Iba 15

Engyesɔ egyafa yi isɔ egyafa

1Ani di ambɛ oka okwulewo kpakpa mi esho; engyesɔ nghi egyafa yi isɔ egyafa emi olɛlɛ, ikyekyɛ yi isɔ ntonɛ itingga mgbi Imgbasho ngyɛ. 2Ani di di ungwɔ ndzɛ dafi onekyoo idzinggi ngwuo yi ola, mi ele ma inggisɛ ama nngha mmbwaba na ika bɛyi adagyɛ mgban yi isɔ mgbi iyi mgban ma kwudzɛ to ele. Ali inggisɛ mgbi ama byi ozuna ngwi Imgbasho gbe nu ma mani 3di shashi mgbi iMose ongbidɔ mgbi Imgbasho bɛyi ashi mgbi Ongwummala gbɛɛ:

<<Ogbagbadzidzi bɛyi okwulewo li ungwɔ

mgbi abu okyɔɔkyɔ,

Otsɛ Imgbasho onghaangha.

Ofɛ mgbi abu li otsitsi yi oyɛyɛ,

Utɔ mgbi ɛsɛ duu.

4Li emɛ ka tsio abu ba, Otsɛ,

di kye mmwɛ nu mi iyi mgbi abu ba?

Lubana li abu yuo le saan.

Ɛsɛ duu kawa sunu abu,

ikyesinɛ ali mgbi abu osaan tsotɔ wa.>>

5Ngwi ungwɔ ntonɛ nyɛ nɛ, ani di a kye kwulu ozu okwukwo osunu Imgbasho mi esho bɛyi iTabenako Obwɛndɛ nani. 6Mi ozu okwukwo osunu Imgbasho na, engyesɔ egyafa tɔ yi isɔ nghi egyafa. A wo angwuto ondlɛndlɛ gbosinɛ kwɔ yi okpa abashi bwato igɛgɛ mgbi ama. 7Nɛ onyi mbi atta owamyɛ nghi enɛ ntona kye uga abashi egyafa nu engyesɔ egyafa ntona yi itingga mgbi Imgbasho mi ele kyɛɛ, Imgbasho ndzɛ oshishe gyegwu nɛni. 8Nɛ iwu mi okwɔkwɔ bɛyi mfye mgbi Imgbasho gbɛ ozu na sɔ man inggisɛ onyi kaka ele wuba nghataa isɔ egyafa mgbi engyesɔ egyafa ntona mbwumbwo.

Currently Selected:

Iba 15: UTR

Highlight

Compare

Copy