2 Corinto 11

Ti Pablo sakay tu Magkukunware hide a Apostol

1Nadid, pagpasensiyaanák moy ni magupusák a kumán a tolay a awan ti tukoy. Sabagay páppasensiyaannák moy labe.#11:1 Basaán tu 2 Corinto 11:21. 2Dakál u págmalasakit ko nikam konna tu págmalasakit nu Diyos. Konna kam tu essa a malinis a madiket a ingkasundu ko tu essa a lállake, ni Cristo.#11:2 Basaán tu Oseas 2:19-20, Efeso 5:26-27. 3Pero mabalisaák baka malasun u isip moy sakay meadeyo kam tu tapat sakay malinis a pánnalig ni Cristo, konna ni Eva a nalinlang nu biklat.#11:3 Basaán tu Genesis 3:1-5, 13. 4Dipo masaya kam a mangtanggap tu maskin deya a dumemát sakay mangaral ti iba a Jesus kesa tu impangaral me. Tinanggap moy u ispirito sakay adal a iba tu itáttoldu me nikam.#11:4 Basaán tu Galacia 1:6.

5Tu palagay ko be ay awanák medimodyan ti mágkalalakiyan ina hide a apostol.#11:5 Basaán tu 2 Corinto 12:11, Galacia 2:6. 6Maski ni awanák malalake tu pággupos, ay awanák be kinulang ti karunungan. Tu atanan a pagkakataun ay pinatunayan me iye nikam.#11:6 Basaán tu 1 Corinto 1:17.

7Awanák nák-aged ti upa nikuna impangaral ko nikam u Maganda a Baheta. Nagpakababaák tánni melangkaw kam. Makagi beman a kasalanan ko iye?#11:7 Basaán tu 2 Corinto 12:13, 1 Corinto 9:18. 8Iba a simbaan u mággaatáddán tu kailangan ko hide nikuna magserbiyák nikam; kumán ko hide a pakán takawan para la matulungan kam.#11:8 Basaán tu Filipos 4:15-18. 9Sakay nikuna nagkulangák hina ay awanák nakadágge maskin deya man nikam dipo tinulunganák nu kákkapatkákka hide ti Macedonia. Sapul pa ti sapul ay iniwasan ko dán a makadággi nikam ti anya man a paraan sakay ina u gimitán ko hanggan-hanggan. 10Mentaras a he nikan u tatahoden tungkul ni Cristo, ay awan ko iyemang i págmadakál kuway a iye maski ni hádya ti Acaya. 11Bakin ginimet ko iye? Dipo beman a awan takam mahal? Tukoy nu Diyos, a mahal takam a tahod!#11:11 Basaán tu 2 Corinto 12:15.

12Sakay tulos-tulos ko a gimitán u gággimitán ko nadid tánni awan magkahod ti rason u mágbabahetaán hide a u pagserbi de ay konna tu gággimitán me.#11:12 Basaán tu 1 Corinto 9:12. 13Dipo iye hide a tolay ay bakán a tunay a apostol nan makándayaán la sakay magkukunware a apostol ni Cristo. 14Sakay awan iye págtakaan! Dipo maski ti Satanas ay maare a magkunware a anghel nu Diyos. 15Kaya awan pagtakaan a magkunware a alipin nu katuwiran u tagapagserbi hide ni Satanas. Kaya dumemát u aldew a maparusaan hide ayun tu atanan nu ginimet de hide.

U Tiniis hide a Hirap ni Pablo Bilang Apostol

16Huwayán ko: dyan moy isipán a awanák ti tukoy. Pero ni konna hod u pangakala moy ay tanggapán ku dán tánni makapagmadakállák be a konna tu essa a awan ti tukoy. 17U kákkagiyán ko a págmadakál ay bakán a gábwat tu Panginoon nan págmadakál nu tolay a awan ti tukoy.#11:17 Basaán tu 1 Corinto 7:12, 25. 18Nadid, dipo makpal u magmadakál tungkul tu bagay hide a makamundu, hikán be ay dapat a magmadakál. 19Dipo págtatiyagaan moy u awan hide ti tukoy, palibhasa a mágkalalaki kam.#11:19 Basaán tu 1 Corinto 4:10. 20U tatahoden, págtatiisan moy la a alipinán dikam, maski ni lokuwán dikamon, áagiwan ti kayamanan, badit-baditán dikam sakay ipasanike ay tiisán moy pade hide! 21Makasani-sanike man, aminán ko a mahinaák ngane dipo awan ko kaya a gimitán ina!

Pero ni tehhod a magmadakál ay makapagmadakállák be maski ni kumánnák a essa a awan ti tukoy. 22Ipagmadakál di beman a Judio hide, oni Israelita hide, sakay kaguman tu lahe ni Abraham? Hikán be. 23Tukoy ko a kumánnák dán a essa a magaheng, pero ni kagiyán de a tagapagserbi hide ni Cristo, mas malalakeyák a tagapagserbi ni Cristo nan hide. Susubra u págpagud ko nan hide; sangan a besesák a nepireso, nabálbág sakay pirme a te áng-áng ti kamatayan.#11:23 Basaán tu Gimet 16:23, 2 Corinto 6:5. 24Pumenlimmaák a makatanggap ti tállo a pulo ay ti siyam a latigu a gábwat tu Judio hide.#11:24 Basaán tu Deuteronomio 25:3. 25Pumentállo ko a nadanas u bálbág nu Romano hide, pumensan a binatikal. Pumentállo a mehombak u barko a sássakayan ko, saldiwák sakay sagibi a palatak-latak tu diget.#11:25 Basaán tu Gimet 16:22, Gimet 14:19. 26Tu madalas ko a págbiyahe ay nadanas ko u iba-iba a delikadu a kalagayan: tu dilikadu a dinom, tu mágbabano hide, tu kalugar ko hide a Judio sakay tu Hentil hide. Tu dilikadu hide a banuwan, paparang, tu diget, sakay tu tolay hide a magkukunware a mánnampalataya.#11:26 Basaán tu Gimet 9:23, Gimet 14:5. 27Nadanas ko be u matindi a hirap sakay pagud, pirme a magpuyat, matindi a aláp sakay uwaw. Nagdanasák ti dágnen dipo awanák ti mealikábkáb.#11:27 Basaán tu 1 Corinto 9:22. 28Maliban tu agum pa a karanasan a awan ko nabanggit, áisipán ko pa aldew-aldew u mánnampalataya hide. 29Ni tehhod a manghina ay karamayák de; sakay ni tehhod a nagkasala, grabi u pághirap ni puso kuwáy.

30Ni magmadakállák ay mas maganda pa ni ipagmadakál ko u kahinaan ko hide. 31Awanák magbule-bule. Tukoy ina nu Diyos sakay Ama nu Panginoon a ti Jesus. Puriyán u ngahan na a awan ti kahád. 32Nikuna hedák ti Damasco ay pinabantay nu gubernador a sakup ni Hare Aretas u pintuan nu banuwan tánni ipadakáppák na.#11:32-33 Basaán tu Gimet 9:24-25. 33Pero inyasákkák nu kaguman ko hide tu kumán a balulang sakay intostosák de tu dilupot nu pader kaya nakaginanák.

Currently Selected:

2 Corinto 11: MBJC

Highlight

Compare

Copy