Levi 24
24
Ukulondolozwa kwezibane
1INkosi yathi kuMose:#Eks 27:20–21 2Laya abantu bakoIsrayeli ukuba bakulethele amafutha amaoliva elungiselwe ukukhanyisa ukuze izibane zivuthe insuku zonke. 3Ngaphandle kweveli lobufakazi, ethenteni lokuhlangana, uAroni uzakuzilondoloza phambi kweNkosi, kusukela kusihlwa kuze kube sekuseni; lokhu kuzakuba yisimiso esingelakuphela ezizukulwaneni zenu. 4Uzakulungisa njalo izibane ezisoluthini lwesibane lwegolide elihle phambi kweNkosi.
Izinkwa ezehlukaniselwa iNkosi
5Uzathatha impuphu ecolekileyo, upheke ngayo amaqebelengwana aficaminwembili, elinye lelinye libe lengxenye yehefa lempuphu.#Eks 25:30 6Uwabeke etafuleni yegolide elihle kube lemizila emibili, omunye lomunye umzila ube lamaqebelengwana ayisithupha; 7futhi ubeke inhlaka emizileni yomibili, ibe yisikhumbuzo kanye lesinkwa, lomnikelo owenzelwe iNkosi ngomlilo. 8Ngawo wonke amaSabatha uAroni uzakuzilungisa ngalo phambi kweNkosi ngenxa yabakoIsrayeli, kube yisivumelwano esingelakuphela. 9Zizakuba ngezikaAroni lezamadodana akhe, bazidle endaweni engcwele; ngoba zingcwele kakhulu, zingezakhe ezivela eminikelweni eyenzelwe iNkosi ngomlilo. Lokhu kuyisimiso esingelakuphela.#Mat 12:4; Mark 2:26; Luka 6:4
Imithetho emayelana lokuhlambaza lokubulala
10Kwaphuma ebantwini bakoIsrayeli umuntu othile, unina engowakoIsrayeli loyise engowaseGibithe. Waxabana lomuntu wakoIsrayeli ezihonqweni, 11wahlambaza iBizo elingcwele, wathuka. Waselethwa kuMose. Ibizo likanina lalinguShelomithi, indodakazi kaDibiri, owesizwe sakoDani. 12Wafakwa entolongweni, kuze kwaziwe intando yeNkosi.
13INkosi yathi kuMose: 14Khuphela ngaphandle kwezihonqo lowo owathukayo; bonke abamuzwayo kababeke izandla zabo ekhanda lakhe, batshengise ukuthi ulecala, lebandla lonke limkhande ngamatshe. 15Uthi ebantwini bakoIsrayeli: Othuka uNkulunkulu wakhe uzakuthwala isono sakhe. 16Ohlambaza ibizo leNkosi kabulawe; lonke ibandla lizakumkhanda ngamatshe. Owezizweni ohlala phakathi kwenu laye owokuzalwa elizweni, nxa behlambaza iBizo elingcwele, bazakubulawa.
17Obulala umuntu kabulawe.#Eks 21:12 18Otshaya inyamazana ize ife uzakuyihlawula, kube yikuphila ngokuphila. 19Nxa umuntu elimaza umakhelwana wakhe, kuzakwenziwa kuye njengalokho enzile, 20kube yikwephuka ngokwephuka, lelihlo ngelihlo, lezinyo ngezinyo; njengalokho elimazile umuntu, laye uzakulinyazwa kanjalo.#Eks 21:23–25; Dute 19:21; Mat 5:38 21Obulalayo inyamazana uzakuyihlawula; obulalayo umuntu uzakubulawa. 22Lizakuba lomlayo munye kowezizweni lakowokuzalwa elizweni. Ngoba ngiyiNkosi uNkulunkulu wenu.#Nani 15:16 23UMose wakhulumake ebantwini bakoIsrayeli. Bamkhuphela ngaphandle kwezihonqo lowo owathukayo, bamkhanda ngamatshe. Abantu bakoIsrayeli benza njengokutsho kweNkosi kuMose.
Currently Selected:
Levi 24: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
