Sealm 77
77
Sealm 76
1Ic mid stefne ongann styrman to Drihtne,
and he me gehyrde and beheold sona.
2Ic on earfoðdæge ecne Drihten
sohte mid handum swyþe geneahhe,
and ic on niht for him neode eode;
næs ic on þam siðe beswicen awiht.
And ic swiðe wiðsoc sawle minre
fælre frofre; 3þa ic fæste god
gemyndgade, þær ic hæfde mæstne hiht.
Swyðe ic begangen wæs and min sylfes gast
wæs hwonlice ormod worden,
4wæron eagan mine eac mid wæcceum
werded swyþe; ne spræc ic worda feala.
5Þa ic ealde dagas eft geþohte,
hæfde me ece gear ealle on mode.
6Ic þa mid heortan ongann hycggean nihtes;
wæs min gast on me georne gebysgad.
7Þa ic sylfa cwæð: “Ic to soðe wat,
nele þis ece God æfre toweorpan
ne us witnian for his weldædum,
8oððe wiþ ende æfre to worulde
his milde mod mannum afyrran
on woruldlife wera cneorissum.
9Ne byð æfre god ungemyndig,
þæt he miltsige manna cynne,
oþþe on yrre æfre wille
his milde mod mannum dyrnan.”
10And ic selfa cwæð: “Nu ic sona ongann
þas geunwendnes wenan ærest
þara hean handa haligan Drihtnes,
11weorca wræclicra worda gemyndig,
þæt he æt fruman wundor fæger geworhte.”
12Þa ic metegian ongan mænigra weorca,
hu ic me on eallum þam eaðust geheolde;
on eallum þinum weorcum ic wæs smeagende,
swylce ic on þinum gehylde sylf begangen.
13Ys weruda god on wege halgum;
hwylc is mihtig god butan ure se mæra god?
14þu eart ana god, þe æghwylc miht
wundor gewyrcean on woruldlife.
Eft þu þine mihte mænige cyðdest
folcum on foldan; 15þu wiðferedes eac
Israhela bearn of Ægyptum.
16Hwæt, þe, wuldres god, wæter sceawedon
and þe gesawon sealte yþa;
forhte wurdan flodas gedrefde,
wæs sweg micel sealtera wætera.
17Sealdon weorðlice wolcnas stefne
þurh þine stræle strange foran;
18wæs þunurradstefn strang on hweole.
Þonne ligette lixan cwoman,
eall ymbhwyrft eorðan onhrerdan.
19Wærun wegas þine on widne sæ
and þine stige ofer strang wæter;
ne bið þær eþe þin spor on to findanne.
20Folc þin ðu feredest swa fæle sceap
þurh Moyses mihtige handa
and Aarones ealle gesunde.
Currently Selected:
Sealm 77: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
