Hebreo 3

Mas Higit ti Jesus nan ti Moises

1Kanya ngane kákkapatkákka ko hide ti pánnampalataya sakay kaguman tu dulaw nu Diyos, alalahanán moy ti Jesus a pinaangay he nu Diyos a puno a saserdote nu pánnampalataya tam. 2Matapat siya tu Diyos a nangpaangay he nikuna, konna ni Moises a nagin tapat tu pángngasiwa na tu anak hide nu Diyos. 3Ni mas marangal u naggimet tu bilay nan u bilay ay konna labi hod, mas marangal ti Jesus nan ti Moises. 4Kada bilay ay tehhod a nanggimet, pero u Diyos la u nanglalang tu atanan a bagay. 5Nagin matapat ti Moises tu pámmahala na tu pinile hide nu Diyos bilang essa a tagapagserbi. U atanan a bagay hide a ginimet na ay mage-anino la nu bagay hide a ipahayag nu Diyos tu dumemát a panahun. 6Pero ti Cristo ay matapat bilang Anak a namahala tu pinili hide nu Diyos. Sakay hikitam u pamilya na hide ni tulos-tulos kitam a magin tapat tu pag-asa tam nikuna. 7Kanya konna tu kinagi nu Banal a Ispirito,

“Ni masaneg moy nadid u upos nu Diyos ay,

8diyan moy dán paigáttán i isip moye,

konna tu ginimet nu Israelita hide a kássuway sakay pángpurba tu Diyos tu parang.

9Kinagi nu Diyos, ‘Pinurbaanák nu dáddikál moy hide tu parang,

maski ni netan de u ginággimet ko hide a makataka tu alay nu áppat a pulo a taon.

10Kanya nabate de u iyamut ko sakay kinagi ko,

“Pirme hide a sumuway nikán,

awan di dán sunudán u kagiyán ko.”’

11Kaya dipo tu iyamut ko ay insumpa ko a,

‘Awan di dán mademát u lugar a inpananto ko nide.’”

12Kanya magingat kam kákkapatkákka ko, a awan magkahod ti madukás a isip sakay mawanan ti pánniwala a magin dahilan nu káadág moy tu biyag a Diyos. 13Nan magpaala-alaan kam aldew-aldew, mentaras a madulaw palla “nadid” u panahun, tánni awan ti madaya nikam sakay magin alipin nu kasalanan. 14Dipo hikitam a atanan ay kaguman ni Cristo, ni manatile a matatag u pánniwala tam hanggan-hanggan, konna tu inpeta tam a pánnampalataya tu itod nikuna a bigu kitam palla a summampalataya nikuna.

15Konna tu kinagi tu Kasulatan,

“Ni masaneg moy nadid u boses nu Diyos,

ay diyan moy dán paigáttán u puso moy,

konna tu kássuway nu nuno moy hide tu Diyos.”

16Deya u simmuway tu Diyos maski ni nasaneg di dán u boses na? Awan beman u inluwas hide ni Moises ti Egipto? 17Sakay ti deya u naiyamutan nu Diyos tu alay nu áppat a pulo a taon? Awan beman, u nagkasala hide a nágkatay tu parang? 18Sakay ti deya u kinagiyan a, “Awan hide makasáddáp tu páppágyanan na sakay makaimang” Awan beman u masássuwayán hide? 19Kaya tukoy tam a awan hide makasáddap tu páppágyanan na sakay makaimang dipo tu awan de pánniwala.

Currently Selected:

Hebreo 3: MBJC

Highlight

Compare

Copy