Pahayag 5
5
U Nalukot a Kasulatan sakay u Tupa
1Nadid, netan ko u essa a kasulatan a nalukot a táttawed nu mággetnod tu trono tu kawanan na a kamát. Te sulat iye a magdilu-diluputan sakay te pitto a selyo. 2Sakay naketaák ti makapangyariyan a anghel a nagupos ti mabegsák, “Ti deya u karapat-dapat a mangibut tu selyo sakay mangbukas ti nalukutáy a kasulatan?” 3Pero awan ti maskin essa ti langet oni ti lutaáy oni ti disalad ni lutaáy u makapangbukas oni makapangileng tu lasán nu kasulatan. 4Nágsasangitánnák dipo awan ti ketan a karapat-dapat a mangbukas sakay mangileng tu nakasulat hod. 5Pero kinagi nikán nu essa tu tagapangasiwa hide, “Dyan ka dán magsanget! Ilingán mo, u dáddulawán a Liyon a Lahe ni Juda, sakay apo ni David. Siya u nagtagumpay sakay te karapatan a mangibut tu pitto a selyo sakay mangbukas tu kasulatan a nalukot.”
6Sakay káttapos ay naketaák ti essa a Tupa a mágtaknág tu bállog nu tagapangasiwa hide. Sakay tu trono a napalebutan nu áppat a nilalang a biyag. Tehhod a tanda a nabuno dán iye a Tupa. Tehhod iye a pitto a saduk, sakay pitto a mata, iye u Ispirito nu Diyos a te pitto a gawain a pinaangay na ti buuwáy a mundu. 7Ummadene u Tupa sakay inalap na u nalukot a kasulatan tu kawanan a kamát nu mággetnod tu trono. 8Nikuna a alapán na iye ay limmuhud tu atubang nu Tupa u áppat a linalang a biyag sakay u duwwa a pulo ay ti áppat a tagapangasiwa. Bawat essa ay tehhod a táttawed a alpa sakay tehhod a ginto a malukung a putat ti insenso. Saiye u dasal nu tolay hide nu Diyos. 9Sakay mágkansiyon hide ti bigu a kansiyon,
“Hiko u karapat-dapat a mangalap tu kasulatan a nalukot.
Sakay mangibut tu selyo na hide.
Dipo nabuno ka sakay tu pamamag-itan nu digi mo,
ay tinubus mo para tu Diyos u atanan a tolay,
gábwat tu kada lahe, upos, banuwan, sakay bansa.
10Sakay pinagin hare mo hide sakay saserdote para magserbi tu Diyos.
Sakay maghare hide ti lutaáy.”
11Immilingák a huway sakay nasaneg ko u boses nu linibu-libu sakay minilyon-milyon a anghel. Nakapalebut hide tu trono, tu áppat a nilalang a biyag sakay tu tagapangasiwa hide. 12Mágkansiyon hide ti mabegsák:
“U Tupa a binuno ay karapat-dapat
a tumanggap ti kapangyariyan, kayamanan, karunungan, sakay begsák,
karangalan, papuri sakay pággalang.”
13Sakay nasaneg ko a mamágkansiyonan u atanan a linalang a katoy ti langet, ti lutaáy, disalad ni lutaáy, sakay u katoy hide tu diget ti konna he:
“Iyatád tu mággetnod tu trono sakay tu Tupa
u kapuriyan, karangalan, kadakilaan sakay kapangyariyan a awan ti kahád!”
14Tummábbeg u áppat a linalang a biyag ti, “Amen!” Sakay limmuhud u atanan nu tagapangasiwa hide sakay sinumamba tu Diyos sakay tu Tupa.
Currently Selected:
Pahayag 5: MBJC
Highlight
Copy
Compare
Share
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
