رَسولون اَعمال 16
16
تیموتائوس، پولوس و سیلاسینه همراهی بَکَی
1پولوس شهرِنِه دِربه و لِسترِه را شَه. اَ جِگاکا شاگِردی تیموتائوس نوم اَمونیَه کن چَی نَنَه یهودی و ایمان دار بَه، اَمّا چَی دَدَ یونانی بَه. 2برا اِن لِستْره و قونیَه دِلَه چَی چاکی اَواجین. 3پولوس چون اَپیش بَه تیموتائوس سَفَری دِلَکا بَینَه دَرِ ببو، یَهودیونی خونِه کن اَ منطقه کا زندَگی اَکَرینَه، بَی سِنَت کَردِشَه، چیرا کن گِرد اَزنینَه چَی دَدَ یونانیَه. 4اَیِن وَقتی شَهریکا دییَرَ شَهری را اَشینَه، قانونِنی کن رَسولِن و ایسبیَه ریشِن اورشَلیمیکا نوعَشون بَه، مَردومی اَواجینَه تا مَردوم اَوون اَنجوم بدَرِن. 5پس، کِلیسا اِن ایمانی دِلَکا زبق اَگِرینه و هَر روج چَوون تیعداد ایضاف آرَبیَه.
پولوسی رویا
6چَی بَه دوملَه وِلَتِه فریجیَه و غَلاطیَه اِم سَر اَسریکا دَیوَردین، اِمی خونه کن خدا موقدسَه روح اَیِنِش خدا کَلامی آراستِنِستِه آسایا وِلَتیرا ایجازَش نِدوعه. 7وَقتی میسیَه منطقَه را آرَستین، تقلاشون کردَ بیطینیَه را بِشون، ولی عیسی روح اَیِنِش ایجازَ آنِداشَه. 8اِمی خاطِر، میسیَه منطقَکا دَیوَردینَه و شهر تِرو آسی را شین. 9شَویرا، پولوس رویاکا ویندِشَه کن مَقدونیَه مِردی چَی نَ کا پا مَندَ، و بَی خاشتو خاز بَکَیَه کن: «مَقدونیَه را بِه و چَمَرا آرَس.» 10وَقتی کن پولوس اِم رویاش ویندَ، جَخت مَقدونیَه را شیمون، اِمی خونه کن اطمینان پَیدا کَردَمون بَه خداوند اَمَش خِلِه کَردَ یَه تا انجیلی خَشَه خَبری اَوون بِدَرَم.
لیدیَه ایمان وَردِ
11پس، تِروآسی کا یَک راست کَشتینَه ساموتِراکی جَزیرَرا شیمون، و سَو سَرا، شهر نیا پولیسیرا آرَستیمون. 12اَجِگا کا فیلیپیرا رونَه بیمون، کن ایلَه اَ شهرونکا بَه کن رومییِن اَ جِگاکا اَمونین و مقدونیَه خاکیکا بَه، و چن روجی اَ شهریکا مَندیمون.
13موقَدسَه شَنبه روجیکا شَهریکا بِرِن بَرمیمون و رِبارَ کَنار شیمون، گَمون کردِمون کن اَ جِگاکا، جایی دِوا کَردِ را هِستَه. نِشتیمون و ژِنِنی نَه کن جَم آبَه بینَه، گَفَه ژِنَه کَردِمون. 14چَوون دِلَکا ژنی خدا پَرَست شَهرِ تیاتیرا آدَمونکا بَه کن چَمَه گَفون گوش اَکَریَه. چَی نوم لیدیَه بَه و اَرغوانیَه گِرونَه پارچَه اَخِرَشیَه. خداوند چَی قَلبی آکَردِشَه تا پولوسی پَیغومی گوش آدَرِ. 15وقتی اَ و چَی کَه آدَمِن تعمید گَتِشونَه، وِرَ ایصرارینَه اَمَنَه واتِش: «اَگَم باور بَکَرون کن بَه خداوند ایمان وَردَمَه، بِرَ و چمن کَکا بومونَه.» آخیر بَسَر چَی خواستَه تسلیم آبیمون.
پولوس و سیلاس زیندانیکا
16ایکَرَ، اَ جِگا ایرا کن دِوا اَکَریمونَه کایبیمون شِه، کِرِچی ایی گِنیمونَه کن روحی داریَه کن اَیَنه غَیب گویی اَکَریَه و فالگیری نَه اِشتَن اَربابونرا برکَه بَرَ ایی داری. 17اَ چَمَه و پولوسی دوملَه راه دَگِنی و لَسَّه نَه اَواجیَه: «اِم مِردِن، خِدای متعالی پاسَری اینَه و نیجات گَتِه راه، شِمَرا اییلام بَکَن.» 18اَ کِرِچی وِرَ روجِنی اِنتَرَ اَکَریَه. آخیر بَسَر پولوسی صَبر تمون آبَه و اَ روح کن اَ کِرِچی دلَکا بَه واتِشَه: «عیسای مَسیح نومینَه بَتِه فِرمون بَدام کن اِم کِلَکا بِرِن بای!» جَخت، روح اَیکا بِرِن آمَه.
19اَ کِرِچی اَربابِن وَقتی کن ویندِشون چَوون کاسبی هیچ آبَه، پولوس و سیلاسی گَتِشون و اَوون دَراکِن دَراکِن شهری مَیدونیرا، رَئیسون وَر بَردِشون. 20پس وقتی اَیِنِشون قاضیون وَر وَردِشون، واتِشون: «اِم مِردِن یَهودی اینَه و چَمَه شَهری آشوب دَراکِنییَشونَه. 21اَیِن رَسمِنی تَبلبغ بَکَنَه کن چَی قِبول کَردِ و اَنجوم دوعِه چَمَرا کن رومی ایمون، جایز نیَه.»
22مردوم نی اَوونَّه همدَست آبین و پولوس و سیلاسی سَر هِژما بَردِشون. و قاضیی اِن نی فِرمون آداشونَه تا اَوون لوت آکَرِن و لِس بِژَنِن. 23وَقتی اَیِنِشون برکَه لِس ژَ، اَوون زیندانیکا دَرَفندِشونَه و زیندان بانی فِرمون آداشونَه خَیلی چَوون مُراقیب ببو. 24زیندان بان وَقتی اِم فِرمونی دَرَستِشَه، اَوون زیندانی دلَکا درَفَندِش و چَوون لِنگون چوَعَه کِندَای کا آبَستِش.
فیلیپیَه زندانبان ایمان بوعَردی
25نیمَه شَوی موقِه، پولوس و سیلاس کایبین دِوا کَردِ، و سِرود خَندِ نَه خدا ستایِش اَکَرین و دییَرَ زیندانییِن نی اَوون گوش اَدَرین 26کن ایکَرَ ایی یالَه بومَه لَرزَ ایی آمَه، اَدَ کن زیندانی هییم لرزِستَه و زیندانی بَرَنگا اِن آج آبین و زِنجِلِن گِردِ زیندانیونکا پِسِستینَه و ویگِنِستین. 27زیندان بان خاویکا پِبَه و وقتی ویندِشَه زیندانی بَرَنگا اِن آجینَه، شَمشیری دَراکِنیشَه تا بَشتَن بکشِه، اِمی خونِه کن فکر اَکَریَه زیندانییِن ویریتَه اینَه. 28ولی پولوس لَسَّنه سَس آداشَه، واتِش: «بَشتَن صَدَمه مژَن، اِمی خونه کن اَمه گِرد اِم جِگا کامون!» 29زیندان بان چَرایی اَپیش بَه و بتاو بتاوینَه زیندانی دِلَرا شَه و هَتَه کن ترسی خونه اَلَرزیَه، پولوس و سیلاسی پا بِن بَرگِنِستَه. 30چَی بَه دوملَه، اَیِنِش بِرِن بَروَردَ و دَپَرسِستَه: «اَی سَروَرِن، چِبکَرم تا نیجات بیگِم؟»
31پولوس و سیلاس جوابِشون دوعَه: « خداوند عیسای مَسیح ایمان بوعَه کن تِه و اِشتِه کَه آدَمِن نیجات بَگَتیرون.» 32پولوس و سیلاس خداوندی کَلامی چَیرا و گِردِ اَیِنی کن چَی کَکا بینَه، واتِشون. 33شَو، هَه ساعَتیکا، زیندان بان اَیِنِش پِگتَه، چَوون زَمون شوشتِش، و جَخت اَ و گِردِ چَی کَه آدَمِن غسل تَعمید گَتِشون. 34زیندان بان اَوون اِشتَن کَرا بَردِشَه و سِفرَ ایی چَوونرا جیکَردِش. اَ و گِردِ چَی کَه آدَمِن، ایمان وَردِ خونِه خَیلی خَش بینَه.
35ولی وقتی روج آبَه، قاضییِن مَامورِنی زیندان بانی وَر عَندِشون، واتِشون: «اَ مِردون آزاد اَکَن!» 36زیندان بان اِم پَیغومی پولوسی خَبر آداشَه و واتِش: «قاضییِن فِرمون آدوعَشونَه کن بَشِمَه آزاد آکَم. پس ایسَه بِرِن بِرَ و سَلامَتینَه بِشَه.»
37ولی پولوس جَوابیکا واتِش: «اَمَشون کن رومی شهروندیمون بی اِم کن مُحاکیمَه بِکَن گِردی نَ کا لِس ژَشونَه و زیندانیکا دَرَفَندِشون. ایسَه بَپیشونَه نونَکِه اَمه آزاد آکَن؟ نِه نییَبِن! پی اِشتَن بان و اَمه اِم جِگاکا بِرِن بوعَرِن.»
38مامورِن اِمی قاضیونرا جیگیر کَردِشون، و اَیِن وقتی دَرَستِشونَه کن پولوس و سیلاس رومی شهروندین، برک تَرسِستین 39پس آمینَه، اَوونکا مَعذیرَت خواهی کَردِشونَه و تا زیندانی بِرِنیرا، اَوون همراهی کَردِشون و خاشتو خاز کَردِشون کن اِم شَهریکا بِشون. 40پولوس و سیلاس، زیندانیکا بَرمِه بَه دوملَه، لیدیَه کَرا شینَه. اَ جِگاکا برا اون ویندِشون، و اَیِنِشون تشویق کردَ وچَی بَه دوملَه اَجِگاکا شین.
Currently Selected:
رَسولون اَعمال 16: CTB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
