2 iTimoti 4

1N le wo abu ola nɛ mi inai Imgbasho yi iKrestu iYesu, ongwu nkawa ba yi esutɔ mgban owa gbɔ emi oshishe yi emi ikwukwɔ ikwɔ na gbɛɛ: 2Gbeesɔ; wewo alonɔ duu; kyɔkyɔ odzɛ yi inggisɛ di kwu inggisɛ ɛwɛ wo yi itukwu oshiishi kpakpa yi odzɛ owɛɛwɛ mi ola mi ola. 3Lubana onɔ kyɛma ngwi inggisɛ ka gbela wo otsootso osuse wuba. Ikyenghanɛ, mi okyɔ imina mgbi ama a ka gbe etsetse kwuba kwutokɛ yi ama nu ma le nya ma odzɛ ngwi adɔ le gba ma gbaagba ofwo mani. 4A ka fwa otsitsi diyɛ tsɔɔshɔ okyɛdɔ ayayi utsa. 5Nghaduu abu yɔ, kwu ewabu blii mi ali ofɛ duu, shitukwu mi adzɛ ogyeegye di kyidɔ mgbi inggisɛ ogbɔ Esɔ Osuse. Di kyɔ ali idɔ ngwi Imgbasho kye wo abu abɔ duu.

6Lubana ani yɔ a teyi kye ani yangwuta dafi ungwɔ owaawa mgbi ifɛ ofɛ-fɛ mani, onɔ mgbi ani okwulu le gyɔ. 7Ani gblika osuse, ani ngyɛlu idɔ ndzɛ mi ikye ani di kwulɛsɛ mi oyɛyɛ onuunu. 8Onɛnɛ okpapyi ngwi Imgbasho kye dzɛ ama osaan dzɛ le fɛ ani fɛɛfɛ, ngwi Otsɛ, ongye ogbiikwɔ mi otsitsi, kawa kye nu ani mi egbe nani, li ani ta ba, kpaa yi ama nle fɛ oyɛɛyɛ mgban duu.

Ola mgbi iPol abuon

9ITimoti, Fya mi ofyaafya mgbi abu ba mbi ani plɛ, 10lubana iDema, ikyegbɛɛ ɛsɛ nɛ kpan itukwu nɛ, o dzita ani lu iTesalonika. IKreskɛn lu iGalatia, iTaitusu di lu iDamatia. 11I sisi iLuku ta dzɛ yi ani, kye iMaki wafɔ yi abu ba ikyesinɛ o dzɛ yi ani abɔ oyaaya mi idɔ mgbi ani. 12Ani dɔ iTacikɔ esɔ lu Efesu. 13Ni abu ka ba yɔ, kye angwuto otukwu ofu ngwi ani dzanta yi iKapu mi iTroa, yi afɛ ofulufulu, onghaangha duu ama nghao li imɔ ngwi a mɛ mi okpa ntona byi.

14Alekidzanda inggisɛ onduufa kyɔ ani ungwɔ obube kpakpa. Otsɛ iYesu ka yile mkpa kpan mi ungwɔ ngwi o kyɔ nani. 15Abu kpaa gbɛwɛbyi ewabu mi ikye mgban, ikyekyɛ o kye afɔ twɛsɛ kpɔklɔɔ yi esɔ mgbi eyi.

16Ababɔ ngwi a kye ani ba mbi ongye ogbiikwɔ ma, inggisɛ onyi kpaa kyɛ ani iyikpa ba, ali inggisɛ duu tse dzɛnta. No ka yɛɛ ungwɔ obube mi ikye ma ba. 17Nghaduukpaa Otsɛ Imgbasho fyi ani anya di nu ani mfye, ikyegbɛɛ mi ikpewo ani nu ma gbeesɔ na saan ni Udzengye duu fwon. A di dulu ani tɔ mi ondu ugaba. 18Otsɛ ka dulu ani tɔ mi ali ika ibwubwe dika kye ani kaka esutɔ mgban ongwi esho saan. Mbon okwɔkwɔ dzɛ nghataa gyegwu. No dzɛ ngha.

Angba ongwi olɛlɛ

19Ta iPrisila angba yi Akwila bɛyi etɔ mgbi Onesiforu duu. 20Erastu dzɛ iKorinti ma, ani di dzata iTrofimu ladzɛ ootse mi iMiletu. 21Fya mi ofyaafya mgbi abu ni abu ba wa kaka mmɛnɛ duuse ni owa bɛsɛ. Eyubulu yi iPudɛn yi iLainusu yi iKladia bɛyi ama onoyɛyɛ duu le ta abu angba. 22Otsɛ no dzɛ yi onodzi mgbi abu. Elela mgban no dzɛ yi ema duu.

Currently Selected:

2 iTimoti 4: UTR

Highlight

Compare

Copy