Eks 31
31
Ukubizwa kukaBezaleli loOholiyaba
1INkosi yasikhuluma kuMose isithi:#Eks 35:30—36:1 2Ngikhethile uBezaleli indodana kaUri indodana kaHuri, owesizwe sakoJuda; 3ngimgcwalisile ngoMoya kaNkulunkulu ukuba abe lokuhlakanipha lokuqedisisa lokwazi lamandla okwenza yonke imisebenzi, 4ukuba aqambe imisebenzi yobungcitshi, asebenze ngegolide langesiliva langethusi, 5lokuba abaze amatshe okufakwa, abaze njalo izigodo, enze yonke imisebenzi yobungcitshi. 6Ngikhethile kanye laye uOholiyaba indodana kaAhisamaki owesizwe sakoDani; bonke abahlakaniphileyo ngibanikile ulwazi lokwenza konke engikulaye khona, 7ngitsho ithente lokuhlangana, lomtshokotsho wobufakazi, lesihlalo somusa esikuwo, lempahla yonke yethente, 8letafula lezitsha zayo, loluthi lwesibane oluhle kanye lezitsha zalo zonke, lealtare lempepha, 9lealtare lomnikelo wokutshiswa kanye lezitsha zalo zonke, lomkolo lenyawo zawo, 10lezambatho ezenziweyo kuhle, izambatho ezingcwele zikaAroni umpristi, lezambatho zamadodana akhe ukuba babe ngabapristi bokuphatha umsebenzi wami, 11lamagcobo okugcoba, lempepha elephunga elimnandi yendawo engcwele; benze konke njengokukulaya kwami.
Ukugcina amaSabatha
12INkosi yakhuluma kuMose yathi: 13Tshela abantu bakoIsrayeli uthi: Impela lizagcina amaSabatha ami; ngoba lokhu kuyisibonakaliso phakathi kwami lani kuzo izizukulwana zenu, ukuba lazi ukuthi ngiyiNkosi elenza libe ngcwele. 14Ngakhoke gcinani iSabatha ngoba lingcwele kini, yilowo lalowo alonayo uzakubulawa sibili; laye osebenza ngalo uzakukhutshwa ebantwini bakibo. 15Kusetshenzwe insuku eziyisithupha, kodwa usuku lwesikhombisa lube liSabatha lokuphumula, lingcwele eNkosini; lowo osebenza ngeSabatha uzakubulawa sibili.#Eks 20:8–11; 23:12; 34:21; 35:2; Levi 23:3; Dute 5:12–14 16Ngakhoke abantu bakoIsrayeli bazagcina iSabatha, baligcine ezizukulwaneni zabo, libe yisivumelwano esingapheliyo. 17Liyisibonakaliso phakathi kwami labantu bakoIsrayeli kuze kube nini lanini; ngoba ngensuku eziyisithupha iNkosi yenza izulu lomhlaba, kodwa ngosuku lwesikhombisa yaphumula, yatshaphuluka.#Eks 20:11
18Isiqedile ukukhuluma kuMose entabeni yaseSinayi yamnika uMose amatshe amabili obufakazi alotshwe ngomunwe kaNkulunkulu.
Currently Selected:
Eks 31: BE1978
Highlight
Copy
Compare
Share
Want to have your highlights saved across all your devices? Sign up or sign in
Bible Society of Zimbabwe 1978
