Hebreo 5

1U balang pinakapuno a saserdote a pinile tu katolayan ay pinile a magserbi tu Diyos para nide. Siya u magalay tu kaluub hide sakay alay para mapatawad u kasalanan de hide. 2Mapákpággaguman na ti maayus u tolay hide a awan ti tukoy sakay masuwayin, dipo tehhod be siya a kahinaan a konna nide. 3Dipo magkasala labe siya, ay kailangan a magalay siya para tu sadile na be hide a kasalanan bakán la a para tu tolay hide. 4U karangalan nu pagiging pinuno a saserdote ay awan maangkin nu deyaman tu sadile nala a kagustuwan. Dipo u Diyos u nangpile nikuna a konna tu pángpile na ni Aaron.

5Konna bi hod, awan inlangkaw ni Cristo u sadile na a magin pinuno a saserdote. Nan pinile siya nu Diyos a nangkagi nikuna,

“Hiko u Anak ko.

Sapul nadid ay hikán dán u Ama mo.”

6Kinagi na be tu agum a parte nu Kasulatan,

“Hiko ay saserdote hanggan-hanggan

a konna tu pagkasaserdote ni Melquisedec.”

7Nikuna a katoy palla ti Jesus ti lutaáy, ay insanget na a magdasal sakay nákkekagbi tu Diyos a makapángligtas nikuna tu kamatayan. Kanya tinábbeg siya nu Diyos dipo tatahoden u págpakababa na. 8Maski Anak siya nu Diyos ay natukuyan na a sumunud tu pamamag-itan nu pághirap na. 9Nikuna a nagin ganap dán siya, ay siya u naggábwatan nu awan ti katapusan a kaligtasan nu atanan a sumunud nikuna. 10Indátton siya nu Diyos a pinuno a saserdote konna tu pagkasaserdote ni Melquisedec.

Diyan umadág tu Pánniwala

11Makpal kami pa a makagi tungkul ti bagayan iye hide, pero mahirap a ipaliwanag dipo awan kam makaintendi sakay sala moy a mágsaneg. 12Dapat nakwa ay tagapagtoldu kamon, pero hanggan nadid ay kailangan kampa a tolduwan tu pasapul hide a adal tungkul tu upos nu Diyos. Hanggan nadid ay gatas palla u kákkanán moy embes a u mágkakásseng dán a makan. 13U mabiyag hide ti gatas ay anak palla a badit, awan palla ti tukoy tu maganda ay tu madukás. 14Pero u maigát a kanán ay para tu mágkatanda dán hide sakay tukoy na dán u maganda ay tu madukás.

Currently Selected:

Hebreo 5: MBJC

Highlight

Compare

Copy