Roma 2
2
Bonke abaJuda labezizwe bazakuthonisiswa nguNkulunkulu
1Ngakhoke, wena muntu, kawulakuzilandulela, loba ungubani, lapho uthonisisa; ngoba ngalokho othonisisa ngakho omunye uyazilahla wena, ngoba wena othonisisayo uyakwenza khona lokho lawe.#Mat 7:1; Luka 6:37 2Siyazi ukuthi ukuthonisisa kukaNkulunkulu kwehlela ngokweqiniso abenza okunjalo. 3Wena muntu othonisisa abenza okunjalo, ukwenza lawe, ucabanga ukuthi uzakuphepha ukuthonisisa kukaNkulunkulu na? 4Kumbe uyabeyisa yini ubukhulu besihawu sakhe lobokubekezela lobesineke sakhe na? Kawazi yini ukuba isihawu sikaNkulunkulu sikudonsela ekuphendukeni na? 5Kodwa ngobulukhuni benhliziyo yakho engaphendukiyo uzibekelela ulaka ngosuku lolaka, mhla kusambulwa ukuthonisisa okulungileyo kukaNkulunkulu 6ozakunika lowo lalowo ngokwemisebenzi yakhe.#Hubo 62:12; Zaga 24:12 7Labo abathi ngesineke bafune inkazimulo lodumo lokungabhubhi ngokwenza imisebenzi emihle, uzakubanika ukuphila okungapheliyo; 8kodwa abalenkani bengalaleli iqiniso, belalela ukungalungi, bazakuzwa intukuthelo lolaka. 9Usizi lokubandezeka kuzakwehlela abantu bonke abenza okubi, umJuda kuqala, lomGriki futhi; 10kodwa inkazimulo lodumo lokuthula kuzakwehlela phezu kwabo bonke abenza okuhle, umJuda kuqala, lomGriki futhi. 11Ngoba uNkulunkulu kakhethi muntu;#Dute 10:17 12abonileyo bengelamlayo bazakubhubha bengelamlayo; lalabo abonileyo belomlayo bazakuthonisiswa ngomlayo. 13Ngoba kakusibo abezwayo umlayo abangabalungileyo phambi kukaNkulunkulu, kodwa abenzayo umlayo yibo abazakulungisiswa. 14Nxa abezizwe abangelawo umthetho besenza ngokwemvelo okungokomlayo, lanxa bona bengelawo umlayo, bangumlayo wabo ngokwabo, 15ngoba babonakalisa ukuba umsebenzi womlayo ulotshiwe enhliziyweni zabo; lesazela sabo siyafakaza laso, lemicabango yabo ibasole loba ibavumele, 16ngosuku uNkulunkulu azakuthonisisa ngalo imfihlakalo zenhliziyo zabantu ngoKristu Jesu; litsho njalo ivangeli lami.
Ukwahluleka komlayo lokokusoka
17Kodwa wenake, uba usithi ungumJuda, uba uthemba umlayo, uzincoma ngoNkulunkulu, 18uba usazi intando yakhe, uba ukhetha okulungileyo ngoba ufundisiwe umlayo, 19uba uzithembile wena ukuthi ungumdonsi weziphofu, uyikukhanya kwabasemnyameni, 20ungumluleki wezithutha lomfundisi wezingane, lokhu ulakho ukuma kokwazi lokweqiniso emlayweni, 21wenake ofundisa omunye, kawuzifundisi na? Wena otshumayela ukuba umuntu angebi, uyeba na? 22Wena othi umuntu angafebi, uyafeba na? Wena onengwa yizithombe, uphanga amathempeli na? 23Wena ozincoma ngomlayo, udumaza uNkulunkulu ngokweqa umlayo na? 24Kulotshiwe ukuthi: Ibizo likaNkulunkulu liyahlanjazwa phakathi kwabezizwe ngenxa yenu.#Isa 52:5
25Ukusoka kambe kuyasiza uba ugcina umlayo; kodwa uba uweqa umlayo, ukusoka kwakho kuphenduka ukungasoki. 26Ngakhoke uba ongasokanga egcina izimiso zomlayo, ukungasoki kwakhe kakuyikubalwa ukuthi kuyikusoka na? 27Ng’khonake ongasokanga ngokwemvelo, egcina umlayo, uzakuthonisisa wena othi ulombhalo lokusoka weqe umlayo. 28Ngoba omgumJuda oqotho kasuye ongumJuda ngokwamehlo, lokusoka okuqotho kakusikho okubonwa emzimbeni. 29Kodwa umJuda oqotho ngulowo onguye ngaphakathi, lokusoka okuqotho kungokwenhliziyo, kungokomoya kungesikho okungokokulotshiweyo; ukuvezwa kwakhe kuvela kuNkulunkulu kungaveli ebantwini.#Dute 30:6
Currently Selected:
Roma 2: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
