2 Tesalonica 2
2
U Kássole nu Panginoon
1Nadid, kákkapatkákka me hide, tungkul be tu kássole nu Panginoon a ti Jesu-Cristo ay maipun kitam a tumagbu nikuna, kaya ipákkekagbi ko nikam,#2:1 Basaán tu 1 Tesalonica 4:15-17. 2diyan kam manteng oni mabalisa tu mabaheta moy a dumemát dán u Panginoon. Diyan kam maniwala maski ni kagiyán de a kinagi nide nu Banal a Ispirito, oni nabaheta de oni nabasa de tu essa a sulat a gábwat kan nikame.#2:2 Basaán tu 2 Tesalonica 3:17. 3Diyan kam magpalinlang nide maski ni ánya man a kaparaan. Dipo u aldew nu káddemát nu Panginoon ay awan dumemát mentaras awan magsapul u páng-adi nu tolay hide tu Diyos, sakay awan palla dummemát u tolay a masássuwayán a netakda tu awan ti kahád a kaparusaan.#2:3 Basaán tu Efeso 5:6-8; Daniel 7:25; 8:25; 11:36; Pahayag 13:5; Juan 17:12. 4Kalabanán na u atanan a sássambaán sakay diyos nu tolay hide, sakay ilangkaw na u sadile na. Mággetnod siya tu disalad nu Templo nu Diyos sakay ikagi na u sadile na a siya u Diyos.#2:4 Basaán tu Ezekiel 28:2.
5Awan beman kinagi ko dán iye hide a bagay nikuna a kagumanák moy palla hina?#2:5 Basaán tu 1 Tesalonica 3:4. 6Sakay tukoy moy a kaya awan palla mangyare ay te mangpugád palla nikuna a lumuwas. Pero tu netakda a panahun, ay lumitaw a talaga i itona a tolay a masássuwayán. 7Nadid, u tarabaho ni itona a masássuwayán, ay nagsapul dán ti lihim. Pero siya a mismo ay awan palla pimmeta, ta awan palla naibut ti munduway u mangpugád nikuna. 8Pumeta siya kapag naibut dán u mangpugád nikuna. Pero tu káddemát nu Panginoon Jesu-Cristo, ay bunuwán na i tolayan iye a masássuwayán. Puksaán na iye tu pamamag-itan la nu angás na. Sakay tunawán nu makasile a demlag a katoy nikuna tu káddemat na.#2:8 Basaán tu Isaias 11:4.
9Pumeta i tolayan iye a madukás a tehhod a kapangyariyan ni Satanas. Maggimet siya tu himala hide sakay tu atanan a bagay a makataka-taka para linlangan na u tolay hide.#2:9 Basaán tu Mateo 24:24; Juan 4:48. 10Gimitán na u sari-sare a paraan a pagkamaliyan nu tolay hide a mepahamak. Mepahamak hide dipo umád de a pahalagaan u tatahoden a makapángligtas nide. 11Dipo umád de a tanggapán u tatahoden ay pabayan dálla hide nu Diyos tu kákkalinlang de para maniwala hide tu kakabuliyan.#2:11 Basaán tu Roma 1:28. 12Kaya maparusaan u atanan a awan maniwala tu tatahoden, dipo u gugusto de ay u gimet a madukás.
Pinile hide nu Diyos Para Maligtas
13Kákkapatkákka ko hide, lagi kame a magpasalamat tu Diyos dipo nikam a mahal nu Panginoon. Sakay dapat la a magpasalamat kame, dipo sapul pa tu sapul ay pinile kamon nu Diyos a maligtas tu pamamag-itan nu Banal a Ispirito a mangpabanal nikam, sakay tu pamamag-itan nu pánnampalataya moy tu Tatahoden.#2:13 Basaán tu 2 Tesalonica 1:3; Efeso 1:4; 1 Pedro 1:2. 14Dinulaw kam nu Diyos tu pamamag-itan nu Maganda a Baheta a intoldu me nikam, para makaguman moy be u Panginoon tam a ti Jesu-Cristo tu kaluwalhatiyan na.
15Kanya nadid, kákkapatkákka me hide, manatile kam a matatag a tumáttawed tu intoldu me nikam tu pággupos man oni tu sulat.#2:15 Basaán tu 1 Corinto 16:13; 11:2.
16Paha-pahaán kam nakwa nu Panginoon tam a ti Jesu-Cristo sakay u Diyos tam a Ama a magmahal nikitam. Sakay tu pamamag-itan nu kagbi na, ay inatadden na kitam ti awan magbabagu a begsák ni isip sakay matibay a pag-asa.#2:16 Basaán tu 1 Tesalonica 3:11; 1 Pedro 1:3. 17Atádden kam nakwa nu Diyos ti matatag a kaluuben para mepahayag moy sakay megimet u atanan a mágkaganda.
Currently Selected:
2 Tesalonica 2: MBJC
Highlight
Share
Compare
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
