رومیان 2
2
داوری عادلونَه خدا
1ایلَهَه تو اِاِ کسی گه اَر یَکیتِر حکمَ مِهِین، هر کی گه هِین هُیچ دَسپیچی نِرین. اَرِیَگه وَه اَ چیئَه گه اَر یَکیتِر حکمَ مِهِین، اَر ووژِت حکمَ مِهِین؛ اَرِیَگه تو اِاِ داور، ووژِت هَراَ کارِلَ مِهِین. 2ایمَه مَذانیم داوری خدا اَر کسَلی گه هُنَ کارَلی اَنجومَ میَن، حخَ. 3ایلَهَه تو گه اَر کسَلیتِر حکمَ مِهِین ئو ووژِت هَراَ کارِلَ اَنجومَ مِین، مَر گُمونَ مِهِین گه اژ داوری خدا مَچیناِر؟ 4یاگَه مِرِبونی، صبِر ئو تیَمِل فِرَه خدا وَه هُیچَ مَذانین ئو نِمَذانین گه مِرِبونی خدا اَرِه یَسَ گه تو باری ویرِ توئَه؟
5مِنتائای تو وَه خاطر یَگه اِژیر نِمَچین ئو یَگه دلِت نِمِیتی توئَه بِهِین، خَضو اَرِه ووژِت، اَرِه روژ خَضو اَمارَ مِهِین، اَ روژَ گه داوری عادلونَه خدا اِنوم آشگارا ماوتی. 6خدا «وَه هر کی مِطابق کارَلی سزاءَ مِ.» 7او ژییاین ابدیَ موئَشخیَ کسَلی گه وَه صبِر اِ اَنجوم کارَل خو، هان اَر دُم جِلال ئو عزّت ئو زِنِهی ابدیا؛ 8مِنتائای خِض ئو خَضوءَ ماری اَرسر کسَلی گه هَر هانِ فگِر ووژونا ئو اژ حخیخت اطاعت نِمَهَن بلکِم اژ ناراسی اطاعتَ مَهَن. 9هر کی گَنی بِهِه، جُور ئو عذاوَ ماوتیَ نَصُی. اولبار یهود ئو اَسَه یونانی. 10مِنتائای هر کی خوئی بِهِه جِلال ئو عزّت ئو سِتارَ ماوتیَ نَصُی، اولبار یهود ئو اَسَه یونانی. 11اَرِیَگه خدا دوچیَمکی نِمِهِه.
12کُل کسَلی گه بیشریعت موسی گناءَ مَهَن، بیشریعتیش نابودَ موئن؛ ئو کُل کسَلی گه اِ ژیر شریعت گناءَ مَهَن، وَهسونگَ شریعت داوریَ موئن. 13اَرِیَگه کسَلی گه شریعتَ مَشتوئِن اَرتَک خدا صالح نیِن، بلکِم کسَلی گه شریعتَ مارِنَ جا صالح وَه حساوَ مان. 14اِراسی، وخدی خِرِیهودیَل گه شریعت نِرِن، کارَل شریعت مِطابق طبیعتَ مارِنَ جا، اونَل وَهیاآگه شریعت نِرِن، اَرِه ووژو شریعتی کِن. 15اونَل نشونَ میَن گه کارَل شریعت نُیسیاس اَررُی دلَلو، هُنَ گه وِژدانو شاتیَ مِ ئو فگِرَل اَرضد یَکو، یا مَکومونَ مِهِه یا تبرئَهئونَ مِهِه. 16یَه اِ روژی اَنجومَ مَگِری گه خدا مِطابق انجیلی گه مِه اِلومَ مَهَم، وَهسونگَ عیسی مسیح، اَر رازَل دل اِنسونَل داوریَ مِهِه.
17مِنتائای اَرّ تو گه ووژتَ یهودیَ مَذانین ئو تکیَ مِین اَر شریعت ئو اَرِیَگه خداءَ مَشتاسین وَه ووژتَ مَنازین، 18تو گه خواس اوءَ مَذانین ئو اَرِیَگه اژ شریعت تیَلیمِت گِرتیَ، اَوَه گه اژ کُل بیتِرَ شیَه مِهِین، 19ئو اطمینو دیرین گه رَنِما کورَلین ئو اَرِه کسَلی گه هان اِنوم تیَریکیاِر، نُیرین، 20مِربی نایونَل ئو مَلِم آیلَل گُجَرین، تو گه اِ شریعت، میَرفت ئو حخیخت اَجورَ گه ماو بوئینینی دیرین، 21اِسَه تو گه یاء باقیَ مِین، یاء ووژِت نِمِین؟ تو گه اَرضد دُزی موعظَه مِهِین، ووژِت دُزیَ مِهِین؟ 22تو گه موشین نَباس زِنها بِهِین، ووژِت زِنهاءَ مِهِین؟ تو گه اژ بِتَل بیزارین، ووژِت معبدَل خارَتَ مِهِین؟ 23تو گه وَه شریعتَ مَنازین، آیا وَه اِژیر پا نائنی بیعزّتی اَر خدا نِمِهِین؟ 24اَرِیَگه هَرهُنَ گه اِنوم کِتاوَل پِخَمَرَل نُیسیاءَ: «وَه خاطر هُمَه، اِنوم خِرِیهودیَل کِفِرَ موشِنَ نُم خدا.»
25ختینَه وخدی اَرزشد دیری گه شریعت بارینونَ جا، مِنتائای اَرّ بنینونیِ ژیر پا، اِجور یَسَ گه ختینَه نوئینونَ. 26اِسَه اَرّ پیای گه ختینَه نوئیَ، حکمَل شریعت باریَ جا، آیا خَتینَهنوئین او ختینَه وَه حساو نِمای؟ 27اِسَه اَوَه گه اِنوم جسم ختینَه نوئیَ، مِنتائای حکمَل شریعتَ ماریَ جا، تو مَکوم مِهِه، تو گه وَهیاآگه حکمَل شریعت دیرین ئو ختینَه بینَ، شریعتَ مَنینِ ژیر پا.
28اَرِیَگه یهودی اَوَه نیَ گه وَه ظاهر یهودی بو، ئو ختینِهیش کار ظاهری ئو جسمونیای نیَ. 29بلکِم یهودی اَوَهسَ گه اِ باطن یهودی بو ئو ختینِهیش کار قلبیای کَ گه وَه دس روحِ خدا اَنجومَ ماو، نه وَهسونگَ کِلمَهلی گه نُیسیاءَ. هُنَ کسی خدا تیَریف اَژینَ مِهِیتی، نه اِنسو.
Currently Selected:
رومیان 2: LBT
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company