogbagbadzidzi,
Eye iBabyilon,
ogalu mfye!
Mi obyi onyi ta Imgbasho fwo abu ikwɔ waana!>
11Ama okyummya mi ɛsɛ nɛ ka tsukwu di kyelela ikyon, ikyekyɛ inggisɛ onyi le gya ma okye wuba 12okye abashi yi iyudza onzundzɛ okwɔkwɔ yi akwutsɛ osunse mi ifu mgbangyilole bɛyi akwutsɛ itagwude; angwuto ondlɛndlɛ, angwuto omuma shinishini yi angwuto ovelevele yi angwuto omuma jaan; ali itɔ afutse ama ogbungbɛ bɛyi ali itɔ idabɔ ngwi a kyɔ mi ɛvɛ mnii duu yi ekwɔ ama ofyumfye mmya yi itigbla yi iyudza bɛyi ikwutsɛ osunse; 13okye akwukwu mgbɛ, mgbi otse ogɛ iwu, engyie ofyunfyummya ogbungbɛ bɛyi ofufu otse otoola, eneekwɔ bɛyi engyie olivi, ofumbu osuse bɛyi alakama; mnda yi mmala; mmya yi ungwɔ ogbe okye sha ma; yi emi ofyɛɛ.
14<<A ka gbɛɛ, <Ungwɔ osuse nmina abu otu duu ma lu dzɛ abu ta wa. Aludu bɛyi okwɔkwɔ mgbi abu duu byulu, o ka yɛ tu ma wuba.> 15Ama okyummya ungwɔ ntonɛ nɛ, ntu aludu mbon ma ka kwudzɛ fyata, yi imio ewo mi isɔ mgban ogyeegye. A ka tsukwu di kyelela 16di kwu-ela tɔ gbɛɛ:
<< <Aho! Aho, angbodzi ogalu,
nmewo mi angwuto ondlɛndlɛ,
angwuto omuma shinishini bɛyi omuma jaan,
dile kwɔ yi abashi, akwutsɛ osunse yi akwutsɛ
osunse mi ifu mgbangyilole!
17Mi ongwonɔ gwee nɛta,
onikyɔ aludu mgbi ogalu nɛ bulu ngyɛ!>
<<Ali inggisɛ ama ofa iwudza eni, yi ama odzagaba mi iwudza eni duu, yi ama okyidɔ mi iwudza eni, yi ama okyummya nyɛ ongwi onikyekyoo duu, ka dzɛkɛ mbotunto mbyoo. 18Ni a wa di iwu oduudu mgbi ogyola-gyola mgban ma, a ka gbobakwɔ gbɛɛ, <Ogalu oka teyi dzɛma dafi ongbodzi ogalu nɛ jo?> 19A ka gbe abɔ dikye, le tsukwu di kyelela gbɛɛ:
<< <Aho! Aho, ongbodzi ogalu,
imbe ngwi ama ndzɛ yi iwudza eni
mi ekyoo okwukwo duu
yɛɛ emi awuya ikpewo aludu mgban!
Mi ongwonɔ gwee ta, o bulu waana!
20Flinɛ won na, emi esho!
Tsookwa won na, emi osaan yi ama
ogbikye iYesu bɛyi ama ogbɛɛsɛ!
Imgbasho fwon ikwɔ mi ungwɔ ngwi
o kyɔ yi ema ma wa.> >>
21Nɛ angbodzi ongyesɔ kyi kyelu ofishi nshe dafi onikwɔɔ okpinangwɔ mani kye ngwuta wokɛ ekyoo okwukwo, si gbɛɛ:
<<Yi itɔ abumfye nani
a ka kye angbodzi ogalu iBabyilon
ngwuta lu esɛ,
a ka din wuba.
22A ka fwo ela ozuna bɛyi ungwɔ ogboogbo, yi oca ofoofo bɛyi agba ofoofo, mbi abu wuba.
A ka tu inggisɛ idabɔ
onyi mbi abu wuba.
Ela inangwɔ okpaakpa
ka dede mbi abu.
23Osa ipitila ka tsotɔ
mbi abu wuba.
A ka fwo ela obongyaa
ofufɛ bɛyi ongyaa ofufɛ mbi abu wuba.
Ikyekyɛ ama okyummya mgbi
abu nose ngha mi ɛsɛ duu.
O nu ɛsɛ duu boofɛ mi obudei mgbi abu.
24A tu eyi mgbi ama ogbɛɛsɛ yi emi osaan,
bɛyi inggisɛ ngwu a
ngwɔ mi ɛsɛ duu mbon.>>
Currently Selected:
Iba 18: UTR
Highlight
Share
Compare
Copy
Want to have your highlights saved across all your devices? Sign up or sign in
©2024 Initiative for the Translation and Development of African Languages
