دوومین نامه قرنتیانیرا 2
2
1اِمی خونه کن اَپیمَه ایکَرَ دییَر، شمَه وَر بام و بَشمَه برضَخ آنِکَم. 2اِمی خونه کن اَگَم شِمَه برضَخ آکَم، دِ کی بَشایَه بَمن خَش آکَرِ، غَیراَز شِمَه کن بَشمِه برضَخ آکَردمَه؟ 3از اَتَرَکِه شِمَرا نامه نِوشتِمه تا اَ موقه ایی کن شمَه وَر کام آمِه، اَیِنی کن پی بَمن خَش آکَن، چمن برضَخ بِه باعیث نِبون. چیرا کن شمَه گِردی ایتمینان داریمَه کن چمن خَشی شمَه گِردی خَش به باعیث بَبی. 4اِمی خونه کن بَرکَه قورصَه اینَه و چَکِستَه دِلینه و چَمِنی نَه کن اَسِرگینه پَتلَمَه یَه شِمَرا نِوِشتم، اِمی خاطر نِنِوشتِمه تا بَشمَه برضَخ آکَم، بَسکم تا سرآگنَه کن چَنَه بشمَه رَی بَداشتیم.
گِناخکاری بِبَخشَه
5ولی اَگَم کَسی برضَخ بِه باعیث بَیَه، نِه تاکَه بَمن، بَلکَم تا حدی شمَه گِردی برضَخ آکَردشَه، نَپیمَه اِم موضوع خونه وَرَواجی کَردَم ببو. 6چون اَ آدَمی موجازات کن شمَه ویشتَری طَرَفیکا چَی لَیاقت اَزنینَه، وَستَه. 7پس پی بَی ببخشَه و بَی آلاونَه، نِکرِ وِرَقورصَه بَی زمین گیر بکَرَ. 8پس، شمَکا خاشتو خازِمَه کن بَی شمه موحبتیکا موطمعین بکرَ. 9اَز اِمی خاطِر شِمَرا نوِشتمه کن بَشمَه وَرداورد بکَم تا دَیَسم کن هر دستوریکا فرمون بَبَرون یا نِه؟ 10هر کَمی شِمَکا کن بَی ببَخشِه، از نی اَئی بَبخشِستیم. و واقییَن کن اَگَم کَسی بَخشِستِمَه - البت اَگَم دلیلی بَخشِسترا ببو - اَز شمَه خاطِر مَسیح حِضوریکا اِنتَرَ کَردَمَه، 11تا شَیطون اَمه گول مَژنِه، اِمی خونه کن چَی نقشَه اون بَموستیمون.
پیروزی مسیح دِلَکا
12وقتی مَسیح اِنجیلی موعیظَه کردِ خونه شهر تروآسیرا شیم، اِم حالیکا کن خداوند یالَه بَرنگایی اَ جِگاکا چمن ناریکا آج آکَردَشه، 13ولی هَنی تَفشیش بیمه اِمی خونه کن اِشتَن برا تیتوسی پَیدام کَردَ نِبه. پس اَ جِگا آدَمونَّه خداحافیظی کردِمه و منطقه مَقدونیَه را شیم.
14ولی خدا شکر بَکَم کن اوزون مَسیح کا، اَ اِشتَن پیروزی دلَکا اَمه راهنمایی بَکَی و چَی اَلمند گیری عطر چَمه واسیطنَه گِرد جگا اونگا ولاخ آرَکَرد. 15اِمی خونه کن اَمه، چِه اَیِنی دِلَه بِبَم کن نیجاتِشون گتَیَه و چِه اَیِنی دِلَه کن نیفَه آبَه اینَه، خِدارا هنتَه مَسیح خَشَه بوعَه عطری شیوار هِستیمون، 16اَ کَسیرا کن مَرگی طرَف بَشی، مَرگی بو درَم؛ و دییَرَ کَسیرا کن زندَگی طرَف بَشی اَمه چَیرا زندَگی بو دَرَم. و کیَه کن اِنتَرچییون لَیاقَتی بدارِ؟ 17اِمی خونه کن اَمه اَیِنی شیوار کن اِشتَن نفعی خونه خدا کَلامی بَخِرَتین، نیمون. بَسکم اَمه خدا چَمون نَکا مَسیح دلَکا گَف بَژَمون. اَ آدَمونی شیوار کن خالیصَه نیَت بَداشتین و خدا طَرفیکان.
Currently Selected:
دوومین نامه قرنتیانیرا 2: CTB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
