Pahayag 15

U Dimodyan a Salut

1Nadid, naketaák ti essa pa a makataka-taka a pangitain ti langet: te pitto a anghel a te manga táttawed a salut. Iye hide u dimodyan a salut, dipo he a matapos u matindi a iyamut nu Diyos.

2Naketaák ti kumán a diget a bubug a maggehab. Netan ko be u nangtalo hide tu makaánteng a hayup sakay tu awan hide simmamba tu rebulto na, sakay u awan hide natatakan tu ngahan na a katumbas nu nomiro a 666. Mágtaknág hide tu diget a kumán a bubug, táttawed de u alpa a inyatád nu Diyos. 3Mágkansiyon hide tu kansiyon ni Moises, a tagapagserbi nu Diyos sakay kansiyon be nu Tupa:

“Panginoon a Diyos a makapangyariyan tu atanan,

Dakila sakay makataka-taka u gimet mo hide!

Hiko u Diyos nu bansa hide,

Banal sakay tama u atanan a pámmalakad mo!

4Maskin deya ay manteng niko Panginoon!

Atanan ay mángpahayag tu kadakilaan mo!

Dipo hiko la u banal!

U atanan a bansa ay umadene

sakay sumamba niko,

dipo netan nu atanan u gimet mo a banal.”

5Káttapos ni iye ay netan ko a bimmukas u templo ti langet, sakay netan ko hod u Lugar a Kabanalan. 6Limmuwas tu templo u pitto a anghel a te tatawed a pitto a salut. Nakabadu hide ti malinis a mapudew a lino, sakay tehhod hide a baregkás a ginto tu hakaw de. 7U essa tu áppat a linalang a biyag ay nangatád tu pitto a anghel ti tatággessa de a malukung a ginto a putat ti parusa dipo tu matindi a iyamut nu Diyos a biyag hanggan-hanggan. 8U templo ay naputat ti asok a gábwat tu Diyos. Iye u paketaan tu kadakilaan sakay kapangyariyan na. Sakay awan ti makasáddáp tu templo mentaras awan matapos u pitto a salut a tawed nu pitto a anghel.

Currently Selected:

Pahayag 15: MBJC

Highlight

Copy

Compare