1 Corinto 13

U págmahal

1Nadid, ni makapagupusák man tu iba-iba a upos sakay tu upos nu anghel hide, ni awanák ti págmahal ay kumánnák la a bating-tingan oni pompiyang a makán tánnugán.#13:1 Basaán tu Awit 150:5. 2Sakay ni tehhodák a kakayanan a mángpahayag tu upos nu Diyos, sakay umintendi tu atanan a lihim, maski ni hed dán nikán u atanan a karunungan sakay mepaagton ko man u buked hide dipo tu grabi't kadakál nu pánnampalataya ko, ni awanák labe ti págmahal ay awanák ti kabuluhan.#13:2 Basaán tu 1 Corinto 14:2, Mateo 17:20, Mateo 21:21. 3Ipagatád ko man u atanan a ari-ariyan ko, sakay iyalay ko man u bággi ko para tutudán, ni awanák labe ti págmahal, ay awan labe iye ti kabuluhan nikán!

4U tolay a te págmahal ay matiyaga sakay mabait, awan masássállapán, awan hambug, oni mapagmadakál. 5Awan madukás u ugale na, awan makasadile, awan maáiyamután, sakay tukoy na a magpatawad tu kasalanan nikuna nu agum.#13:5 Basaán tu 1 Corinto 10:24. 6Awan na ikasaya u madukás a gimet, nan ikasaya na u tatahoden. 7U tolay a te págmahal ay mapagpatawad, te tiwala tu agum, pirme a tehhod a pag-asa, sakay mapagtiis tu atanan a hirap.#13:7 Basaán tu 1 Corinto 9:12.

8Mawan u kakayanan a magpahayag tu upos nu Diyos, mawan u kakayanan a magupos ti iba-iba a upos sakay mawan u karunungan, pero u págmahal ay awan ti kahád. 9Awan palla husto u karunungan tam sakay kakayanan tu págpahayag tu upos nu Diyos, 10pero káddemát nu aldew a magin ganap u atanan, iye hide a kakayanan a te pagkukulang ay mawan a atanan.

11Nikuna a anakák palla ay magupusák, magisipák sakay mangatuwiranák a konna tu anak. Nadid ta te idadák dán ay inibutan ku dán u pagkaanak ko. 12Nadid a kasalukuyan, awan maliwanag u pákkaintendi tam tungkul tu Diyos a kumán a mahabuháb a hupa u ketan tam tu aspeho, pero dumemát u aldew a ketan tam siya ti harapan. Badit palla u tukoy ko nadid; pero dumemát u aldew a matukuyan ko iye a atanan, konna tu pákkatukoy nu Diyos nikán.

13Kaya i tálluwan iye ay manatile: u pánnampalataya, pag-asa, sakay págmahal; pero u pinakamahalaga ti tálluwan iye ay u págmahal.

Currently Selected:

1 Corinto 13: MBJC

Highlight

Copy