1 iJɔn 5
5
Onoyɛyɛ mbi Ongwɛ Imgbasho
1Ali inggisɛ nnoyɛyɛ gbɛɛ iYesu li iKrestu ma yɔ, li ongwɛ Imgbasho, ma ali inggisɛ ndi otsɔngwɛ kpan itukwu yɔ, o li di ongwɛ kpaa kpan itukwu. 2Nɛnɛ li ofɛ ngwi eyi li ye gbɛɛ eyi di emi ongwɛ Imgbasho kpa eyi itukwu aani: mi odi Imgbasho kpa eyi itukwu di ngyo ola mgban. 3Eyi li tso okpitukwu mgbi eyi mbi Imgbasho mi ongyo ola mgban. Ma ola mgban se eyi undo ba, 4lubana ali ongwɛ Imgbasho duu ngha ɛsɛ. Ma eyi ngha ɛsɛ mi oyɛyɛ onuunu mgbi eyi. 5Li emɛ ka ngha ɛsɛ gbɛ? Li inggisɛ nnoyɛyɛ gbɛɛ iYesu li Ongwɛ Imgbasho mani.
6Nɛnɛ li iYesu iKrestu ma aani, ongwu a mban dafi inggisɛ owamyɛ mi eni yi eyi mani. Li mi eni kyoon ngwi a mban ba, kpaa li mi eni bɛyi eyi. Ma li Onodzi mgbi Imgbasho kyɔ obwɛndɛ mi odzɛ nɛni, ikyekyɛ Onodzi na li gbatsika ba. 7Lubana ama eta duu kyɔ obwɛndɛ mi otsitsi odzɛ nɛni. 8Onodzi, eni, bɛyi eyi; ama eta duu di kyɔ obwɛndɛ ungwonyi. 9Eyi noyɛyɛ mi obwɛndɛ mgbi inggisɛ, kpaa obwɛndɛ mgbi Imgbasho shewo ngha, ikyekyɛ li obwɛndɛ mgbi Imgbasho abuon, ngwi o nu mi ikye Ongwan. 10Ali inggisɛ nnoyɛyɛ mbi Ongwɛ Imgbasho tayɔ, dzɛ yi obwɛndɛ nɛ mi itukwu mbon. Nghaduu ali inggisɛ nnu Imgbasho oyɛyɛ bayɔ, kwu Imgbasho onya, ikyekyɛ o noyɛyɛ mi obwɛndɛ ngwi Imgbasho nu mi ikye Ongwan nɛ ba. 11Di li obwɛndɛ ma aani: Imgbasho kye oshishe igyegwu nu eyi, ma oshishe nɛ li mbi Ongwan. 12Inggisɛ ndzɛ yi Ongwɛ Imgbasho dzɛ yi oshishe; kpaa ongwu ndzɛ yi Ongwɛ na ba dzɛ yi oshishe ba.
Okye odzɛ ngwikpa
13Ani lɔ ungwɔ ntonɛ kɛ mbi ema ama nnoyɛyɛ mi iyi mgbi Ongwɛ Imgbasho ma adzi ni ema ye gbɛɛ ema dzɛ yi oshishe ogyegwu mani. 14Nɛnɛ li abɔ otsigɛgɛ ngwi eyi dzɛyan mi oba kwɛkwɛ yi Imgbasho aani: gbɛɛ alungwɔ ngwi eyi bɔ mi oweka mgban tawa, o ka fwo eyi. 15Ma ni eyi ye gbɛɛ o li fwo eyi yɔ, alungwɔ ngwi eyi bɔ duu, eyi noyɛyɛ ta gbɛɛ eyi tu wa.
16Kini inggisɛ di ongwunɔn kyɔ alobube nkyon kɛ ikwongye bayɔ, no bibɔ ikyon adzi ni Imgbasho nun oshishe. N gbɔ ikye ama ngwu alobube mgbi ama lu nghataa kɛ ikwongye na ba. Alobube dzɛma nli kye inggisɛ kɛ ikwongye. N le gbɛɛ no bibɔ mi ikye ongwu na ba. 17Ali imbaali duu li alobube, ma alobube toma nli kye inggisɛ kɛ ikwongye ba gbɛ.
18Eyi ye ta gbɛɛ inggisɛ nli ongwɛ Imgbasho yɔ, li kyɔ alobube alonɔ-alonɔ ba; ikyekyɛ Ongwɛ Imgbasho na li ngyon, Ongyikyili na ka yagba kyɔn unka gbɛ ba. 19Eyi ye gbɛɛ ngwi Ongyikyili na kye ɛsɛ nɛ duu le teyi nɛ kpaa, eyi li emi ongwɛ Imgbasho. 20Nghanɛ, eyi di ye gbɛɛ Ongwɛ Imgbasho ba wa nu eyi odifwi-difwi, adzi ni eyi ye ongwu nli otsitsi nani. Ma eyi di wodzɛ mbi Ongwan, iYesu iKrestu nli otsitsi nani. O li Imgbasho otsitsi bɛyi oshishe ogyegwu.
21Nghanɛ, emi ongwani, dulu abɔ mi angwula na.
Currently Selected:
1 iJɔn 5: UTR
Highlight
Share
Compare
Copy
Want to have your highlights saved across all your devices? Sign up or sign in
©2024 Initiative for the Translation and Development of African Languages
