1 Corinto 15
15
U Kákkabiyag a Huway ni Cristo
1Nadid, gusto ko a ipaalaala nikam, kákkapatkákka ko hide, u Maganda a Baheta a impangaral ko nikam. Ina u upos nu Diyos a tinanggap moy, sakay nagin pundasyon nu pánnampalataya moy. 2Tu pamamag-itan ni iye ay naligtas kam, ni masibát kam a maniwala tu upos a impangaral ko nikam, maliban dálla ni awan talaga tunay u kássampalataya moy.
3Dipo impangaral ko nikam i tunayáy a halaga a adal a tinanggap ko labe. Siya iye: natay ti Cristo dipo tu kasalanan tam hide, tánni matupad u nakasulat tu Kasulatan.#15:3 Basaán tu 1 Corinto 11:23, 1 Pedro 2:24, Isaias 53:5-12. 4Nelábbang siya sakay nabiyag a huway tu katállo a aldew, sigun be tu Kasulatan.#15:4 Basaán tu Mateo 16:21, Awit 16:8-9. 5Sakay pummeta siya ni Pedro, sakay tu sapulo ay ti duwwa a apostol.#15:5 Basaán tu Lukas 24:34, Mateo 28:17. 6Káttapos ay pummeta siya tu mahigit a limma a datos a kákkapatkákka a namággipun-ipun. Makpal palla u biyag nide hanggan nadid, pero nágkatay dán u agum. 7Pummeta be siya ni Santiago sakay tu atanan a apostol hide.
8U kadimodyanan ay nikuna pummeta siya nikán. Kumánnák a neenak tu awan tama a panahun dipo awanák nakaguman ni Jesus pero nagin apostolák napade maski konnaák tu essa a anak a neenak tu awan tama a panahun.#15:8 Basaán tu 1 Corinto 9:1, Galacia 1:16, Gimet 9:3-9. 9Dipo hikán u pinakamababa tu atanan a apostol; awanák karapat-dapat a madulawan a apostol, dipo pináppahirapan ko u mánnampalataya hide.#15:9 Basaán tu Gimet 8:3. 10Pero dipo tu kagbi nu Diyos nikán ay nagin apostolák, sakay awan be nawanan ti kabuluhan u kaluub a iye nikán. Nagtrabahuwák ti husto kasera tu agum nide, pero bakán iye tu sadile ko a kakayanan nan tu kabaitan la nu Diyos nikán. 11Kaya maski hikán oni hide, iye u ipáppangaral me, sakay sa iye u paniwalaan moy.
U kákkabiyag a Huway nu Nágkatay hide
12Nadid, ni ipáppangaral me nikam a nabiyag a huway ti Cristo, bakin a kákkagiyán nu agum nikam a awan mabiyag a huway u nágkatay hide? 13Pero ni tatahoden a awan ti mabiyag a huway, ay u gusto na a kagiyán ay awan labe nabiyag a huway ti Cristo. 14Ni awan nabiyag a huway ti Cristo ay awan ti kabuluhan u pángngaral me sakay awan kambe ti pakinabang tu pánnampalataya moy.#15:14 Basaán tu 1 Tesalonica 4:14. 15Bakán la a ina. Ni mara tatahoden u kákkagiyán moy a awan biyagán a huway nu Diyos u patay hide, u gustu na a kagiyán, awan nabe biniyag a huway ti Cristo. Ni konna hod, mágkabule kame a tistigu nu Diyos dipo itáttoldu me a biniyag nu Diyos a huway ti Cristo. 16Dipo ni awan nabiyag a huway u nágkatay hide ay awan be nabiniyag a huway ti Cristo. 17Ni awan nabiyag a huway ti Cristo, ay awan kam ti pakinabang tu pánnampalataya moy sakay awan kam pade napatawad tu kasalanan moy hide. 18Sakay bakán la ina, u gusto na a kagiyán atanan nu nágkatay dán hide a naniwala ni Cristo ay nepahamak.#15:18 Basaán tu 1 Tesalonica 4:16. 19Ni u pag-asa tam ni Cristo ay para la ti biyagáy a iye, ay hikitamon u pinakakakagbi tu atanan a tolay.
20Pero u tatahoden ay nabiyag a huway ti Cristo bilang katunayan a biyagán na a huway u nágkatay dán hide. 21Ni kodya a dummemát u kákkatay tu pamamag-itan nu essa tolay ay konna labe hod, dumemát be u kákkabiyag a huway tu pamamag-itan nu essa a tolay.#15:21 Basaán tu Roma 5:12. 22Dipo ni kodya a matay u atanan dipo hide ay lahe ni Adan, ay mabiyag be u atanan dipo tu pákpágkaessa de ni Cristo.#15:22 Basaán tu Roma 5:14-18. 23Pero u kákkabiyag a huway nu balang essa ay tehhod a netakda a panahun: u kadipalonguwan a nabiyag a huway ay ti Cristo; sakay tu kássole na he ti munduway ay u mánnampalataya dámman hide u biyagán na a huway.#15:23 Basaán tu 1 Tesalonica 2:19. 24Káttapos ni itod dumemát u katapusan. Sakay káttapos a matalo ni Cristo u atanan nu kaharian, pamahalaan sakay kapangyariyan ay iyatád na tu Diyos a Ama u pághare tu atanan. 25Dipo ti Cristo ay dapat a maghare hanggan matalo na sakay mapasuko na u atanan a kadima na.#15:25 Basaán tu Awit 110:1. 26U kadimodyanan a kadima a taluwán na ay u kamatayan. 27Dipo kinagi nu Kasulatan: “U atanan a bagay ay impasakup nikuna nu Diyos.” (Pero u upos a, “atanan a bagay,” ay maliwanag a awan he kaguman u Diyos a nángdátton tu atanan a bagay tu sakup nu kapangyariyan ni Cristo.)#15:27 Basaán tu Awit 8:6, Efeso 1:22. 28Ni nasakup dán nu kapangyariyan ni Cristo u atanan a bagay, u Anak dámman be u pasakup tu kapangyariyan nu Diyos a nángdátton tu atanan a bagay a nasakupan nu kapangyariyan nu Anak. Tu konna hod ay maghare u Diyos tu atanan.#15:28 Basaán tu Filipos 3:21.
29Nadid, te kaugaliyan u agum a tolay a magpabawtismo hide alang-alang tu nágkatay hide. Pero ni awan hide maniwala a huway a biyagán u nágkatay hide, bakin dipa a gimitán i kaugaliyan diyan itod? 30Sakay hikame, bakin mi pa a itaya u biyag me tu dilikadu a kalagayan kada odas? 31Awan ti odas a awanák katoy tu dilikadu a kalagayan, kákkapatkákka! Ni kodya a tatahoden a ipágmadakál takam dipo tu pákpagkaessa tam ni Cristo Jesus a Panginoon tam, tatahoden be i kagiyán kuwan iye!#15:31 Basaán tu Roma 8:36. 32Ni u pákpáglaban ko tu mágkatapang a kadima he ti Efesowáy ay para la tu tolay, anya pakinabang kuway? Ni awan be mabiyag a huway u nágkatay hide, maganda pa ni sunudán tam i kakagiyánán iye: “Kuman kitam sakay uminom, dipo ni ilaw ay matay kitamon.”
33Dyan kam padaya, dipo “U madukás a kaguman ay makasida ti mágkaganda a ugale.” 34Magpakatino kam sakay adággen moy dán u kasalanan. U agum nikam ay liwat u pákkatukoy na tu Diyos; kagiyán ko iye tánni mepasanike kam.#15:34 Basaán tu Roma 13:11.
U magin Idsura nu Bággi ni Mabiyag a huway
35Pero ni te magtanung, “Kodya a mabiyag a huway u nágkatay dán hide? Ánya u magin idsura nu bággi de?” 36Awan ti tukoy u magtanung ti konna hina! Awan mabiyag u bine a nemula ni awan iye matay.#15:36 Basaán tu Juan 12:24. 37Sakay ni magmula kam ti trigu sakay tu agum pa a bine, u imula moy ay u bukál la, bakán a u dakál dán a mula. 38U Diyos u mangatád tu bággi nu bine, ayun tu kaluuban na; bawat bine ay átádden na ti tama a bággi.
39Konna bihod tu bággi; awan pare-pareho u bággi nu nilalang hide a tehhod a biyag; iba u bággi nu tolay, iba u bággi nu hayup, iba tu manok hide, sakay iba be tu ikan hide.
40Te bággi a panglanget sakay tehhod be a pangluta; iba u ganda nu pangluta a bággi sakay iba be u ganda nu panglanget. 41Iba u demlag nu aldew, iba be u demlag nu bulan, sakay iba be u demlag nu biton hide. Sakay maski u biton hide ay tehhod a iba-iba a demlag.
42Konna labe hina tu kákkabiyag a huway. U melábbang a bággi ay mahunot, pero awan mahuno-hunot maski nikan u bággi a biniyag a huway. 43Madukás sakay awan ti kaya u baggi a nelábbang, pero ni biyagan dán iye a huway ay maganda sakay mabegsák dán. 44U bággi a nelábbáng ay pangluta, pero ni biyagán dán a huway ay bággi dán a panglanget. Dipo ni tehhod a bággi a pangluta tehhod be a bággi a panglanget. 45Konna he u nakasulat tu Kasulatan, “U kadipalonguwan a tolay a inatádden ti biyag ay ti Adan.” Pero u kadimodyanan a Adan ay ti Cristo a Ispirito a mángngatád ti biyag.#15:45 15:45 Basaán tu Genesis 2:7. 46Pero u dipalongo a inyatád nu Diyos nikitam ay u bággi tam a pangluta pero káttapos ni iye ay palitan na iye ti bággi a panglanget. 47U kadipalonguwan a tolay ay gábwat tu luta, pero u kaduwwa a tolay ay gábwat ti langet. 48Atanan a tolay ti muduwáy u bággi de ay konna tu bággi ni Adan a naggábwat tu luta. Pero u katoy ni Cristo ay magin kapareho nu bággi ni Cristo a gábwat ti langet. 49Ni kodya kitam a kapareho nu tolay a naggábwat tu luta ay dumemát u aldew a u bággi tam ay pumareho ni Cristo a naggábwat ti langet.
50Iye u gusto ko a kagiyán, kákkapatkákka ko hide: u bággi tam a nabuo nu pilas sakay dige ay awan magkahod ti bahagi tu kahariyan nu Diyos. U bággi a iye a mahunot ay awan maare a makatanggap ti biyag a awan ti kahád. 51Mágsaneg kam ta te kagiyánnák a lihim nikam: bakán a atanan ay matay, pero mabagu kitam a atanan,#15:51-52 Basaán tu 1 Tesalonica 4:15-17. 52ti essa a kisáp ni mata, kasabay nu dimodyan a tánnog nu trumpeta. Káttánnog nu trumpeta, u nágkatay dán hide ay mabiyag a huway sakay awan dán matay. Sakay mabagu kitam a atanan. 53Dipo i bággiyan iye a mahunot ay mapalitan ti awan mahunot sakay u bággi a matay ay mapalitan ti awan mata-matay. 54Ni mapalitan dán ti awan mahunot u bággi sakay mapalitan dán ti awan matay u bággi ay matupad u kinagi na tu Kasulatan: “Natalo dán u kamatayan; ganap dán u tagumpay!”#15:54 Basaán tu Isaias 25:8.
55“Awan dán ti tagumpay,
U kamatayan sakay awan dán siya ti kapangyariyan.”#15:55 Basaán tu Oseas 13:14.
56U kamandag nu kákkatay ay u kasalanan, sakay u kapangyariyan nu kasalanan ay naggábwat tu Kautusan. 57Pero magpasalamat kitam tu Diyos ta inatádden na kitam ti tagumpay tu pamamag-itan nu Panginoon tam a ti Jesu-Cristo!
58Kaya ngane, mahal ko hide a kákkapatkákka, magpakatatag kam sakay dyan manghina. Magpakasipag kam tu págserbi tu Panginoon dipo tukoy moy a awan masayang u pagud moy para nikuna.
Currently Selected:
1 Corinto 15: MBJC
Highlight
Share
Copy
Want to have your highlights saved across all your devices? Sign up or sign in
Pahanan Agta New Testament © Philippine Bible Society and Wycliffe Bible Translators, Inc., 2017.
