Gimet 26

Nangatuwiran ti Pablo tu Atubangán ni Agripa

1Kinagi ni Agripa ni Pablo, “Maare ka dán a magupos; ánya makagi muway nadid tungkul ti sadile muwe?” Nagpatabi pa ti Pablo bilang pággalang na, sakay nagupos tu págtanggul tu sadile na:

2“Kagalang-galang a hare a Agripa, mapaladák dipo inatáddinák mo ti pagkakataon a tumaknág tu atubang mo para ipagtanggul i sadile kuwáy tu atanan a ibábbintang nu Judio hide, kontra nikán. 3Dipo tukoy mo u kaugaliyan sakay u bagay hide a namágtábbegan nu Judio hide. Kanya mákkekakagbiyák niko a ni maare ay pagtiyagaan mo a sanigán i kagiyán kuwáy.

4Tukoy nu Judio hide ni kodyaák a nabiyag sapul pa nikuna anakák, tu sadile ko a lugar sakay ti Jerusalem. 5Nalay di dán a tukoy, sakay hide dán u makapagpatunay ni gustuwán di la, a sapul pa ti sapul ay kabilangák dán tu pinakaistrikto a sekta a relihiyon me ta nabiyagák bilang essa a Pariseo.#26:5 Basaán tu Gimet 23:6. 6Nadid ay katoyák he tán litisán dipo tu káasa ko tu pananto nu Diyos tu ninuno me hide. 7Itona be a pananto u áasaan nu sapulo ay ti duwwa a lahe kanya taimtim hide a magpure tu Diyos aldew ay ti gibi. Sakay dipo labe ti iye a pag-asa, Kagalang-galang a Hare a Agripa, kanya pinagbintanganák nu Judio hide!#26:6-7 Basaán tu Lukas 2:25-26, Roma 5:2-5, Roma 15:13. 8Bakin mahirap kam a maniwala a biyagán nu Diyos u nágkatay dán hide?

9Akala ko be tu itod ay kailangan ko a gimitán u atanan a makaya ko kontara tu ngahan ni Jesus a taga-Nazaret. 10Kanya konna hod u ginimet ko ti Jerusalem. Makpal a kristiyano u impepireso ko, dipo tu kapangyariyan a inyatád nikán nu puno nu saserdote hide. Sakay nikuna a hatulan u agum nide ti kamatayan ay essaák be a immayun nide. 11Sináddáp ko atanan a sinagoga, sakay ni deya man u kedemáttan ku hod ay pinahirapan ko tánni pilitán a magupos kontara ni Jesus. Tu subra ko iyamut tu mánnampalataya hide ay immangayák pa tu agum a bansa para pahirapan ko hide.”

Ingkagi ni Pablo ni kodya siya a Simmampalataya

12“Iye u dahilan ni bakin a immangayák ti Damasco a te kapangyariyan a inpakultad nu puno hide a saserdote. 13Mentaras a maglakad kame tu tanghale a tapat. Hare a Agripa, ay naketaák ti grabi't demlag a gábwat ti langet, mas mademlag pa iye nan u aldew. Nagdemlag u lebut me a mamágkakaguman. 14Nalugmuk kame a atanan tu luta sakay te nasanigák a boses a magupos nikán ti upos a Hebreo, ‘Saulo, Saulo, bakin páppahirapanák mo? Páppahirapan mu la i sadile muwe tu pángkontara mo nikán. Kumán ka a mangtáttendak tu mamuhok a kayo.’ 15Kanya kinagi ko a, ‘Deya ka Panginoon?’ Kanya kinagi na, ‘Hikán ti Jesus a páppahirapan mo. 16Tumaknág ka! Pimmetaák niko dipo hiko u pinile ko a magin tagapagserbi ko. Hiko u mangpatunay tungkul tu netan mo nadid sakay tu ipeta ku pa hide niko. 17Hiko u paangayán ko para magtoldu tu tungkul nikán tu Hentil hide. Sakay iligtas taka tu kabanuwan mo hide sakay tu Hentil hide a kumontara niko.#26:16-17 Basaán tu Ezekiel 2:1, 3. 18Paangayán taka ti itod hide a tolay tánni mabukasan u mata de. Sakay mesole hide tu demlag gábwat tu kadiklámman, tánni meligtas hide tu kapangyariyan ni Satanas sakay isole tu Diyos. Tu pamamag-itan nu pánniwala de nikán ay mapatawad hide tu kasalanan de hide sakay mebilang hide tu pinile hide nu Diyos!’#26:18 Basaán tu Juan 17:17-19, Roma 15:16, 1 Tessalonica 5:23.

Ingkagi ni Pablo u Págserbi na

19Dipo ti iye, kagalang-galang a hare a Agripa, kanya awanák simmuway tu pangitain a gábwat ti langet. 20U purumero ko a nangaralan ay ti Damasco, káttapos ay ti Jerusalem sakay tu buu a Judea hanggan tu Hentil hide. Inpangaral ko a kailangan hide a magsise sakay magpasakup tu Diyos sakay ipeta de tu gimet de a nagsise dán hide.#26:20 Basaán tu Gimet 9:20, 28, 29. 21Dipo ti iye hide a ginimet ko kaya dinakáppák nu Judio hide mentaras hedák tu templo, sakay gustuwák de pa a bunuwán. 22Pero maskin nikan ay awanák pinabayan nu Diyos, kanya katoyák he nadid a magpatunay tungkul nikuna tu atanan a tolay, mababa man oni u mágkataas hide a tolay. Awanák ti itáttoldu ni awan u kinagi la nu prupeta hide sakay ni Moises, 23a kailangan a maghirap ti Cristo, sakay siya u kadipalonguwan a mabiyag a huway para mángligtas tu kabanuwan na hide a Judio sakay tu Hentil hide.” #26:23 Basaán tu 1 Corinto 15:20, Isaias 42:6, Isaias 49:6.

24Mentaras a magupos ti Pablo ay kinagi ni Festo ti mabegsák, “Magaheng ka dán Pablo! Nasubraan ka dán ti talino kanya ka nagaheng-aheng!” 25Pero timmábbeg ti Pablo, “Awanák magaheng, kagalang-galang a Festo! Malinaw i isip kuwáy sakay i kákkagiyán kuwáy ay tatahoden. 26Tukoy ni Hare a Agripa iye hide a bagay. Kanya awanák manteng a magupos tu atubang na dipo tukoy na iye hide a bagay. Awan ti nangyare a awan mu tukoy dipo awan iye nangyare ti essa a tagu a lugar. 27Kagalang-galang a Hare a Agripa, tukoy ko a maniwala kam tu prupeta hide, awan beman?” 28Kinagi ni Hare a Agripa ni Pablo,

“Akala mu beman ay maakiták mo a magin Cristiano tu badit la a odas?” 29Timmábbeg ti Pablo, “Maski dakál oni badit a odas, basta i dasal kuwáy tu Diyos ay bakán la nakwa hiko nan pate u atanan a mágsaneg nikán nadid ay magin konna nikán, pero dyan la nakwa u pákkapungo ko.”

30Timmaknág u hare, u gubernador, ti Bernice sakay u atanan a kaguman de 31sakay kálluwas de ay kinagi de tu balang essa nide: “I tolayan iye ay awan ti ginimet a ányaman para hatulan ti kamatayan oni kákkepireso.” 32Sakay kinagi pa ni hare a Agripa ni Festo, “Maare tamon nákwa siya a paluwasán ni awan na la impákkekagbi a iyatubang u kaso na tu hare ti Roma.”

Currently Selected:

Gimet 26: MBJC

Highlight

Copy