Pahayag 22
22
1Nadid, impeta be nikán nu anghel u konayan a makapangatád ti biyag. Tunay a lekmang u dinom a kumán a bubug. Gábwat iye a konayan tu trono nu Diyos sakay nu Tupa. 2Magbulos iye tu bállog nu karsada nu banuwan. Tu magdibiliwan nu konayan ay te kayo a makapangatád ti biyag. Magbunga iye ti kada bulan kanya sapulo ay ti duwwa iye a beses a magbunga ti sataon, sakay makagamot u duu-duun na tu sake-saket nu tolay hide tu kada bansa. 3Awan ti ketan hod a ányaman a kaiyamutan nu Diyos. Nan u katoy hod ay u trono nu Diyos sakay u Tupa, sakay sambaán dán siya nu tagapagserbi na hide. 4Ketan de u hupa na, sakay mesulat tu kidáp de u ngahan na. 5Sakay awan dán hod ti gibi, kaya awan dán kailangan u simbuwan oni demlag nu aldew dipo u Panginoon a Diyos u magin demlag de. Sakay maghare hide hanggan-hanggan.
U Káddemát ni Jesus
6Sakay kinagi nikán nu anghel, “Maasaan sakay tatahoden iye hide a upos. U Panginoon a Diyos, a nángkaluub tu Ispirito na tu prupeta hide, u nangutus tu anghel na a ipakapospos tu tagapagserbi na hide u bagay hide a adene dán a mangyare.”
7Sakay kinagi ni Jesus, “Mágsaneg kam! Pademátták dán! Pinagpala u mangsássunud tu pahayag hide a katoy ti libruwan iye!”
8Hikán ti Juan u nakasaneg sakay naketa ti iye hide a bagay. Pákkasaneg ko sakay pákketa ti iye a atanan ay limmuhudák tu atubang nu anghel a nángpeta nikán para sumamba nikuna. 9Pero kinagi na nikán, “Dyan mo ina gimitán! Tagapagserbiyák labe a kapareho mo, konna tu kákkapatkákka mo a prupeta, sakay u atanan a mangsunud tu upos hide ti libruwan iye. U Diyos i sambaán muway!” 10Sakay kinagi na pa nikán, “Dyan mo ilihim u pahayag hide a katoy ti libruwan iye, dipo adene dán iye hide a mangyare. 11U makán gimitán ti madukás ay magtulos-tulos a magpakadukás sakay u madangát ti kákkabiyag ay magtulos-tulos a magpakadangát. Pero u maggimet hide ti maganda ay magtulos-tulos a maggimet ti maganda. Sakay u banal ti kákkabiyag ay magtulos-tulos a magpakabanal.”
12Kinagi ni Jesus, “Mágsaneg kam! Pademátták dán! Tawed ko dán u gantimpala hide a iyatád tu balang essa ayun tu ginimet na! 13Hikán u Alpa sakay tu Omega, u purumero ay tu dimodyan, u Sapul ay tu Katapusan.”
14Pinagpala u maglinis hide tu babadu de dipo tehhod hide a karapatan a sumáddáp tu banuwan sakay kuman tu bunga nu kayo a makapangatád ti biyag. 15Pero magwahak tu luwas u mágkadukás hide a tolay, u mágdipoh hide, u mángngibábbey oni mángngilállake, u mágbabono hide, u mágsamba hide ti diyos-diyosan, sakay u mágkabule hide ti upos sakay ti gimet.
16“Hikán ti Jesus, u nangutus tu anghel ko para ipakapospos nikam a grupo nu mánnampalataya hide iye hide a bagay. Gábwaták tu lahe ni David sakay hikán u mademlag a biton ti dimadimang.”
17Kinagi nu Banal a Ispirito sakay u Bábbey a ikasal, “Karon he!” Sakay atanan a makasaneg ti iye ay magkagi be a, “Karon he!”
Umadene u atanan a mauwaw; mangalap u masoh tu dinom a makapangatád ti biyag, awan iye ti bayad.
Katapusan
18Hikán ti Juan ay mangatád ti babala tu atanan a makasaneg tu hula hide a nakasulat ti libruwan iye: Ni deya man u mangdagdag tu atanan a lasán ni libruwan iye ay idagdag nu Diyos tu parusa na u atanan a salut a nakasulat he. 19Sakay ni deya man u mangibut tu agum a upos tu pahayag hide a nesulat he ay awan payagen nu Diyos a mákbahagi a kuman tu bunga nu kayo a makapangatád ti biyag, sakay ibutan nu Diyos u karapatan na a sumáddáp tu Banal a Banuwan a nakagi he.
20Kinagi nu Panginoon Jesus a nagpahayag ti atananan iye, “Tatahoden! Pademátták dán!”
Amen. Dumemát ka dán nakwa, Panginoon Jesus!
21Nakwa u kagbi nu Panginoon Jesus ay hod nikam a atanan!
Amen.
Currently Selected:
Pahayag 22: MBJC
Highlight
Copy
Compare
Share
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
