Pahayag 10

U Anghel Sakay u Badit a Kasulatan

1Nadid, kállipas ni iye ay naketaák dámman ti essa a makapangyariyan a anghel a gábwat ti langet. Nabalutan siya ti diklám sakay tehhod a balangaw tu ulo na. Magdemlag a kumán a aldew u hupa na, sakay kumán a adigi a apoy u tika-tikád na. 2Tehhod siya a táttawed a nakabukas a badit a kasulatan. Sakay u kawanan na a tikád ay inggemmák na tu diget, sakay u kawihe ay tu luta. 3Sakay pimmákhaw siya, u boses na ay kumán a tagguwang ni liyon. Tinábbeg siya nu pitto a kádduh. 4Isulat ku dán nakwa u nasaneg ko káttapos nu kádduh, pero te boses a gábwat ti langet a nagupos, “Ilihim mo u kinagi nu pitto a kádduh, dyan mo isulat!”

5Sakay netan ko u anghel a gumággemmak tu diget sakay tu luta a inyontok na u kawanan na a kamát ti langet. 6Sakay nanumpa tu ngahan nu Diyos a te biyag a awan ti kahád, a nanglalang tu langet, tu luta, tu diget, sakay tu atanan a katoy hod. Kinagi nu anghel, “Awan dán magmalay! 7Ni patánnugán dán nu kapitto a anghel u trumpeta na ay igimet dán nu Diyos u lihim na a plano, konna tu impahayag na tu tagapagserbi na hide a prupeta.”

8Káttapos ay kinauhunák a huway nu boses a nasaneg ko a gábwat ti langet. Kinagi na, “Umadene ka ti anghele a gumággemmak ti digete sakay ti lutae sakay alapán mo i táttawed nae a kasulatan a nakabukas.” 9Kaya immadeniyák tu anghel sakay inaged ko u kasulatan. Kinagi na nikán, “Alapán mo sakay kanán mo; mapet ina ti gusok muwe, pero matam-is ina a konna tu pitukan ti labi muwe.” 10Kaya inalap ko u kasulatan tu kamát na sakay kinan. Matam-is ngani a tahod tu labi ko a konna tu bisa nu pitukan, pero nikuna metállán ku dán ay pinumet u gusok ko.

11Sakay kinagi na nikán, “Kailangan a ipakapospos mo huway u pahayag nu Diyos tungkul tu iba-iba a tolay, bansa, upos, sakay tu hare hide.”

Currently Selected:

Pahayag 10: MBJC

Highlight

Copy

Compare