اوّلین نامَه قورَنتیانیرا 11
11
1پس بَمنکا سرمشق بیگِرَ، هَتَه کن اَز مَسیحکا سرمشق بَگَتیم.
کلَّه پوشامنییِه
2بشمَکا تَرییف بَکمهَ، اِمی خونه کن گِردِ چییونکا بَمن یاد آرَفنَه و رَسمون هَتَه کن شمَه دَست آدامَه، غَم بَردیرون.
3ولی بَپیمه بفَهمه کن مَسیح هَر مِردی سَرَ و مِرد هَر ژِنی سَرَ و خدا مَسیح سَرَ. 4هر مِردی کن اِشتَن سَری آپِشِه و چَی به دوملَه دوا بکَرِ یا پیشگویی بکَرِ، اِشتَن سری بی حورمت کَردشَه. 5ولی هر ژِنی سَربَنَسار دوا بَکَرِ یا پیشگویی بکَرِ اِشتَن سَری بیحورمت کَردشَه؛ چَی اِم کار، دِرِست اِمی شیوارَ کن اِشتَن سَری تاشتَش ببو. 6اَگَم ژِنی بَپیشَه کن سَربَنَسار ببو، پس پی اِشتَن زِلفون کتا آکَرِ؛ و اِمی خونه کن ژِنیرا عَیبَه کن اِشتَن ذِلفون کتا آکَرِ یا بتاشِه، پس پی اِشتَن سَری دَپوشامنِه. 7مِرد نِبایَد اِشتَن سَری دَپوشامنِه، اِمی خونه کن اَ، خدا صَفَت و شکوه و جَلالَه؛ ولی ژِن، مِردی شکوه و جَلالَه. 8اِمی خونه کن مِرد ژِنیکا بوجود آمَه نییَه، بَلکَم ژِنَه کن مِردیکا بوجود آمَیَه؛ 9و مِرد ژِنیرا خلق بَه نی، بَسکَم ژِن مِردیرا خلق بَیَه. 10اِمی خاطر، فرشتَه اون خونه، ژِن پی اِشتَن سَریکا زاکینَه نوشونی بِدارِ. 11با ام وجود، خداوندی دِلَکا، نِه ژِن مِردیکا تاکه، نِه مِرد ژِنیکا. 12هَتَه کن ژِن مِردیکا بوجود آمَه، مِرد نی ژِنی واسیطَنه بوجود آ، و اِم چییِن گِرد خداکارَ. 13شمه اِشتَن قیضاوت بکَرَ: ژِنیرا دِرِستَه کن سَربَنَسار خدا درگارا دِوا بکَرِ؟ 14مگَم طبیعت، اِشتَن بَشِمَه آموج نییَدا کن اَگَم مِردی دِرازَ ذِلف بدارِ، چَیرا عَیبَه، 15ولی اَگَم ژِن دِرازَ ذلف بدارِ، چَیرا ایفتخار بَبی؟ اِمی خونه کن درازَ ذلفی پوشامنیه را ژِنی شون دوعَیَه. 16ولی اَگَم کَسی بخا اِشتَن سازی بژَنه، پی بواجم کن اَمَرا و خدا کلیسا اونرا اِنتَرَ رسمی نیَه.
خداوندی سور
17اَمّا اَ چیی ایکا کن ایسَه بَشِمَه حِکم بَکَم، بَشِمَکا تَریف نَمدا، اِمی خونه کن وقتی شِمَه یَندِ وَر گِرد آبَه، فایَدَ عَوَض، ضرَر بَداشتیرون. 18اول اِمکن دَرستمه وقتی یَندِ وَر کلیسا خونه جَم آبَه، شمَه دلَکا بَرکَه جدایی ایی دَرَگنِست، و اِمی تلَکَه ایی باوَر بَکَمه. 19شمَه دَلَکا جدایی پی ببو تا اِنتَرَکه اَیِنی کن واقییَن ایمان بداشتین شمَه دِلَکا دیار آبو. 20وقتی کن شمه ایی جِگاکا گِرد آبَه، خداوندی سوری هِردِ خونه نییَه 21اِمی خونه کن غَذا هَردِ موقه، هر کِرَم شِمَکا بی اِمکن دییَری مونتظیرببو اِشتَن سوری بَردی، و اِم کار باعیث بَبی کن اییی نفر انشتا بَمَندی دییَری مَست آرَب. 22مَگَم هردِ و هِنتِرا شمَرا کَه نی؟ یا اِم کن خدا کلیسا گِچ بَحیساب بوعَردیرون و دَس دَریسه آدَمون گِچ بَکَرون؟ بَشِمَه چِه بواجم؟ شمَه اِم کاریرا بَشِمَه تَریف بدَرم؟ نِه نِمَکرد.
23چون اَ چیی ایی کن اَز شمَه دَست آدامَه، خداوندیکا ویگَتمه، کن عیسای خداوندِشون اَ شَوی کن بَی غَنیمی تَسلیم آکَردَ، نونی پِگَتِشَه 24و شکر کَردِ بَه دوملَه پِزارنِستِشَه و واتش: «اِمه چمن تَن شمَه خونه. اِم کاری چم یادیرا اَنجوم بدَرَ.» 25هِنتَرَکه، سوری بَه دوملَه گولَه پِگَتِشَه واتِش: «اِم گولَه، تازَ عَهدیَه چمن خونی دِلکا. هر موقه کن اَیکا بِنتیرون، چمن یادیرا اِنتَرَ بکَرَ.» 26اِمی خونه کن هر موقه اِم نونی بَرَ و اِم گولَکا بِنجَه، تا زمانی کن خداوند هَنی ویگَردِ، چَی مرگی اییلام بَکَرون.
27پس هَر کم اَتَه کن دِرِست نییَه نونی بَرِ و خداوندی گولَکا بِنجِه، خداوند عیسی خونی خاطر تقصیر کار بَبییَه. 28هر کَم نارتَر از اِمکن نونیکا بَرِ و گولَکا بِنجِه، بَشتن ورداورد بکَرِ. 29اِمی خونه کن هَر کَم بی اِمکن خداوندی تَنی تشخیص بدَرِ، بَرِ و بِنجِه، اِشتَن مَحکومیَتی هَردَشَه و هِنتَشَه. 30اِمی خاطِرَ کن خَیلی شِمَکا عِجِز و آزاری اینَه و کاولَه ایی مَردَ اینَه. 31ولی اَگَم بَشتَنرا حِکم اَکَریمون، چَمَه سَر حِکم نَبیَه. 32ولی اَموقه ایکا کن خداوند چَمه سَر حکم بَکَی، اَدَب بَبیمون تا دِنیا آدَمونَّه محکوم آنِبَم.
33پس چمن برا اِن، وقتی هردِرا ِیَندِ وَر گِرد آبَه، یَندِ مونتظیر بومونه. 34اَگَم کَسی وشیشَه، اِشتَن کَکا غذا بَرِ تا شمه جَم آبه یَندِنَه، محکوم بِه باعیث مَبو. بقیَه چییون خونه نی، وقتی شمه وَر آمیم، بشِمه باتیم.
Currently Selected:
اوّلین نامَه قورَنتیانیرا 11: CTB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
