Sealm 107
107
Sealm 106
1Ic andette ecne Drihten,
þæne goodan god, forðan ic hine gleawne wat;
is his mildheortnes mycel to worulde.
2Secge þæt nu ða, þæt hi sylfa god
alysde, lifes weard, laðum of handa,
3and hi of sidfolcum gesamnade.
Fram uppgange æryst sunnan
oþ þæt heo gewiteð on westrodur
and fram sæ norðan 4swycedan geond westen;
ne meahton ceastre weg cuðne mittan,
þe hi eardunge on genaman.
5Hæfde hi hungor and þurst heard gewyrded,
þæt him frecne on feorh aðolude.
6And hi þa on þære costunge cleopedan to Dryhtne,
and he hi of þam earfeðum eallum alysde.
7Hi þa gelædde lifes ealdor,
þær hi on rihtne weg ricene eodan,
oð þæt hi cuðlice on becwoman
to hiora cestre eardungstowe.
8For ðon hi mildheortnesse mihtigan Drihtnes
ealle andettað, and eac sæcgeað
mycel wundur hys manna bearnum.
9For ðon he gesedeð sawle idle,
and þa hungrian her mid gōdum
fæste gefylleð to feore syþþan,
10Þa þe her on ðystrum þrage sæton
and on deaðes scuan deorcum lifdan,
gebundene bealuwe feterum
on wædle wrace and on iserne.
11Forðon hi dydan Drihtnes spræce
æghwæs ægype, and his geðeaht swylce
þæs heahstan him hæfdan on bysmer.
12Hiora heorte wæs hean on gewinnum
and untrume ealle wæran,
næfdan þa on foldan fultum ænne.
13Hi on costunge cleopedan to Drihtne,
and he hi of þam earfoðum eallum alysde.
14And he hi of þam þystrum þanon alædde
and of deaðes scuan deorcum generede
and heora bendas towearp bitre sneome.
15For ðan hi mildheort mod mihtigan Drihtnes
ealle andettan, and eac cweþan
mycel wundur his ofer manna bearn.
16For ðon he æren dor eaðe gescæneð
and iserne steng ana gebigeð.
17He hi of unrihtum ealle swylce
þam wraðan wege wis alædeð,
þær hi wæron on woo ær wraðe besmitene.
18Hi onhysctan æghwylcne mete,
mode mægen heora, oð unmihte,
þæt hy wið deaða duru drencyde wæran.
19Þa hi on costunge cleopedan to Drihtne,
and he hi of þam earfoþum eallum alysde.
20He him wisfæstlic word onsende,
þurh þæt hi hrædlice hælde wæron
and of heora forwyrde wurdan generede.
21For ðon hi nu andettan ecum Drihtne,
þæt he milde wearð manna cynne;
mycel ys his wundur ofer manna bearn.
22Hi him sculon laces lof lustum bringan,
and his weorc wynsum wide sæcgean.
23Þa þe sæ seceað, mid scipe liðað,
wyrceað weorc mænig on wæterðryþum.
24Hi Drihtnes weorc digul gesawon
and his wundra wearn on wætergrundum.
25Gif he sylfa cwyð, sona ætstandað
ystige gastas ofer egewylmum,
beoð heora yþa up astigene.
26Þa to heofenum up heah astigað,
nyþer gefeallað under neowulne grund;
oft þa on yfele eft aþindað.
27Gedrefede þa deope syndan,
hearde onhrerede her anlicast,
hu druncen hwylc gedwæs spyrige;
ealle heora snytru beoð yfele forglendred.
28Hi on costunge cleopedan to Drihtne,
and he hi of earfeðum eallum alysde.
29He yste mæg eaðe oncyrran,
þæt him windes hweoðu weorðeð smylte,
and þa yðe eft swygiað,
bliþe weorðað, þa þe brimu weþað.
30And he hi on hælo hyþe gelædde,
swa he hira willan wyste fyrmest,
and he hig of earfoðum eallum alysde.
31Hi andettan ealle Drihtne,
hu he milde wearð manna cynne;
mære synd his wundur ofer manna bearn.
32For ðon hine on cyrcean cristenes folces
hean ahebbað, and him hælu and lof
on sotelum soðfæstra secgean to worulde.
33He on westenne wynne streamas
soðfæst sette, þær he sarig folc
geðewde þurste þa blissade.
34He ða weaxendan wende eorðan
on sealtne mersc for synndædum
þara eardendra, þe hire on lifdan.
35Westen he geworhte on widne mere,
and swylce eorðan eac butan wætre
on utgange æþelast burnan.
36Þær he hungrium ham staðelude,
and þær gesetton swylce ceastre,
þær hi eard namon awa syþþan.
37Hi wingeardas wyrcean ongunnon,
sæde seowan, syþþan growan
lungre land heora aloden wæstmum.
38Þa he bletsade, and hi brade þa
weoxan weorðlice, wide greowan;
næs heora neata nan geyfelad.
39Oft hi fea wurdan feondum geswencte
fram þære costunge þe him becwom æfter,
sares and yfeles, þe hi syþþan begeat.
40Syððan hi forhogedan halige lare;
hiora ealdormen ealle wæron
sare beswicene, swicedan oftust
and on wegas werige wendan hwilum of.
41Þær he þearfendra þa miltsude,
and hi of wædle wean alysde,
sette heora staðol sceapum anlice.
42Syþþan þæt soðfæste geseoð, sniome æfter
bliðe weorðað, beot geþenceað,
þæt unrihta gehwylc eft oncyrreð
and his sylfes muð symble hemneð.
43Hwylc is wisra nu wel snotera,
þe þas mid gehygde healdan cunne,
and milde mod mihtigan Drihtnes
full gleawlice ongite syþþan?
Currently Selected:
Sealm 107: ASPsa
Highlight
Share
Compare
Copy
Want to have your highlights saved across all your devices? Sign up or sign in
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.
