Gimet 28

Tu Lugar a Malta

1Nikuna makaapet kami dán ay natukuyan me a puduk bál lan itod ay ngángngahanan de a Malta. 2Mabait a tahod u tolay hod hide sakay tinanggap di kame ti maayus. Pinagnamo di kame ta madagnen dipo naguden sakay inasikaso di kame ti husto.#28:2 Basaán tu Gimet 4:9, Galacia 5:22, Tito 3:4. 3Nangopkop ti Pablo ti kayo sakay nikuna itolo na dán ay tehhod a bigla a limmuwas a makamandag a ulag dipo tu init nu apoy. Sakay kinaget na u kamát ni Pablo. 4Nikuna ketan nu tagahod hide u ulag a bumábbátten tu kamát ni Pablo ay nakagi de tu balang essa nide, “Talaga a mágbabono i lállakeyan iye. Nakaligtas ngane siya tu diget, pero awan be siya pinakultaden nu hed ti langet a mabiyag pa siya.” 5Pero inwatek la ni Pablo u ulag tu apoy sakay awan siya naaánya. 6Áuhayán de ni bumige u kamát ni Pablo oni pagdaka a matumba sakay matay. Pero nalay dán hide a makán uhayán ay awan la ti nangyare nikuna, kanya nagbagu u isip de, kinagi de, “Essa siya a diyos!”

7Ti itod ay te adene a luta a kao nu pinuno ti lugaran itod u ngahan na ay ti Publio; pinatulos nakame ti mahusay tu bilay na sakay inasikaso nakame ti husto tu luub nu tállo a aldew. 8Nagkataun a te saket u ama ni Publio dipo maladu sakay magkurso. Kanya binisita siya ni Pablo, káttapos na a ipagdasal ay intupo na u kamát na tu te saket sakay nagpiyya. 9Dipo ti iye a pangyayare ay nagdemáttan u agum hide a taga hod a tehhod a saket, sakay pinagpiyya na be hide.#28:8-9 Basaán tu Gimet 3:1-8, Gimet 20:9-12, 2 Corinto 12:12. 10Inatádden di kame ti makpal a regalo. Sakay nikuna maghektat kami dán ay indátton de tu abeng u kailangan mi hide.

U Biyahe Me Sapul ti Malta Hanggan ti Roma

11Tállo a bulan u limmipas bagu kami hod a limmakad. Simmakay kami dámman tu essa hod a barko a gábwat ti Alejandria a nagpalipas be ti amiyan hod. U ngahan nu barko ay “U Kambal a diyos.” 12Dimmung kame ti Siracusa sakay tállo kami hod a aldew. 13Sapul ti Siracusa ay nagtulos-tulos kame a nágbarko hanggan ti Regio. Tu sumunud a aldew ay nagabagat, kanya tu alay nu duwwa la a aldew ay dimmung kame ti Puteoli. 14Tehhod kame hod a netan a kákkapátkákka ti pánnampalataya, inakit dikame a mágyan pala hod ti sasimba. Sapul ti Puteoli ay nagtulos kame dán ti Roma. 15Nikuna a mabaheta nu kákkapátkakka hide ti pánnampalataya ti Roma u tungkul nikame ay immangay hide tu Tindaan de Apio, sakay u agum ay hod tu Tállo a bilay a áupaan tanni tagbuwan di kame hod. Nikuna ketan ni Pablo u kákkapátkakka hide ay nagpasalamat siya tu Diyos sakay bimmegsák u isip na.

Ti Roma

16Káddemát me ti Roma ay pinakultadan de ti Pablo a mangupa ti sadile na a págyanan, pero kaguman na u essa a sundalo a mágbantay nikuna.

17Kállipas nu tállo a aldew ay impadulaw ni Pablo u puno nu Judio hide ti Roma. Nikuna namagkatipun dán hide ay kinagi na, “Kákkapatkákka ko hide, maskin awanák ti nagimet a kasalanan kontara tu banuwan tam oni tu patakaran nu nunu tam hide ay dinakappák de ti Jerusalem sakay inpiresuwák de tu gubiyerno ni Roma. 18Nikuna matapusák a malitis ay palayaannák di dán nakwa dipo awanák be ti ginimet a madukás para maparusaan ti kamatayan. 19Pero kinontra nu Judio hide, kanya napilitanák a iyadene u kaso ko tu hare, maskin awanák ti reklamo kontara tu kalugaran ko hide. 20Impadulaw takam dipo gusto takam a ketan sakay para makagi ko nikam a kanyaák a hod he a nakapireso dipo tu pánniwala ko ni Jesus a pag-asa nu Israelita hide.”

21Kinagi di nikuna, “Awan kame ti natanggap a sulat a gábwat ti Judea tungkul niko, sakay tu kalugaran tam hide a immangay he ay awan ti nagbaheta oni nagupos ti maskin ányaman a kontara niko. 22Pero gusto mi be a masaneg ni ánya makagi muway, dipo tukoy me a maski ni hádya a lugar ay ipáppadukás nu tolay hide i pánniwala muwe.”

23Kanya nagtakda hide ti essa a aldew, sakay makpal u immangay tu páppágyanan ni Pablo káddemát ni itod a aldew. Saldew siya a nagpaliwanag nide sakay nángpatunay tungkul tu pághare nu Diyos. Tu pamamag-itan nu Kautusan ni Moises sakay u insulat nu prupeta hide ay ginimet na u atanan a makaya na tán maakit na hide a sumampalataya ni Jesus. 24Tehhod a naniwala sakay tehhod labe a awan naniwala tu kinagi na. 25Kanya nikuna a awan hide mamágkasundu ay limmakad hide káttapos iye a kagiyán ni Pablo, “Tahod u kinagi nu Banal a Ispirito tu nunu tam hide tu pamamag-itan ni prupeta Isaias:

26‘Umangay kahod ti iye hide a tolay sakay kagiyán mo nide,

Mágsaneg kam man a mágsaneg ay awan kam makaintendi,

Sakay umileng kam man a umileng ay awan kam maketa.

27Dipo tunay ti igát i puso wáy ni tolayan hidenye,

Tinakáppan de u talinga de,

Sakay ingkiháp de u mata-mata de.

Dipo umád de a maketa u mata-mata de,

oni makasaneg u tali-talinga de.

Dipo makay maketa u mata de

Sakay makasaneg u tali-talinga de,

ay makaintendi u isip de hide,

Sakay magpakumbaba hide nikán,

sakay pagpiyyaán ko hide,’” kagi nu Panginoon.#28:26-27 Basaán tu Isaias 6:9-10.

28Kinagi pa ni Pablo, “Kanya nadid gustu ko a matukuyan moy a iye a impakapospos ko nikam tungkul tu kaligtasan a gubwát tu Diyos ay impáppangaral dán tu Hentil hide sakay hide pa u naniwala ti iye!” #28:28 Basaán tu Awit 67:2. 29Káttapos iye a kagiyán ni Pablo ay naglakaden u Judio hide a mágdadibatiyán hide ti mahigpit.

30Sakay duwwa a taon ti Pablo a nágyan tu nákkaseruwan na sakay tinanggap na ti mahusay atanan a tolay a umadene nikuna. 31Mabegsák u isip na sakay malaya siya a nangaral tungkul tu pághare nu Diyos sakay tungkul tu Panginoon Jesu-Cristo.

Currently Selected:

Gimet 28: MBJC

Highlight

Copy