Sealm 75
75
Sealm 74
1We þe andettað, ecne Drihten,
and þe andettað ealle þeoda
and naman þinne neode ciegen.
Ic þin wundur eall wræclic sæcge,
2swa ic fæstlicast mæg befon wordum,
and eac soð symble deme.
3Eorðe is gemolten and hire eardend mid;
ic þonne hire swyre symble getrymme.
4Ic to yflum cwæð oft nalæs seldan:
“Nelle ge unriht ænig fremman
and agyltan,” þæt hi ne gulpan þæs.
5“Ne ahebbað ge to hea eowre hygeþancas,
ne ge wið gode æfre gramword sprecan.”
6For þon eastan ne cymeð gumena ænig,
ne of westwegum wera cneorissa,
ne of þissum westum widum morum;
7for þon him is dema Drihten sylfa.
Sumne he gehyneð, sumne ahefeð sniome;
8for þon se wines steap on waldendes handa
fægere gefylled is; þæs onfehð þe he ann.
Þonne he of þysum on þæt þonne oncerreð,
nyle he þa dærstan him don unbryce;
forþam sculon ealle drincan synfulle,
þa on þysse foldan fyrene wyrceað;
9ic þonne worulde gefean wynnum healde,
and Iacobes Gode georne singe.
10Ealra fyrenfulra fyhtehornas
ic bealdlice gebrece sniome;
swyþe beoð ahafene þa soðfæstan.
Currently Selected:
Sealm 75: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
