Gal 3
3
Umuntu uyalungisiswa ngokukholwa
1Hawu maGalathiya ayizithutha! Ngubani oliloyileyo lina abekwa obala phambi kwenu uJesu Kristu ebethelwe na? 2Yilokhu kuphela engithanda ukukubuza kini ukuthi: Lamukela uMoya ngemisebenzi yomlayo loba ngokuzwa langokukholwa na? 3Kanti liyizithutha kangaka na? Liqalile ngoMoya; selizakucina ngawenu amandla na? 4Konke ukuhlupheka kwenu kwaba yize na? uba kambe kwaba yize. 5Yena olinika uMoya losebenza imisebenzi yamandla phakathi kwenu ukwenza lokhu ngenxa yemisebenzi yenu yomlayo, ingabe ngenxa yokukholwa kwenu ivangeli na?
6Khumbulani uAbrahama; wakholwa kuNkulunkulu, kwabalelwa kuye ukuthi yikulunga.#Gen 15:6; Roma 4:3 7Ngakhoke yazini ukuthi abakholwayo yibo abangamadodana kaAbrahama.#Roma 4:16 8Lombhalo wabona ngaphambili ukuba uNkulunkulu uzakulungisisa abezizwe ngokukholwa, watshumayela ivangeli ngaphambili kuAbrahama wathi: Izizwe zonke zizakubusiswa kuwe.#Gen 12:3 9Ngakhoke bona abakholwayo babusiswa kanye loAbrahama owakholwayo. 10Kodwa bonke abathemba imisebenzi yomlayo baqalekisiwe; ngoba kulotshiwe ukuthi: Baqalekisiwe bonke abangemi njalo kukho konke okulotshiweyo encwadini yomlayo ukuba bakwenze.#Dute 27:26 11Kusobala ukuthi ngomlayo kakulamuntu ongalungisiswa phambi kukaNkulunkulu; ngoba kuthiwa: Lowo olungileyo ngenxa yokukholwa uzakuphila.#Hab 2:4 12Umlayo kawusiwo owokukholwa, ngoba kuthiwa: Lowo owenza lezizinto uzakuphila ngazo.#Levi 18:5 13UKristu wasihlenga ekuqalekisweni komlayo, yena waqalekiswa ngenxa yethu; ngoba kulotshiwe ukuthi: Baqalekisiwe bonke abalengiswa esihlahleni.#Dute 21:23 14Wakwenza lokhu ukuba ngoKristu Jesu isibusiso sikaAbrahama sifike phezu kwabezizwe, ukuba samukele isithembiso sikaMoya ngokukholwa. 15Bazalwane, ake ngililinganisele ngokwabantu. Intando yokucina yomuntu esiqinisiwe, kakho ongayichitha loba ongengezelela kuyo. 16Izithembiso zanikwa uAbrahama lenzalo yakhe. Kakutshiwo ukuthi: Ezinzalweni, ngokungathi zinengi; kodwa kungathi yinye kuthiwa: Lasenzalweni yakho; enguKristu.#Gen 12:7 17Ngitsho ukuthi isivumelwano esaqiniswa nguNkulunkulu ngaphambili kasichithwa ngumlayo owavela eminyakeni engamakhulu amane lamatshumi amathathu emva kokwenziwa kwaso, usenze isithembiso sibe yize.#Eks 12:40 18Ngoba uba ilifa likhona ngomlayo, kalisekho ngesithembiso; kodwa uNkulunkulu walinika uAbrahama ngesithembiso.#Roma 4:14
Umsebenzi womlayo
19Pho, umlayo uyini na? Wengezelelwa ngenxa yeziphambeko, kuze kufike inzalo eyanikwa isithembiso; wamiswa ngezithunywa ngesandla somlamuli. 20Kodwa umlamuli kasuye woyedwa; kanti uNkulunkulu munye. 21Phoke, umlayo uphambene lezithembiso zikaNkulunkulu na? Phinde! Ngoba uba wawunikiwe umlayo olamandla okuphilisa, ukulunga ngabe kukhona ngomlayo isibili. 22Kodwake umbhalo uvalele konke ngaphansi kwesono, ukuze isithembiso esingokukholwa kuJesu Kristu siphiwe abakholwayo. 23Kungakafiki ukukholwa sasilondolozwe ngaphansi komlayo, sivalelwe, kuze kufike ukukholwa obekuzakwambulwa. 24Ngakhoke umlayo wawungumlondolozi wethu kwaze kwafika uKristu, ukuze silungisiswe ngokukholwa. 25Kodwake khathesi sekufikile ukukholwa, kasisekho ngaphansi komlondolozi. 26Ngoba lina lonke lingabantwana bakaNkulunkulu ngokukholwa kuKristu Jesu. 27Lonke elabhaphathizelwa kuKristu lambethe uKristu. 28Kakukho umJuda lomGriki, kakukho obotshiweyo lokhululekileyo, kakukho owesilisa lowesifazana; ngoba lina lonke limunye kuKristu Jesu. 29Uba lingabakaKristu, liyinzalo kaAbrahama, liyizindlalifa njengokwathenjiswayo.#Roma 4:13
Currently Selected:
Gal 3: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
