1 Pedro 5

U Tolay Hide nu Diyos

1Hikam a pinuno hide nu mánnampalataya hide, mákkekagbiyák nikam bilang essa be a konna nikam. Tistiguwák tu pághirap ni Cristo, sakay kabahagiyák be tu karangalan na a adene dán a mehayag. Mákkekakagbiyák nikam 2a alagaan moy hide ti maayus u pinile hide nu Diyos a inpagkatiwala na nikam. Alagaan moy hide a konna tu pággalaga nu pastol tu tupa na hide. Pospusán moy hide a maluwag tu isip moy dipo itod u gusto nu Diyos, bakán a u mapilitan kam la. Gimitán moy u tungkulin moy bakán a tu pangsadile moy a kapiyyaan nan gimitán moy itod dipo gusto moy a magserbi. 3Diyan moy ituring a alipin u tolay hide a intiwala nikam nu Diyos nan ipeta moy a maganda kam a halimbawa nide tánni ahigán di kam. 4Sakay káddemát nu kapunuwan nu Pastol hide ay makatanggap kitam ti magkislap-kislap a kurona a awan masisida.#5:4 Basaán tu Gimet 11:30, Tito 1:5, Santiago 5:14.

5Kaya hikam be a áolito sakay mámmadiket hide, pasakup kam tu mágkatanda hide. Magpakababa kam a atanan dipo nesulat tu Kasulatan, “Sasala nu Diyos u palalo hide, sakay kasayaan na u magpakababa hide.” 6Kanya pasakup kam tu kapangyariyan nu Diyos tán parangalan nakam tu intakda na a panahun.#5:6 Basaán tu Filipos 2:3, Santiago 4:10. 7Ipebahala moy tu Diyos u atanan a kabalisaan moy hide dipo siya u mángmalasakit nikam. 8Pirme kam a humanda sakay magbantay dipo u kadima moy a ti Satanas ay dumahi-dahengding a kumán a liyon a magtágguwang a magehyok ti sangwabán na. 9Labanan moy siya sakay magpakatatag kam tu pánnampalataya moy tu Diyos. Dipo tukoy moy labe a bakán la a hikam i magdanasay ti konna he a hirap, nan pate u kákkapatkákka moy hide tu buo a mundu. 10U Diyos a naggábwatan nu Págpapala, siya u nangpile nikam tu pamamag-itan ni Jesu-Cristo tánni makabahagi nakam tu kapuriyan na a awan ti kahád, kaguman ni Cristo. Pero ipakultad napa a magtággád kam ti hirap tu sabadit a panahun, tánni gimitán nakam a ganap, sakay siya u mangpabegsák ti isip moye, sakay mangpatatag tu pánnampalataya moy nikuna.#5:10 Basaán tu 1 Corinto 1:8, Santiago 1:12, Juan 1:20-21. 11Katoy nikuna u atanan a kapangyariyan hanggan-hanggan. Amen!

U Katapusan a Bilin

12Ti Silvano u nangtulung nikán ti iye a sulat. Essa siya a kapatkákka tam a tapat sakay pagtiwalaan ko. Tu pamamag-itan ni sulat kuwan iye ay gusto ko a pabegsákkán u isip moy sakay patunayan a u atanan a intoldu ko nikam tungkul tu kagbi nu Diyos ay tatahoden. Kanya diyan kam humiwalay ti kagbi naan iye.

13Mákkumusta nikam u kákkapatkákka tam a katoy ti Babilonia, u pinile hide nu Diyos a kapareho tam labe a mánnampalataya. Mákkumusta be nikam ti Markos a mahal ko a anak ti pánnampalataya. 14Ipeta moy u págmahalan tu bawat essa. Nakwa u kapayapaan ni Cristo u pirme a katoy nikam a mánnampalataya hide.#5:14 Basaán tu Roma 16:16.

Currently Selected:

1 Pedro 5: MBJC

Highlight

Copy

Compare