2 Corinto 9

Tulung para tu Kákkapatkákka hide

1Nadid, awan ku dán kailangan a magsulat pa nikam tungkul tu káttulung tu kákkapatkákka hide ti Jerusalem.#9:1 Basaán tu 2 Corinto 8:4. 2Dipo tukoy ko a handa kamon a tumulung, sakay impagmadakál takam pa tu taga-Macedonia hide. Kinagi ko a handa kamon a taga-Acaya hide, tu nakalipas pa he a taon; kaya makpal u nalukag tu págtulung dipo tu págmalasakit moy.#9:2 Basaán tu Roma 15:26, 2 Corinto 8:10. 3Kaya pinágdipalongo ku dán hina u kákkapatkákka tam hide tánni awanák mepasanike tu pángmadakál ko tungkul nikam sakay tánni mehanda dán u tulung moy, a konna tu kinagi ko.#9:3 Basaán tu 1 Corinto 16:2. 4Dipo ni dimmemátták hina sakay ti kákkapatkákka tamáy hide a taga-Macedonia, sakay ketan de a awan kam palla handa, ay mepatagamaák la sakay pati hikam. 5Kaya naisip ko a mágdipalongo dálla hina u kákkapatkákka tam bagu hikán tánni mehanda de u tulung a inpananto moy. Tánni konna hod ketan a magaan tu pággisipan moy u pángngatád moy bakán a sapilitan.

6Tandaan moy iye: u magmula ti badit ay mag-ane labe ti badit, sakay u magmula ti makpal ay mag-ani labe ti makpal. 7U balang essa ay dapat mangatád ayun tu kagustuwan na sakay tehhod a kasayaan bakán a napilitan la, dipo mahal nu Diyos u mangatád ti kusa a te kasayaan.#9:7 Basaán tu Kawikaan 22:8. 8Sakay kaya kam a pasaganaán nu Diyos tu atanan a bagay a higit pa tu kailangan moy hide. Para tu atanan a panahun ay magin sapat kam tu atanan a bagay, tánni tehhod kam a metulung tu te kailangan hide.#9:8 Basaán tu Efeso 3:20. 9Konna tu kinagi nu Kasulatan:

“Siya u mángngatád tu mágkahirap hide;

Awan ti kahád u kabaitan na.”#9:9 Basaán tu Awit 112:9.

10U Diyos a mangatád ti bine tu mágmula sakay makan ay siya be u mangatád sakay mangpasagana tu atanan a kao moy para maslalo kampa a makatulung tu agum. 11Pasaganaán nakam tu atanan a bagay para lalu kam a makatulung tu agum. Tu pamamag-itan moy ay kumakpal u magpasalamat tu Diyos dipo tu tulung moy a iyangay ko nide. 12U káttulung moy tu kákkapatkákka hide ay bakán la a pángsuporta tu pangangailangan de, nan magin dahilan pa nu awan ti kahád a págpasalamat de tu Diyos. 13U pángngatád moy ay mangpatunay nide a tapat moy a sinunud u Maganda a Baheta tungkul ni Cristo. Dipo hina, magpure hide tu Diyos.#9:13 Basaán tu 2 Corinto 8:4, Roma 15:31. 14Kaya buo a págmahal di kam a idáddasal, dipo tu dakila a kaluub nu Diyos nikam. 15Salamat tu Diyos dipo tu kaluub na a awan ti kapareho!#9:15 Basaán tu Roma 5:15-16.

Currently Selected:

2 Corinto 9: MBJC

Highlight

Compare

Copy