Galacia 1
1
1Iye a sulat ay gábwat nikán a ti Pablo, a pinile a apostol bakán a gábwat tu tolay oni tu pamamag-itan nu tolay, nan ti Jesu-Cristo sakay tu Diyos Ama a huway a nangbiyag ni Jesus. 2U atanan nu kákkapatkákka tam a katoy he ay kaguman ko a mákkumusta nikam a mánnampalataya hide a taga-prubinsiya ni Galacia.
3Magkahod kam nakwa ti kapayapaan sakay págpapala a gábwat tu Diyos a Ama sakay tu Panginoon tam a ti Jesu-Cristo.#1:3 Basaán tu Roma 1:7. 4Inyalay ni Cristo u sadile na dipo tu kasalanan tam, sigun tu kaluuben nu Diyos Ama tam. Ginimet na iye para meligtas kitam tu kadukássan a kasalukuyan a maghare ti munduwan iye.#1:4 Basaán tu Galacia 2:20, 1 Timoteo 2:6. 5Puriyán u Diyos hanggan-hanggan! Amen.#1:5 Basaán tu Roma 16:27.
U Tunay a Maganda a Baheta
6Nagtakaák ni bakin alisto kam a immadág tu Diyos a nangdulaw nikam tu pamamag-itan nu kagbi ni Cristo. Sakay inumagton kam tu baka-bakán a u kagi moy ay maganda a baheta. 7U tatahoden ay awan talaga ti iba a Maganda a Baheta. Kaya la ay tehhod a makánguluwán nikam, sakay gusto de a ibaán u Maganda a Baheta tungkul ni Cristo. 8Pero ni te tolay oni hikame oni essa a anghel a gábwat ti langet u magtoldu nikam ti iba tu Maganda a Baheta maliban tu intoldu mi dán nikam ay parusaan nakwa siya nu Diyos!#1:8 Basaán tu 2 Corinto 11:4. 9Kinagi mi dán iye nikam tu itod sakay kagiyán ku dámman a huway, ni tehhod man a magtoldu nikam a iba tu Maganda a Baheta maliban tu tinanggap moy, ay parusaan nakwa siya nu Diyos! 10Diyan moy isipán a kaya ku iye a kákkagiyán ay para masaya nikán u tolay. U papure la a gábwat tu Diyos u gusto ko a matanggap. Ni ilingán ku laay ay u ikasaya nu tolay, ay awanák tunay a tagapagserbi ni Cristo.#1:10 Basaán tu 1 Tesalonica 2:4.
Ni Kodya a Nagin Apostol ti Pablo
11Gusto ko a matukuyan moy kákkapatkákka ko hide a u Maganda a Baheta a ipáppangaral ko nikam ay bakán a gime-gimet la ni tolay.#1:11 Basaán tu Roma 1:16-17. 12Dipo awan ko iye tinanggap tu tolay sakay awan bi iye intoldu nikán nu maskin deya a tolay. Nan ti Jesu-Cristo a mismo u nánghayag he nikan.
13Tukoy moy labe u date ko a kákkabiyag tu relihiyon nu Judio hide. Pinahirapan ko ti husto u mánnampalataya hide tu Diyos sakay sinikap ko hide a sidaan a atanan.#1:13 Basaán tu Gimet 8:3, 22:4-5, 26:9-11. 14Sakay tungkul be tu págsunud tu relihiyon me a Judio ay mas lamangák, nan tu kaidad ko hide, dipo talaga a sinunud ko ti husto u kaugaliyan a naggábwat tu ninuno me hide.#1:14 Basaán tu Gimet 22:3.
15Pero tu kagbi nu Diyos ay piniliyák na dán a magin tagapagserbi na, baguwák pa a neenák. #1:15 Basaán tu Gimet 9:1-19, Isaias 49:1, Jeremias 1:5. 16Nikuna ipakapospos nikán nu Diyos u Anak na para mebaheta ko tu Hentil hide ay awanák nák-aged ti payo tu maskin ti deyaman.#1:15-16 Basaán tu Gimet 9:3-6, 22:6-10, 26:13-18. 17Oni immangay ti Jerusalem tánni mákkapospos tu apostol hide a nedipalongo nikán. Nan immangayák ti Arabia sakay káttapos ay nagsoliyák ti Damasco. 18Kállipas nu tállo a taon ay immangayák ti Jerusalem tánni mákpágguhon ni Pedro. Sapulo wak ay ti limma a aldew a nágyan hod.#1:18 Basaán tu Gimet 9:26-30, 11:30. 19Awanák hod ti netan a agum a apostol, nan ti Pedro la sakay ti Santiagu a wadi nu Panginoon.
20Tatahoden a atanan i kinagi kuwáy ti sulatan iye, tukoy nu Diyos a awanák magbule-bule.
21Káttapos hod ay immangayák ti Siria sakay Cilicia. 22Ti itod a panahun ay awanák palla netan nu mánnampalataya hide a taga-Judea. 23Nabaheta di dálla a, “U date a mágpahirap nide ay nangaral dán nadid ti pánnampalataya a sinikap na a sidaán tu itod.” 24Kanya pinure de u Diyos dipo tu ginimet na nikán.
Currently Selected:
Galacia 1: MBJC
Highlight
Share
Compare
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
