اول تیموتائوس 5
5
تیَلیمَلی اَرِه کلیسا
1خِض اَر پیا رُیچَرمین نِهَه، بلکِم اِجور باوَه ووژِت تشویق کِیتی، ئو جِهالَل اِجور بِرال ووژِت، 2ئو دایائَل اِجور دال، ئو ژِنَل جِهال اِجور خُیَهل ووژِت، اِنوم پاکی کامل.
3عزّت بِن اَر بیوَهژِنَلی گه اِراسی بیکس چیَماَردِراخِلِن. 4مِنتائای اَرّ بیوَهژَنی وَچِوَچَرزا دیری، اُوُ اولبار باس بِگِرِنا دینداری ووژو وَه هِوَت کِردِن اژ خانوادَه نِشو دَن ئو دِن باوِهئودائو اِ مِل ووژون اِربارِن، اَرِیَگه خدا خَوشَ مایتی. 5اَوَه گه اِراسی بیوَه ئو بیکس مَنیَ، امید هایتی اَر خدا ئو شو ئو روژ هَراَ مَنیشیَ دوعا کِردِن ئو اِمدایَ ماری اَر خدا. 6مِنتائای بیوَهژَنی گه ها عِیاشی کِردِناِر وَهیاآگه زِنیَ، مِردیَ. 7ایی چیئِلَ فِربو بیَ بینو تا چیئی اِ زِنِهیو ناو گه وَه خاطر اَوَه خِض بو اَرینو. 8مِنتائای اَرّ کسی خرجِبَرج زِنِهی قومِخویشَل ئو مصخوصاً عتِعیال ووژ اِرناری، نَچیَسِ ژیر ایمو ئو گَنتِر اژ بیایمونَ.
9فَخَد نُم بیوَهژَنی بِنُیسِن گه ویشتِر اژ شص سال بوتی ئو یِه شوی ویشتِر نَهَردوئیتی. 10ئو وَه کارَل خو بشتاسِنی، یانی آیلَل خو تربیت کِردوئیتی، هُنهاوو بو، پال ایمودارَل مسیح شورئیتی، دردَبارَل یاری دائیتی، ئو ووژ وَخم هر کار خوئی کِردوئیتی.
11مِنتائای نُم بیوَهژِنَل جِهالتِر نَنُیسِن، اَرِیَگه وخدی شَوَتو اژ مسیح دویرونا کِ، مِنِی شویَ مَهَن. 12اُهُنَ، اَرِیَگه ایمو نواینِهَه ووژونَ مَنِنِ ژیر پا مَکومَ موئن. 13اژ یوئیشَ گذشتَه، عادتَ مَهَنَ تَمَلی ئو مالَمال گیردین؛ ئو نه فَخَد تَمَلِن، بلکِم موئنَ راوَبار ئو فِضول، ئو قصَهلی گه نَباس بوشِن مارِنَ زوئو. 14اِسَه عخیدَه مِه یَسَ گه بیوَهل جِهالتِر شوی بِهَن، آویل بارِن ئو بوئنَ کِنو ئو مِجال گَنی وِتِنَ دشمن نیَن. 15اَرِیَگه اِسگِهیشَ بِری اِراگیردینَ ئو چِنَسَ تُرّ شِطونا.
16اَرّ ژَن ایموداری، قومِخویشَل بیوَه داشدوئیتی، باس ووژ یاریو دِ تا باری اَر کول کلیسا نوئن ئو کلیسا بتونی یاری بیوَهژِنَلی دِ گه اِراسی بیکس چیَماَردِراخِلِن.
17شیخَلی گه خو رَبَریَ مَهَن، لائق عزّت دو بِرُوَرِن، مصخوصاً اونَلی گه اِ کار موعظَه ئو تیَلیم زیَمَتَ مَکیشِن. 18اَرِیَگه اِنوم توراتَ موشی: «دَم کِلَگای گه خرمُنَ مَکوئی، نوئن» ئو «عمِلَه حَخَسی مِزدَس ووژ بِسینی.» 19نَچُ اِگِرد بُختِمی اَرضد یَکی اژ شیخَل، مَر وَه شاتی دو یا سه شات. 20مِنتائای اَر تک کُل، خِض بِهَه اَر اونَلی گه هَر هانِ گنا کِردِناِر تاگَه کسَلیتِر زِلِئو بِچو.
21اَر تک خدا ئو مسیحْ عیسی ئو فریشدَهلی گه دیاری بینَ، سفدِسخد اَمونَتتَ میَمَ بی گه ایی فِربونِلَ بیخِرَض رایَت بِهِین ئو هُیچ کاری وَه دوچیَمکی نِهِین.
22وَه هِلَهپِلَه کس اَرِه خِلمت مَیِّن نِهَه ئو اِ گنائَل کسَلیتِر هُمبیَر نو، بلکِم بوس اَرسر پاکی ووژِت.
23دیَر فَخَد آو خُرّ نیَ، بلکِم اَرِه مَدَه ووژِت ئو مِرَضَل گه ویشتِر وَخدَل دیرین، تِکی شِراویش خُرّ دَ.
24بِری گنائَلو دیارَ ئو وِر اژ ووژو مَچو اَرِه داوری، مِنتائای گنائَل بِریتِر دُماتِرَ مَکُوءِ دِریر. 25هَرهُنَ، کارَل خو دیارِن ئو جُجُ اونَلی گه دیار نیِن، نِماو بشاریونا.
Currently Selected:
اول تیموتائوس 5: LBT
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
